1 मावोरिर! नयगा देवुळता जीवा मन्ह्‌ता इनवालोर सबेटोरा पोग़ोन विस्वस केमाटु. देवुळता कबुर वेहवालोरोम इनजोर जोल कबुरतोर वेल्‍लाटोर दुनियाते तिरियसोर नाळेह कीस्तोर. अदिनेनाह्‌क ओरगा निटम देवुळता जीवा मन्ह्‌ताया इले, इनजोर सेतेमतुन पर्ह्‌किस ऊळाटु. 2 ओरगा निटम देवुळता जीवा मन्ह्‌ताया इले, इनजोर मीट इद्रमलेह्‌का ऊळकिर, “येसु किर्स्तु मन्कल मारियिस इद बूमते वातोग़” इनजोर बोर वेहतह्‌तोर, ओरु देवुळता जीवाताहि वळ्ह्‌किह्‌तोर. 3 मति बोरु, येसु किर्स्तु मन्कल मारियिस वावोग़ इनजोर वेहतह्‌तोर, ओरु देवुळता जीवाताहि वळ्ह्‌कोर. इद्रमतोर इतेके येसु किर्स्तुना विरुदतोर आंदुर. किर्स्तुना मोदुल विरुदतोग़ वायनोग़ इनजोर मीट केंजिस मतिर, मति ओग़ विरुदतोना बुदि इंजेक इंका इद दुनियाते मन्ह्‌ता.

4 ए पेकोरिर! मीट देवुळता बुदतोरिर आंदिर. मियगा मनदनद ताना पवित्र जीवा, दुनियाते मनदनद देयह्‌कना मुक्याह्‌काय एक्वा बेरा लावता आंदु. अदिनेनाह्‌क मीटु ओर जोल काग़्हवालोरिन गेल्सतिर. 5 देवुळता पोल्‍लो ततोम इनजोर नाळेह केवालोर इद दुनियाता बुदतोर आंदुर. अदिनेनाह्‌क दुनियाताङे पोल्‍लोङ वळ्ह्‌किह्‌तोर. अहे इद दुनियातोर लोकुर ओराङ केंजिह्‌तोर. 6 मति माट देवुळता लोकुरल. बोरु देवुळतुन पुतोर, ओर मावा पोल्‍लोतुन केंजिह्‌तोर; मति बोरु देवुळतुन पुनोर, ओर मावा पोल्‍लोतुन केंजोर. इद्रमलेह्‌का सेतेमता पवित्र जीवा ओरगा मन्ह्‌ताया, बार लेसिह कीयनद जीवा मन्ह्‌ता इनजोर माक पुनमुळ आस्ता.

7 गोतयालोरिर! माट ओर्विह्‌क-ओर्वोग़ जीवा कीयना गावले. जीवा कीयनद पोल्‍लो देवुळतग्डाये आंदु. बोर जीवा कीस्तोर, ओर देवुळताङ पिलाङ-पेकोर आसि तान पुतोर. 8 देवुळि जीवा कीयनद आंदु. अदिनेनाह्‌क बोर दुस्रोरिन जीवा केवोर, ओर तान पुनोर. 9 तना मग़ना मेटे माक पिसमुळ दोर्कि इनजोरे, देवुळि तना वग़ोग़े मग़िन इद दुनियाते लोहच मता. इद्रम कीसि नना लोकुरिन जीवा कीय्ह्‌नन इनजोर तोहता. 10 बेद्रम जीवा कीयना इनजोर माट देवुळतुन जीवा कीसि तोहवल. मति देवुळिये इद पोल्‍लोतुन बेस-नेह्‌ना तोहता. बेद्रम इतेके अद माक जीवा कीता ओसो तना मग़ि मावा सिक्सातुन तना पोग़ोन एचि डोलेग़ इनजोर ओन लोहच मता. इदे निटम जीवा कीयनद आंदु.

11 अदिनेनाह्‌कु मावोरिर! देवुळि माक इचोन जीवा कीता इतेके, माट वने ओर्विह्‌क-ओर्वोग़ जीवा कीयना गावले. 12 बोग़े बेस्केन देवुळतुन ऊळोग़; मति माट ओर्विह्‌क-ओर्वोग़ जीवा कीतेकेने, देवुळि मावा जीवातगा जागा आस्ता. जागा आसि मयगा मनदनद ताना गूनमि लोकुरिह्‌क पूरा दिसिह्‌ता, अस्के देवुळतुन ऊळवेकाय ओर तान पुनदा पग़यह्‌तोर. 13 देवुळि तना पवित्र जीवातुन मावा जीवातगा उदिह कीता. अदिनेनाह्‌क माट ताना संगे जोळेम आतल ओसो अद मयगा जागा आस्ता इनजोर माट पुह्‌नल.

14 इद दुनियातोरिन पिसिह कीयलाहि देवुळबाबाल तना मग़िन लोहतोग़ इनजोर माट ऊळतोम ओसो अद पोल्‍लो निटमे मन्ह्‌ता इनजोर साक्सि मह्‌नोम. 15 येसुये देवुळता मग़ि इनजोर बोर कबुल कीस्तोर, ओरा जीवातगा देवुळ वास्ता ओसो ओर वने देवुळता संगे जोळेम आस मन्ह्‌तोर. 16 देवुळि माक जीवा कीता इनजोर इंजेके पुतल ओसो इद पोल्‍लोता बर्वसते ताकिह्‌नल. देवुळि जीवा कीयनद आंदु. अदिनेनाह्‌क बोर जीवा कीसोर मन्ह्‌तोर, ओर ताना संगे जोळेम आस मन्ह्‌तोर. ओसो अद वने ओरगा जागा आस्ता.

17-18 इद दुनियाते मावा ताकमुळ इतेके, येसुना ताकमुळता लेह्‌का मन्ह्‌ता. अदिनेनाह्‌क देवुळि सबेटोर लोकुरा नेयम कीयह्‌पा, माट रेयवालेवा दीरा पोस मनदकल. सिक्सातुह्‌क मन्कलोर रेयिह्‌तोर, मति देवुळता पूरा गूनम मनवानगा रेय वसनद पोल्‍लो मनो. ओग़ देवुळता नेयमते बाताल सिक्सा दोर्कग़ा इनजि रेयोग़. माट वने अद दिया रेयवालेवा मनदकल. मति बोग़ विस्वसि देवुळता गूनमतुन पुनोग़, ओग़ु नेयमतेनाह्‌क रेयिह्‌तोग़. 19 देवुळि मुने माक जीवा कीता, अदिनेनाह्‌क माट जीवा कीय्ह्‌नल. 20 बोग़ाय, नना देवुळतुन जीवा कीय्ह्‌नन इद्रम इन्ह्‌तोग़, मति तना ऐंगेटोग़ विस्वसिन कोंटे कीस्तोग़, इतेके ओग़ जोल मन्कल आंदोग़. तनाङ कोंडाह्‌क दिसवाल ऐंगेटोग़ विस्वसिन जीवा केवोग़, इतेके तन्क दिसवद देवुळतुन ओग़ बह जीवा कीया पग़यह्‌तोग़? 21 देवुळि माक इद्रम उकुम ईता: बोग़ देवुळतुन जीवा कीस्तोग़, ओग़ तना ऐंगेटोग़ विस्वसिन वने जीवा कीयना गावले.