1 Olundi, oYesu nʼayaba omwikumbaaniro. Era oomwo mwabbairemu omuntu owʼengalo eyanyolere. 2 Era omunyere oomwo mwabbairemu aBafalisaayo ababbaire banoonianga ensonga yʼokuzweraku okuwaabira oYesu. Kale ni bamwekalikica babone ooba nga yalamya omuntu oyo oku Saabbaato, kaisi basunire okwo ekyʼokumuwaabira. 3 OYesu nʼakoba owʼengalo eyanyolere ati, “Osetuke, oyemerere abantu bonabona egibeezya okukubonera!” 4 Kaisi nʼabuulya abamwakanisya ati, “Kaisi niki amateeka ekigaikirirya okukola oku Saabbaato? Kukola busa ooba bubbibubbi? Kulamya bwomi ooba kwita?” Neye ibo ni basirika-busiriki. 5 Awo nʼabeeruguulyamu amaiso nʼobusungu, era ngʼobukakanyali bwʼemyoyo gyabwe bumukwatisirye obutaki, nʼakoba omuntu oyo ati, “Waama iswe ogolole engaloyo.” Era nʼagigolola, era nʼeramirawo. 6 Awo aBafalisaayo ibo ni bawulukamu, era amangu ago ni beeyimbya nʼabandi abʼekibbula ekiwagira okabaka oKerode ni bateesa engeri egibeezya okujigiricamu oYesu.

7 Olundi oYesu nʼayaba oku mbale kwʼenyanza eyʼe Galiraaya aamo nʼabeegibe. Oguyindi gwʼabantu ni gwaba egyali, nga guzwa e bugwaisana omu Galiraaya nʼomu Buyudaaya, 8 omu maserengenta gʼomu kibuga e Yerusaalemi, nʼomu kitundu kyʼe Idumeya, nʼokwitale kudi kwʼomwiga oYoludaani, nʼe ngulu omu bitundu ebiriraine ebibuga oTiiro nʼoSidoni. Abo bonabona baabire egyali olwakubba babbaire bawuliire ebyakola. 9 Olwʼabantu okubitirira obungi, oYesu nʼalagira abeegibe bateekewo eryato libbaawo nga limukuumiriire okutyamamu olwʼekiziima kyʼabantu obutamumigirirya. 10 Yabalagiire okukola ekyo olwakubba yabbaire alamirye abantu bangi, ngʼabalwaire bonabona beemigirirya beezye okumutuukirira bamukwateku. 3:9-10 Mak 4:1; Luk 5:1-3 11 Abantu ababbaireku emizimu owebamubonangaku nga bagwa ansi omu maisoge ni baasyamika bati, “Niiwe oMwana wa Kibbumba!” 12 Neye oYesu iye ngʼagaanira nakimo emizimu egyo okumubbutula.

13 Olundi, oYesu nʼayaba oku lusozi, nʼayeta abo abeyalonderemu, ni baaba egyali. 14 Mwibo nʼayabulaku ikumi na babiri babbenge aamo naye, era abatumenge okulaabba obukwendabwe. 15 Abo abeyalonderemu nʼabeeta batume, era nʼabawa obwezye okubbinganga emizimu oku bantu.

16 Abatume eikumi na babiri abeyayabwireku niibo banu: OSimooni, oguyatuumire erya Peetero; 17 oYaakobbo nʼomugandawe oYokaana abataane ba Zebedaayo abeyeerwire erya “Bbowaneruuge” amakulu gaakyo kiti, “Ababbwatuka ooti laadu.” 18 Era nʼAndereya, nʼoFiripo, nʼoBbantulumaayo, nʼoMatayo, nʼoTomasi, nʼoYaakobbo omutaane wʼAlufaayo, nʼoSadaayo, nʼoSimooni oMulwaniriri wa kwefuga kwʼeigwangalye, 19 nʼoYuda Isikalyoti eyaliiremu oYesu olukwe.

20 Olundi, oYesu nʼakanga e Kaperenawumu, tete abantu bangi ni bakumbaanira egyali, iye nʼabeegibe ni bakayaku nʼakaseera kʼokulya ekyokulya. 21 Abʼe waabwe e Naazaleesi owebawuliire bati airire, ni baaba okumukwata olwakubba ibo babbaire bakitwala bati agwire eiralu.

22 Abakugu omu byʼaMateeka ababbaire bazwire e Yerusaalemi ibo nga bakoba abantu bati, “Aliku Bberuzebbuli omukulu wʼemizimu, era akolesya bwezye bwa mukulu oyo okugibbinga.” 3:22 Mat 9:34; 10:25

23 Awo oYesu nʼayeta abakugu omu bya Mateeka nago okwaba egyali, nʼabairiramu mu ngero ati, “OSitaani ogumwetere oBberuzebbuli ayezya atya okwebbinga iye onyere oku bantu? 24 Abantu abʼobwakabaka obumo owebeesalamu, obwakabaka obwo tibuwangaala. 25 Nʼomu kisito, singa abantu baamu owebeesalamu, baawukana, nʼekisito ekyo ni kisansukana. 26 Singa oSitaani yena yeerwanisya, obwezyebwe ni bugabukanamu, abba takaali ali nʼamaani, era abba ngʼajigirikire.

27 “Mpaawo ayezya okwingira omu nyumba ya muntu owʼamaani nʼanyaga ebintubye, okutoolaku ngʼasookere kumusiba, oolwo kaisi nʼayezya okunyaga ebyʼomu nyumbaye.

28 “Mbakobera amazima nti, kyezyeka okusoniya abantu ebibbibibbi byabwe byonabyona, era kyezyeka okubasoniya ebizumi byonabyona ebibazuma. 29 Neye, buli azuma oMwoyo oMweru, tibalimusoniya olwakubba abba akolere kibbikibbi ekyasigala nakyo emirembe nʼemirembe.” 3:29 Luk 12:10 30 Ekyo oYesu yakitumwire kwakanisya baabo ababbaire bakobere bati aliku muzimu.

31 Atyanu abaganda ba Yesu nʼomaaye ni batuuka egiyabbaire. Iye ngʼali omu nyumba, ni beemerera e nza, ni bamutumira omuntu okumweta. 32 Ekiziima kyʼabantu ekyabbaire kityaime nga kimweruguuliriirye ni bamukoba bati, “Omaawo nʼabagandabo bali e nza bataka okukubona.”

33 OYesu nʼabairamu ati, “Abantu abenjeta nti mama ooba nti baganda bange niibo ababba abʼengeriki?” 34 Awo nʼabitya amaiso omu bantu ababbaire batyaime okumpi naye aawo abamweruguuliriirye, nʼakoba ati, “Omama nʼabaganda bange niibo banu. 35 Buli akola oKibbumba ebyataka niiye abba omuganda wange, niiye abba omwonyoko wange, era niiye abba omama.”