2
किर्स्तु येसुना कबळतुन नाळेह केवा कीम
1 अदिनेनाह्क बाबा, किर्स्तु येसुना मेटे देवुळि माक देय्वा ईता. अद देय्वाते, दीराते सेवा कीसोर मन. 2 नना काग़्हतव पोल्लोन वेल्लाटोर मन्कलोरा मुनेह निमा केंजतिन. अव पोल्लोन काळ्ङलाहि दुस्रोरिन काग़्हतना लायकतोर सेतेमतोरिह्क वेहा.
3 किर्स्तु येसुना सेवा कींदोम आदिनेनाह्कु माट तिपल आतोम. ओर्वोग़ बेसतोग़ सीपय तिपल आस्तोग़, अद्रमलेह्का निमा वने ओना सेवा कीयनाह्कु मावा संगे तिपल आम. 4 लळय केवाल सीपयि तन्क कबळ ईतोग़ साय्बान गिर्दा कीयलाहि ऊळिह्तोग़, अदिनेनाह्क दुस्राङ कबस्कने एग़्कोग़. 5 अहे कग़्सवाल मन्कल अग्डा अडो मतप वितवेक अचोन, ओन्क इनम दोर्को. 6 अद्रमे ओसो एपुर पेसनाह कास्तकारि केवाल मन्काह्के मुने अनम दोर्कना गावले. 7 नना वेहतह्नन अव पोल्लोना लोप्पा सीता कीम, देवुळि सबे पोल्लोने नीक तेल्व ईयग़ा.
8 दाविद राजाना कूळतोग़ येसु किर्स्तुन सीता कीम, हामुरतग्डाहि देवुळि ओन जीवा अर्हता. नना पोकुर कीयनद इदे बेसता कबुर आंदु. 9 इदे बेसता कबुरतुन पोकुर कीयनाह्क नना तिपल आयलाह आतन, लाग्वोग़ मन्कन दोहतप लेह्कान नाक दोहचि जेलते वाटटोर. मति देवुळता पोल्लोतुन इतेके बोग़े दोहच तास पग़वोग़. 10 अदिनेनाह्क देवुळि आचतोर लोकुरेनाह्क, सबे तिपल्किन आपसोर केमेन मह्नन. ओर किर्स्तु येसुन विस्वस कीताह्कु देवुळि ओरिन पिसिह कीयि ओसो ओर अमेसा मनदनद ताना डीसाता वेह्चतगा मनिर इनजोर इव तिपल्किन आपिह्नन.
11 इद पोल्लो सेतेमताये:
माट किर्स्तुना संगे डोलतप लेह्कान आतल,
इतेके ओनाय संगे जीवात मनदकल.
12 तिपल्किन आपसोर केमेन मतेक अचोन,
ओना संगे राजेम ताकिह कीकल,
मति ओन पुनोम इनजोर इतेक अचोन,
ओग़ वने माक पुनोन इनजोर इनदनोग़.
13 ओनगा मावा बर्वस कम मतेकाय, ओग़ बर्वसतोग़े मनदनोग़,
ओग़ मावा लेह्का आयोग़, ओना गूनम बेस्केन मिळ्न्दो.
