1 Awo olunaku olwa Pentekonte ni lutuuka. Kwolwo, abaikirirya bonabona babbaire bakumbaaniire mu nyumba moiza, omu Yerusaalemi. 2:1 Lee 23:15-21; Ama 16:9-11 2 Babbaire ooti bali awo, ni bawulira okululuma okwʼamaani okuli ooti gumpunga ogwʼamaani nga kuzwa omwigulu. Okululuma okwo ni kumalaku enyumba omu babbaire batyaime mwonamwona, buli moiza nʼakuwulira. 3 Babba ooti bakaali bali awo, ni babona ebintu ebiri ooti ndimi gya musyo egigawukaine okusuukamu lumolumo, era buli lumo kwigyo ni lugwa oku buli moiza kwibo. 4 Abaikirirya bonabona ni baizula oMwoyo oMweru, batyo ni batandiika nʼokutumula omu ntumu egindi egibatayegangaku, buli moiza ngʼoMwoyo oMweru oweyamwezyesyanga okugitumula.

5 Omu kiseera ekyo, omu Yerusaalemi mwabbairemu abasaiza aBayudaaya ababbaire batya oKibbumba, ababbaire baizire okuzwa kumpi ooti mu buli kitundu ekiri oku kyalo. 6 Abasaiza abo owebawuliire olukero, ni beekumbaania mu bungi egiri abaikirirya okubona niki ekyaba omu maiso. Neye buli moiza kwibo kyamwewunyisirye okuwulira abaikirirya nga batumula omu ntumu gyabwe ibo aBayudaaya abageni.

7 Awo abasaiza abo ni bawuninkirira ino era ni beebuulyangana bati, “Ii, abantu banu bonabona abatumula, kaisi tibatyami bʼomwitwale lyʼe Galiraaya? 8 Kaisi tete kiiza kitya okubba kiti iswe swenaswena otuli aanu tubuliramu abatumula omu ntumu gyʼeedi egituzwera? 9 Iswe ngʼowetuli aanu, newankubbaire nga tuli Bayudaaya, tuzwera mu byalo byʼenjabulo. Abamo kwiswe tuzwera mu Palutiya, nʼe Mediya, nʼEramu; mu Mesopotaamiya, Buyudaaya, nʼe Kapadookiya; mu Ponto, nʼAsiya. 10 Era, tulimu nʼabazwera omu Furigiya, nʼe Panfiriya, nʼe Misiri, nʼebitundu ebyʼe Liibbiya okulirana ekibuga Kuleene. Kaisi era, mwiswe mulimu nʼabageni-obugeni okuzwa Looma 11 nga tutwaliiremu aBayudaaya nʼabamawanga agandi abacuukire okwaba omu diini yʼeKiyudaaya. Kaisi tete, ni wabbaawo abali mwiswe abazwera mu Kuleete, nʼomu Buwalabbu. Neye aale obone swenaswena owetubawulira nga batumulira mu ntumu egyʼe waiswe ebyʼamaani oKibbumba ebyakolere!” 12 Olwakubba bonabona babbaire bawungire era nga bibasobeire, abamo kwibo ni beefudangaku kwebuulyangana bati, “Kinu kyezya okubba kitegeeza niki?”

13 Neye abandi kwibo ni babeesekeranga-bwesekeri na kujerega baikirirya nga webakoba bati, “Banu leero bateemeire mwenge omuyo!”

14 Neye oPeetero ngʼali aawo nʼabatume abandi eikumi na moiza, nʼasetuka nʼayemerera omu maiso gʼabantu kaisi nʼairamu ebibabbaire bakoba. Nʼamagono agʼangulu era nʼobukanu obunene nʼatandiika okutumula egibali ati, “Bayudaaya bainange, era na inywe nywenanywena abali omu Yerusaalemi, muwulisisye kusani, nga mbasonzolera ekintu ekiri aanu. 15 Abantu banu abemubona tibateemeire nga inywe owemuseega, olwakubba nginu giri saawa isatu-busatu egyʼamakeezi.* 2:15 ABayudaaya ngʼempisa yaabwe, tibatiranga kulyaku kantu konakona ooba okunywa okutoolaku nga bamalire okusaba okwʼamakeezi oku saawa isatu. 16 Ekituuce kiri kiti, ekitutuukireku niikyo ekyo onaabbi oYoweri ekiyatumwireku oweyakobere ati:

22 OPeetero niiye okweyongera ati, “Aale Baisirairi bainange muwulisisye ebibono ebinjaba okutumula. OYesu owʼe Naazaleesi yabbaire musaiza oKibbumba onyere oguyakakasire ati niiye onyere amutumire. Ekyo yakikolere mu kumwezyesya okukola ebyamagero, nʼebyewunyo, nʼobumanyiciryo oKibbumba ebiyamukolesyanga oweyabbaire mwinywe, era nywena abananyere mukimaite nakusani. 23 Neye newankubbaire ngʼekyo mwabbaire mukimaite nakusani, omusaiza oyo bamuwaireyo egimuli, nywena ni mumukwatisya abakola ebibbibibbi okumukomerera oku musalabba, mutyo ni mumwita, era ngʼoKibbumba onyere oweyabbaire amalire okukitegeka, era ngʼakimaitiirewo. 2:23 Mat 27:35; Mak 15:24; Luk 23:33; Yok 19:18 24 OYesu yabitire omu bulumi bubitiriri kaisi nafa. Neye oKibbumba nʼamuzuukiza, atyo nʼamuteeresya okuzwa omu bulumi okufa obukuleeta olwakubba amagombe gabbaire tigeezya okumukalangulirayo okusigala nga mufu. 2:24 Mat 28:5-6; Mak 16:6; Luk 24:5 25 Tukakasa obutuuce bwʼekyo olwakubba, eira nakimo, ebyo niibyo oKurisito ebiyatumulisirye okabaka oDawudi oweyakobere ati:

