8
Okabona akira obukulu owʼeNdagaano eMpyaka
1 Ekikulu omu bintu ebitukoba niikyo kinu; okabona akira obukulu ogutuli naye atyo wayagaagana, era atyaime eeyo omwigulu aamo nʼoKibbumba onyere oBwezye omu kifo kyʼekitiisya eino.* 8:1 Ekifo kyʼekitiisya eino, ooba, Oku lubba lwʼengalo endiiro eya Kibbumba. 8:1 Zab 110:1 2 Aweererya ngʼokabona akira obukulu omu kifo ekyeru, era omu weema eya Kibbumba enanyerenyeere eyʼokusinziramu, oMusengwa iye onyere egiyateekerewo, etali ooti giinu abantu egibakola.
3 Buli kabona akira obukulu bamuteekawo kuwaayo birabo nʼesadaaka eeri Kibbumba. Kale nʼokabona waiswe omukulu kagira yena yabbaire nʼokubbaaku nʼekyawaayo. 4 Singa yabbaire ku kyalo, tiyankubbaire kabona kadi katyayi kati, olwakubba waliwo abakabona abawaayo ebirabo ngʼaMateeka ga Musa owegalagira. 5 Neye ibo omulimo ogubakola gufaananaku-bufaanani, era kiiriirye ekyʼebyo ebiri omwigulu. Kagira oMusa oweyabbaire ngʼayaba okukola eweema eya Kibbumba, oKibbumba yamulagiire ati, “Byonabyona obikole ngʼosengererya enkola egibakulagire ngʼoli oku lusozi.” 8:5 Kuz 25:40 6 Neye atyanu oYesu omulimo ogubamuwaire, gukirira nakimo ogwa bakabona badi obukulu, olwakubba nʼendagaano empyaka iye egyabbairemu ngʼomutabagania akati wa Kibbumba nʼabantu, ekira eedi enkaire obusa. OKibbumba oweyabbaire nga akakasa endagaano empyaka yakolere ebisuubize ebisa ebikira bidi ebizwa omu Mateeka ga Musa obusa.
7 Singa endagaano esooka yabbaire ebulaku ekyokuginenya, tiwankubbairewo okwetaaga eyokubiri. 8 Neye oKibbumba atumula ngʼanenya abantube ati:
“OMusengwa alangirira ati,
ekiseera kyalituuka,
ni nkola endagaano empyaka nʼabantu bʼe Isirairi,
era nʼekika kya Yuda.
9 Tiyalibba ngʼendagaano eginakolere nʼabazeiza baabwe,
oku lunaku olunabakwaite oku ngalo
okubatoola omu kyalo kyʼe Misiri,
olwakubba tibeekalanguliire
omu kukwata endagaano eyo.
Zena kagira ndekayo okubawulisisya.”
10 “Era oMusengwa alangirira ati,
eenu niiyo endagaano eginalikola nʼaBaisirairi
enaku egyo owegyalituuka.
Naliteeka aMateeka gange
omu biseego byabwe.
Era naligawandiika
omu myoyo gyabwe.
Nalibba Kibbumba waabwe,
bona ni babba bantu bange.
11 Tiwalibbaawo ayegesya omwinaye,
ooba ayegesya omugandawe ati,
‘Omanye oMusengwa,’
olwakubba okuzwera nakimo oku mutomuto okutuuka oku mukulu,
bonabona balimmanya ngʼoMusengwa waabwe.
12 Ekyo wekyalibba olwakubba nalibasoniya okubbenga kwabwe,
nʼebibbibibbi byabwe tinalibyewukirya tete.” 8:12 Yer 31:31-34
13 OKibbumba owaayeta endagaano eenu ati mpyaka, abba eedi esooka agisuucirye nkaire eweiremu amaani. Era ekintu owekikula ni kiwaamu amaani kibba kyatira nʼokuzwawo.