2
Okwewombeeka kwa Kurisito nʼokumugulumalya
1 Nʼolwekyo, olwakubba nti mwiramu amaani lwa kwesiga Kurisito, era okutakakwe kubagumya, era mukolera aamo nʼoMwoyo oMweru, era mukwatirangana ekisa era musaasirangana owewabbaawo agada, 2 aale musangaalire nakimo nga mubba nʼenseega moiza. Era nga mubba nʼokutakangana ino, nga mwikiriziganya nʼomwoyo gumo era nga muli bumo omu mwoyo nʼomu biseego byanywe. 3 Timwakolanga ekintu kyonakyona olwʼengongi ooba omu malala, neye mukolenge mu buwombeeki nga muwa abanaanywe ekitiisya ekikiraku ekyo inywe abanyere ekimwewa. 4 Mutyo buli moiza kwinywe tiyaafangayo ku byetaago bibye byonkani, neye afenge nʼoku byʼabandi. 5 Kale muli nʼokubba nʼenseega ooti ya Kurisito Yesu egiyabbaire nayo:
6 Iye oyo eyabbaire nʼekikula kya Kibbumba,
tiyaseegereku oku mwenkanonkano nʼoKibbumba ngʼekintu ekyayezya okuleka,
7 neye yeerekerezere ekitiisya, nʼasuuka ooti muweererya.
Atyo nʼasuuka muntu nga iswe.
8 Era oweyasuukire ooti muntu, yeewombekere,
kaisi nʼagondera oKibbumba paka nʼokwikirirya okufa
aate okufa okwʼoku musalabba.
9 Nʼolwekyo oKibbumba kiyazwireku nʼamugulumalya eino,
nʼamuteeka omwigulu omu kifo ekikirira nakimo okubba ekyʼekitiisya,
era nʼamuwa eriina eryʼekitiisya okukiraku amaliina gonagona.
10 Kaisi awo ebiri omwigulu, nʼebiri oku kyalo, era nʼebiri ansi wʼekyalo,
byonabyona bikome amazwi nʼobuwombeeki okusinza eriina lya Yesu, 2:10 Isa 45:23
11 era buli muntu yalibbutula omulwatu ati,
“OYesu Kurisito niiye oMusengwa.”
Era nʼolwekyo abantu bonabona baligulumalya oKibbumba oItewaiswe.
Okubba ekitangaala omu kyalo
12 Nʼolwekyo, bainange abatake, ngʼowemugonderanga oKibbumba buliijo, ekikoba nti, tinga ndiwo lwonkani, neye nʼatyanu ngʼowembulayo, musingisyekuuwo nʼokusingisyaku. Buli muntu iye onyere yeefudengeku ino okukola ebintu ebiraga biti oKibbumba yamulokoire. Ekyo mukikolenge mukutya Kibbumba nga mumuwa ekitiisya ekyʼamaani. 13 Ekyo kityo olwakubba oKibbumba niiye akolera mu buli mwikirirya okumwezyesya okubba nʼokutaka okukola era nʼokukola ebisa oKibbumba ebyataka. 14 Kale byonabyona mubikolenge anambula okwezuluguma ooba okwakanisyangana, 15 kaisi awo mubbe batukulye nga mubulaku ekyokubanenya. Era mwabba baana ba Kibbumba ababulaku eitondo, nga muli omu mulembe gwʼabantu abakola ebibbibibbi era ababebenyeki. Muteekwa okuboneka mwibo nga muli ooti nkota egyaka angulu omwibbanga, 2:15 Ama 32:5 16 nga mulaabba egibali ekibono ekyʼobwomi. Ekyo kyalimpezyesya okwewuuja oku lunaku oKurisito oluyaliriraku, nga nkoba nti tinakalabaniire bwereere.
17 Atyanu owebabba bawaayo esadaaka eeri oKibbumba, basuka ekyokunywa okwongererya oku sadaaka. 2:17 Kub 15:1-12 Kale zena nʼowekwabba kunjita nʼeisaaye lyange ni lisusuka naabba ooti kyakunywa ekyo ekibasuka okwongererya oku sadaaka era kyabba kyongererya ku sadaaka nʼobuweererya obuzwa omu kwikirirya kwanywe. Era ekyo kyansangaalya ni nesiima na inywe nywenanywena. 18 Kale nʼomu ngeri enanyere eyo nywena muteekwa okusangaala, nʼokujaagaanira aamo na nze.
Ebikwata oku Temuseewo nʼEpafuladiito
19 Neye nsuubira okubatumira oTemuseewo mangu singa oMusengwa oYesu Kurisito oweyaabba atakire atyo, kaisi njiremu amaani nga mmalire okuwulira ebibafaaku. 20 Cooka mbula omuntu ogondi aali nʼebiseego ebifaanana nʼebyange ngʼoyo era ayezya okubalumirwa eino nga iye. 21 Ekyo kityo olwakubba abandi bafa ku byabwe byonkani, tibafaayo nʼoku bya Yesu Kurisito. 22 Neye mumaite muti oTemuseewo muweererya atuukana, era aweererya aamo na nze omu kusasya aMawuliro aMasa, ooti mwisuka abbeera oiteeye. 23 Kale nʼolwekyo nsuubira okumutuma egimuli, amangu ago nga nankumanya ekyaba okuntuukaku. 24 Era nkakasa nti oMusengwa oweyaabba atakire atyo, nze zena onyere nʼaiza eeyo mangu.
25 Neye nseega nti kyetaagisya okubasindikira Epafuladiito okwiraku egimuli, iye oyo nago owoluganda, era omuweererya omunange aali ooti mwisulukale eyaneimbiryeku okulwanirira aMawuliro aMasa, omukwenda waanywe ogumwantumiire okwiza okumbeera era nʼokungabirira omu binabbaire neetaaga. 26 Ekyo kityo olwakubba yeegomba ino okubabonaku nywenanywena, era abbaire mweraliikiriri ino olwakubba mwawuliire ngʼoweyalwaire ino. 27 Ikyo ekyo kituuce kiti Epafuladiito yalwaire, era yabbaire abulaku katono kati kufa. Neye oKibbumba yamukwatiire ekisa, era tiniiye yenkani, neye na nze zena yakinkwatiire, nʼammalaku enima eyʼokulwalakwe era nʼokundamya enima tete eginankubbaire nayo singa yabbaire afiire. 28 Nʼolwekyo njunjumiriire leero ino okubasindikira Epafuladiito aireku eeyo egimuli, kaisi awo musangaale nga mumuboineku, era na nze zena kaisi omwoyo guwukukeku. 29 Kale mumwanirize nʼeisangaalo lingi ngʼowoluganda omu Musengwa waiswe. Era abali ooti yooyo mubawenge ekitiisya, 30 olwakubba iye yabbaire abulaku katono okufa ngʼali oku mulimo gwa Kurisito, oweyajaaliire obwomibwe nʼaiza okumbeera omu kifo kyanywe.