29 OPeetero ni yeeyongera nʼakoba ati, “Boluganda, oleke mbakobere kinu anambula kutya nti, ozeiza waiswe okabaka oDawudi yafiire, ni bamuliika omu magombe, era nʼatyanu-bunu amagombege gakaali gali okwaiswe kunu. 30 Nʼolwekyo, ekintu kyeraga kyonkani kiti oDawudi tiyabbaire yeetumulaku nanyere, neye olwakubba yabbaire naabbi, era ngʼamaite kusani oKibbumba ekiyamusuubizire ngʼalayira ati, ‘Omoiza oku baizukulu ba Dawudi yalisikira entebe eyʼobwakabakabwe.’ 2:30 2Sa 7:12-13; Zab 132:11 31 Olwakubba yamaite ebiiza okubbaawo omu maiso, kagira yalagwire oku kuzuukira kwa Kurisito ogubasukireku amafuta, ngʼakoba ati, ‘Tibamulekeswire omu bafu, waire okuganya omubirigwe okuvunda.’ 32 OYesu oyo oKibbumba yamuzuukizire, era swenaswena abaikiriryabe, tweboneireku nʼagaiswe era tukikakasa eeri buli muntu. 33 Era oKibbumba yamalire okumuniinisya omwigulu, nʼamutyamisya aamo naye omu kifo ekyʼekitiisya eino,† 2:33 Ekifo ekyʼekitiisya eino, ooba, Oku lubba olwʼengalo endiiro eya Kibbumba. nʼamukwatisya nʼoMwoyo oMweru, era nga iye oIteeye oweyabbaire amusuubizire. OYesu yena niiye okutwicaaku oMwoyo oMweru oyo, era oMwoyo niiye aleeterewo ebyo ebimubona nʼebimuwulira. 34 Dala okabaka oDawudi tiyabbaire yeetumulaku niiye onyere, olwakubba iye tibamuniinisirye omwigulu ngʼowekyabbaire oku Yesu. Tete era onyere yatumwire biinu oku Yesu ati,

36 Ngʼamaliirirya, oPeetero nʼakoba ati, “Nʼolwekyo, abantu bʼe Isirairi nywenanywena mukimanye anambula kubuusabuusa muti, oYesu oyo ogumwakomereire oku musalabba niiye oKibbumba oguyasuucirye okubba oMusengwa era oKurisito ogubasukireku amafuta.”

37 Abantu ababbaire bawulisisya oPeetero owebawuliire ebyo ebiyatumwire, ni bibalumirirya, ni bawulira oku myoyo gyabwe ngʼomusango gubakwata, niiye okubuulya oPeetero nʼabatume abainaye bati, “Baganda baiswe, oolwo atyanu twakola tutya kaisi oKibbumba ayezye okutusoniya?”

38 OPeetero nʼabairamu ati, “Mwenenye ebikole ebibbibibbi, era buli moiza bamubatize omu liina lya Yesu oKurisito. Awo oKibbumba yabasoniya omusango gwʼebibbibibbi byanywe, era nʼabawa nʼekirabokye, nga niikyo oMwoyo oMweru, 39 olwakubba ikyo oKibbumba yakibasuubizire niinywe, nʼabaana baanywe, era nʼabo bonabona abali e yala, bonabona abo oMusengwa waiswe oKibbumba abeyalyeta.”

40 Nʼebibono ebindi bingi, oPeetero ni yeeyongera okubalaabbira, ngʼabasisiitira ati, “Muganye oKibbumba abalokole muwunuke ekibonerezo ekyayaba okuwa abantu ababbibabbi abʼomulembe gunu ogwalemaire.” 41 Nʼolwebyo, abaikiriirye ebibono oPeetero ebiyakobere bababatizire, era oku lunaku oolwo, abaikirirya abayaaka abeera ooti 3,000 ni babeegaitaku.

42 Abaikirirya bonabona ni banyiikiriranga okusuna okubeegesya okuzwa eeri abatume nʼokukwata ebibabeegeserye, nʼokubba nʼomwoyo ogwʼobumo, ekikoba kiti, buli moiza ngʼalumirwa omwinaye, nʼokugabana oku kiinulo ekimo, okwo ngʼoteekereku nʼokusaba. 43 OKibbumba nʼayezyesya abatume okukola ebyewunyo bingi ino, era abʼe Yerusaalemi bonabona ni baizula okuwuninkirira. 44 Bonabona abaikiriirye oYesu baabbanga bumo, nga bakumbaanira aamo buliijo, era nga buli moiza wʼeidembe okukolesya ekintu omwinaye ekiyabbaire nakyo. 2:44 Bik 4:32-35 45 Ekikoba kiti, olwisi abamo kwibo batundanga nʼebyabwe, empiiya egibatoolangamu ni bagigabira yenayena mwibo okusinzirira oku kyetaagokye. 46 Tibagoneryanga okukumbaanira aamo omu luuga lwʼeYeekaalu buli lunaku, oteekeku nʼokucaalanganiranga kisito ku kisito ni bagabanira aamo ebiinulo nʼemyoyo egiizwire eisangaalo nʼeiwooyo anambula kwekolesya, 47 era nga webawuuja oKibbumba, era nga nʼabantu bonabona babasiima. Ebyo nga byaba omu maiso, buli lunaku oMusengwa nʼabongerangaku abantu abandi, abo abalokokanga.