13
देवुळता जीवा बार्नबसिन, सोलुन जेकताङ देसेह्कने लोहता
1 सुरिया पटटा अंताकिया सहरतोरविस्वसिरा मुडगा उय्तुर देवुळता कबुरतोर, ताना पोल्लोतुन काग़्हवालोर मंदुर. ओर बोर आंदुर इतेके, बार्नबस, सिमोन (ओन निगर इतेके कार्यल मन्कल वने इंदुर), कुरेने सहरतोग़ लुकियुस, एरोद अंतिपस राजाना संगे उड्लग्डाह ऐंगेन बेर्सतोग़ ओग़ मनाहेम, ओसो सोलु. 2 उंद दिया ओर देवुळतुन मोळ्कसोरे उपस-पार्तना कीसोर मतोर. अस्के देवुळता जीवा ओरिन इद्रम वेहता इतेके, “नना बार्नबसिन, सोलुन बेद कबळतेनाह्क आचतन, अद कबळतेनाह्क ओरिन मियग्डाह निल्पिह कीम्ह्टु,” इता. 3 इतस्के ओर उपस कीसि, तमाङ कय्किन वेर इर्वुरा पोग़ोन तासिसि पार्तना कीतोर, कीसि देवुळता कबळतेनाह्क ओरिन लोहतोर.
बार्नबस, पोलु, कुपरुस देसेमते कीतद सेवा
4 पया देवुळता जीवा ओरिन ओसीतस्के, इर्वुर आसि अंताकियाताहि सम्दुर कचुदा सिलुकिया इनदनद नाग़ अतोर,* 13:4 अंताकिया सहरताहि सिलुकिया सहर 26 किलोमिटर मता. अनजि अग्डाहि ओडातगा उदिसि कुपरुस देसेमते अतोर.† 13:4सिलुकिया सहरताहि कुपरुस देसेम एवनेके पोळ्द मुलन्दु अचोन जेक मता. कुपरुस देसेम बेरा उंदि तोग़ि मता. ओसो बार्नबस अदे देसेमते पुटटोग़. 5 अनजि अग्डा सलमिस इनदना सहरते एवतोर. पया यहुदिरा पार्तनाताङ लोह्कनगा अनजि देवुळता पोल्लोतुन पोकुर कीतोर. अस्के योहन-मार्कल वने ओरिह्क तोळ ईंदोग़. 6 अद्रमे पया कुपरुस देसेमता उंद दुस्रा बाजेतके अनजि पापुस इनदनद सहरतगा एवतोर.‡ 13:6 पापुस सहर अद कुपरुस देसेमता गुमसिना नाग़ मता. पापुस सहर सलमिस सहरताहि 145 किलोमिटर जेक मता. अगा ओरिह्क ओर्वोग़ पूजर-गूनिङ केवाल बार-येसु पेदिरतोग़ यहुदि मन्कल कलियतोग़. (बार-येसुन, इलिमाल वने इंदुर, युनानि पोल्लोते बार-येसुना पेदिर इलिमा मता.)§ 13:6 यहुदि लोकुरिह्क पूजर-गूनिङ कीयलाह पोलो, मति वेग़ बार-येसु जोल कबळतोग़, लाग्वा बुदतोग़ मताह्कु अद्रम कींदोग़. ओग़ु “नना देवुळता कबुरतोनन,” इनजि लोकुरिन नाळेह कींदोग़. 7 अद देसेमतगा सिरगियु-पोलु पेदिरतोग़ पका तेल्वतोग़ गुमसि मतोग़, ओनाय संगे वेग़ इलिमाल वने मंदोग़. ओग़ गुमसि “देवुळता पोल्लोतुन केंजकन,” इनजोर बार्नबसिन, सोलुन तनगा केयतोग़. 8 मति ओग़ गूनयाल बाताल कीतोग़ इतेके, बार्नबस, सोलु, वेर इर्वुरगा अडम आसि, वेग़ गुमसि येसुन विस्वस कीयनायो इनजोर ओन रोमिह कीसोर मतोग़. 9 अस्के सोलु (ओन पोलु वने इंदुर),* 13:9 इद वचनताहि सोलुना पेदिर पोलु इनजोर मन्ह्ता. वेल्लाटोर यहुदिरिह्क रेंड पेदिर्क मताङ. उंदि यहुदि पेदिर, उंद युनानि पेदिर. सोलुना युनानि पेदिर पोलु आंदु, सोलु इद ओना यहुदि पेदिर आंदु. देवुळता पवित्र जीवाते निंदिसि इलिमान कोंडा मिळ्हवा ऊळिस इद्रम तेर्हतोग़, 10 “ए सत्रल मन्कनिन, पका नाळेमता कबळते निंदतद देयमता लेह्काडोनिन, निमा सेतेमता अडम मह्निन. बह निमा देवुळता सेतेमता पोल्लोतुन मिळ्हतनदिन विळ्सविना? 11 इद ऊळा, देवुळ तना लावते नीक इंजेके सिक्सा ईयना मन्ह्ता, निमा गळ्किह्क तोवविन आयकिन, पोळ्द दींचनद वने नीक दिसो आयग़ा,” इतोग़. पोलु इद्रम इताहे, इलिमानाङ कोंडाह्क गंगा पोसि ईकळ आयलाह आता, ओनाङ कोंडाह्क मुर्तिय दिसो. दिसवाह्क बोग़ाय नावा कयदुन पोस ओयनोग़ इनजोर इके-अके पर्ह्कसोर तिरियिंदोग़. 12 पया इलिमाह्क अद्रम आतदिन गुमसि ऊळिसि येसुन विस्वस कीतोग़, कीसि बार्नबस, पोलु, वेर येसुना पोल्लोतुन काग़्हतदिन केंजिसि बामतोग़.