सामिह्क विचर वानाह ओना कबळ कीम
14 मियग्डोर विस्वसिरिन नना वेहतन अव पोल्लोन सीता कीसीसोर मन. पोल्लोने गिटोगटो आयमाट इनजोर देवुळता मुनेह ओरिन बेस वेहा. अद्रम आतेके बाताले पाय्दा दोर्को, मति केंजवालोरा विस्वस बूळेम आस्ता. 15 निमा इद्रम मन: देवुळि नीक ऊळिस बेस गिर्दा आनाह मनदलाह, अद्रम मन. बेस-नेह्ना कबळ कीतेके लजा अरनाह आयो. निमा देवुळता सेतेम पोल्लोतुन तपवालेवा काग़्हचि, बेस-नेह्ना कबळ केवाल मन्कन लेह्कान मन. 16 देवुळतुन सीता केवा उगस-उगसताङ पोल्लोङ वळ्ह्कवालोरगा अनमा. अद्रम वळ्ह्कवालोर देवुळतग्डाहि पका जेक आसोर दास्तोर. 17 ओर वेहतनव पोल्लोङ, कळियनद नोमुरता लेह्कान पूरा पोकुर आस मन्कलोरा विस्वसतुन बूळे कीस्ताङ. उमिनयुस ओसो पिलेतुस इनवालोर अद्रमताङ पोल्लोङ काग़्हतह्तोर. 18 डोलतोर जीवा अरयनद कगो मारता इनजोर वेर काग़्हचि सेतेम पोल्लोताहि लेसतोर. अदिनेनाह्क उच्वुर मन्कलोरा विस्वसतुन बूळे कीयलाह आतोर.* 2:18 ओर मन्कलोर जीवा अरयनदिना लोप्पा बाताङ काग़्हन्दुर इनजि नेंड बोन्के तेळियो. मति ओरु येसुना सेतेम कबुरतुन मिळ्हचि, तमाय बुदते काग़्हचि, लोकुरिन लेसिह कींदुर. 19 अद्रम कीतेक तेला, लोतुन मेग़्किह कीयनद जोताता लेह्कान, देवुळता निटम विस्वसिर, विस्वसते मेग़्किस निच मन्ह्तोर. जोतातगा माल्काना पेदिर रासतपु, ओरा ताकमुळ इव पोल्लोङ तोहतह्ता: सामि तना मन्कलोरिन पुन्ह्ता✡ 2:19 गिनती 16:5 ओसो “बोर सामिनोरोम इन्ह्तोर, ओर लाग्वाङ कबस्कनाहि जेक मनिर,” इनजोर तोहतह्ता.
20 इदिन सीता कीम्ह्टु: उंद बेरा लोतगा बंगर-वेंडिनाङ गिनेङ-कस्लाङ मन्ह्ताङ, अहे मराताङ, तोळ्योताङ वने मन्ह्ताङ. बंगरताङ, वेंडटविन, एळ्मतोर वातस्के काळ्ङिह्तोर, दुस्रान बार केनकेनेता कबळतेनाह्क काळ्ङिह्तोर. 21 विस्वसिरा लोप्पा वने इद्रमलेह्काने, बोग़ु लाग्वाङ कबस्कनाहि तन्क सुद्रे कीस्तोग़, ओग़ एळ्मतोर वातस्के काळ्ङनद मादा लेह्कान, तना माल्काल देवुळता कबळतेनाह्क एग़िस मन्ह्तोग़. ओसो देवुळता कबळतुह्क अरयह्तोग़, सबे बेसताङ कबस्क कीयलाह तयर आस मन्ह्तोग़. 22 अदिनेनाह्क लेयोर मन्कलोरगा मनदनव लालुस्कनाहि जेक विता. बेसता विचरते सामिना पेदिरतुन केयवालोरा संगे मनजि, सेतेमते पिसलाह, सामिन विस्वस कीस पिसलाह, जीवा कीसोर मनदलाह, ओर्विह्क-ओर्वोग़ कलियिस मनदलाह पर्ह्का. 23 बुदि लेवव, उगसताङ पोल्लोने गिटोगटो आयनग्डाह जेक मन. अद्रमताङ पोल्लोङ सिरप जग्ळम पुटिह कीस्ताङ इनजोर पुतिने. 24 सामिना सेवक मन्कल जग्ळम आयनद आयो, मति सबेटोर मन्कलोरा संगे कुलुल बुदते मनदना. दुस्रोरिन देवुळता पोल्लो काग़्हतलाह उसर मनदना, तिपलते दीरा पोस मनदना. 25 ओसो विरुद केवालोरिन कुलुल बुदते तेळियिह कीयना; अद्रम कीतेके, देवुळि ओरिन वने पापमता अग़दाहि मल्हचि, सेतेमतुन पुनाह कीतेक कीयग़ा बहे. 26 ओसो नाक विचर वायनद कीयिर इनजोर देयह्कना मुक्याल ओरिन एग़्किह कीस तासता. ओर वने बुदि दोर्किह कीसि, देयह्कना मुक्याना वदताहि पिह्ट अरतेक अरयनुर बहे.