Micah
Talk Fo God
1
1 ✡ 1:1 a: 2Kings 15:32-38; 2Rec 27:1-7; b: 2Kings 16:1-20; 2Rec 28:1-27; c: 2Kings 18:1–20:21; 2Rec 29:1–32:33Wen Jotam, den Ahaz, an den Hezekiah stay king Judah side, Micah from Moreshet town talk fo Da One In Charge. Dis wat Da One In Charge show Micah bout Samaria an Jerusalem:
Da One In Charge Goin Punish
Samaria An Jerusalem
Samaria An Jerusalem
2 All you peopos, lissen dis!
Erybody on top da earth, lissen good:
Da One In Charge a me stay inside
Da Temple dat stay spesho fo him,
He poin finga you guys.
3 Look! Da One In Charge stay come
From da place wea he stay.
He come down.
He walk on top da high places
All ova da world.
4 Jalike da mountain melt unda him,
Jalike da wax melt in front da fire.
An jalike da valley bus open,
Wen da watta come down da mountain real fas.
5 All dis stuff goin happen,
Cuz da peopo dat come from Jacob
Go agains wat Da One In Charge
Wen tell um fo do!
Da peopo dat come from Israel
Stay do bad kine stuff!
Who get da blame cuz da peopo dat come from Jacob
Go agains Da One In Charge, aah?
Da Samaria peopo, in dea main town,
Dey get da blame!
Wea da peopo dat come from Jacob,
Dey go make sacrifice to da odda gods, aah?
Da Judah peopo, in dea main town Jerusalem,
Dass wea dey go down in front da idol kine gods.
6 Da One In Charge tell:
“Az why I goin bus up Samaria,
An make um come one big pile rocks in da countryside,
Goin come one flat place fo plant grapes.
Da stones dey use fo build, I goin roll um all down da valley.
An I goin leave ony litto bit dirt wea dey wen build house.
7 I goin smash all da idol kine gods
Dat da Samaria peopo wen make.
Da presents guys give to da temples ova dea,
Fo dem fool aroun wit da wahines dat work dea,
I goin burn um all up.
I goin take all dea idol kine gods
An make um come one pile a junk.
Da Samaria wahines fool aroun fo money.
An da Samaria peopo make idol kine gods
Wit da money from dose wahines.
But bumbye, da guys dat stay agains Israel
Goin take away dat money
Fo pay odda wahines dat fool aroun in odda countries.”
8 Micah tell:
“Cuz a dis, I goin cry real hard an real loud.
I goin walk aroun barefeet an naked,
Fo show dat I stay sad inside.
I goin cry real loud jalike one wild dog,
An make sad noise jalike one pueo.
9 Cuz nobody can make Samaria town
Come good
Cuz stay all bus up.
Now da Judah peopo suffa too.
Da army guys dat stay agains us guys stay by oua gate awready
By Jerusalem, da big town.
Da Peopo Dat Hate Us
Come Nea Jerusalem
Come Nea Jerusalem
10 “No tell da Filisha peopo Gat side bout dis!
No cry bout dis in front da peopo inside Akko, da Crying Town.
You peopo inside Bet-Ofrah, da Dirt Town,
Go roll inside da dirt fo show you guys stay bum out.
11 You guys dat live inside Shafir, da Nice Looking Town,
Go wea da guys dat stay agains us take you,
No matta you stay naked an shame.
Da peopo inside Zaanan, da Marching Town,
Dey stay sked, dey no come outside dea town wall.
Da peopo inside Bet-Ezel, da Hill Town, stay sad an crying.
Dey no can help you notting.
12 Da peopo inside Marot, da Bad Taste Town, dey wait fo somebody help dem.
Dey suffa, cuz bad kine stuff happen to dem from Da One In Charge.
Da army guys dat stay agains us guys stay come all da way
By da Jerusalem town gate awready.
13 You peopo dat live Lakish, da Horse Town,
Tie da war wagons to da horses fo you run away!
Cuz you guys was da firs ones dat wen do bad kine stuff
Wen you guys wen copy wat da Israel peopo stay do.
Az how you guys wen lead da Jerusalem peopo
Fo do bad kine stuff too.
14 You Judah peopo goin sen goodbye kine present
To da peopo inside Moreshet-Gat,
Cuz dey goin go way.
Da Israel king guys no can trus
Da peopo inside Achzib, da Dry Puka Town.”
15 Da One In Charge tell:
“You guys dat live Mareshah town,
I goin sen somebody fo come take ova yoa town.
No matta da leada guys fo da Israel peopo stay importan,
Dey goin go hide inside da Adullam cave,
Jalike how King David wen do.
16 Shave off yoa hair an come bolohead
Fo show you guys stay sad inside.
Cuz da kids dat you guys get plenny love an aloha fo,
Da army guys goin make dem prisonas
An take dem away.
So come bolohead jalike one scavenja bird!”
✡1:1 1:1 a: 2Kings 15:32-38; 2Rec 27:1-7; b: 2Kings 16:1-20; 2Rec 28:1-27; c: 2Kings 18:1–20:21; 2Rec 29:1–32:33