पोलु, बार्नबस, पिसिदिया एरियाता अंताकिया सहरतगा येसुना कबुर वेहतह्तोर
13 पया पोलु तना तोळतोरा संगे पापुस सहरताहि ओडाते उदिसि, पंपूलिया पटटा पिरगा इनदनद सहरते अतोर. अगा एवनाह योहन-मार्कल ओरा संगे मतोग़. मति पिरगा सहरते एवतस्के ओग़ ओरिन विळ्सिसि येरुसलेमते मल्स अतोग़. 14 पया पोलु, बार्नबस, पिरगा सहरताहि पिसिदिया एरियाता उंद सहरते एवतोर,† 13:14 पिसिदिया एरियाता अंताकिया सहर पिरगा सहरताहि 177 किलोमिटर जेक मता. अद सहरता पेदिर वने अंताकिया आंदु. वारमता पोल्वादियाते देवुळता पार्तनाता लोतगा अनजि अग्डोरा संगे मोळ्कलाह उदतोर. 15 अगा बोरो मोसानाङ अडोना सास्त्रमताहि ओसो देवुळता कबुरतोरा सास्त्रमताहि अर्वतोर. अर्वतापया पार्तनाता लोतुन ताकिह केवालोर मन्कलोर, “दादालोरिर, इगा जमा आतोरेनाह्क बातालाय पोल्लो काग़्हतना मतेके काग़्हचीम्ह्टु,” इनजोर पोलुन, बार्नबसिन ताल्ह्कलाहि लोहतोर.
16 अस्के पोलु तेदिसि, जमा आतोर मन्कलोरिन केमेन मन्ह्टु इनजोर कय तेहतोग़. पया इद्रम इतोग़, “मावोर इस्रयेलतोर यहुदिरिर, ओसो यहुदिरा देवुळतुन मोळ्कवालोर दुस्रा जाततोरिर, केंजाटु.‡ 13:16अद अंताकिया सहरतगा यहुदिर मतोर, ओसो यहुदि आयवोर वने वेल्लाटोर मतोर. यहुदि आयवोर वेल्लाटोर यहुदिरा पार्तनाता लोतगा वासि यहुदिरा देवुळतुन मोळ्किंदुर, यहुदिराङ अडोन माळिंदुर, मति डायना रिवज केवोर. ओरिन यहुदिरा देवुळतुन मोळ्कवालोर इनजोर इंदुर. पोलु वेहता बोटटोग़ अस्के पार्तनाता लोतगा मतोर यहुदिर ओसो यहुदि आयवोर वेर येसुना विस्वसिर आयोर. 17 माटु इस्रयेल मन्कलोरल मोळ्कनद देवुळि मावा पेदामुय्तोरिन आचता. ओर मिसर देसेमतगा दुस्रोरा कय इळ्न मनदह्पा, ओरा बेरा उंदि तेग़मुल कीता, कीसि तना बेरा लावते ओरिन मिसर देसेमताहि पेसिह कीस तता. 18 मावा तादोर-बाबोर देवुळता पोल्लोतुन केंजोर आंदुर, तेला मति जोक-जोक रेंड वीसाङ वर्साङ पेळ्ह्कल बूमतगा ओरिन अय कीता. 19-20 पया कनान§ 13:19-20 इस्रयेल मन्कलोर बेद कनान देसेमते जागा आतोर, अद देसेमतुन पया इस्रयेल देसेम इंदुर. देसेमते मतोर एळुङ जातिनोरिन देवुळि बूळे कीसि, ओरा बूमतुन ‘इद इंजेके मीवा बूमि,’ इनजोर मावा लोकुरिह्क ईता. मावा पेदामुय्तोर मिसर देसेमते जागा आतग्डाह, मावा लोकुरिह्क तमा बूमि दोर्कनाह्जोम, जोक-जोक नालुङ नूह्कना पनास वर्साङ आताङ.
“ताना पया देवुळि ओरिन ताकिह कीयलाहि तग्वाङ केवालोरिन निल्पिह कीता. आक्रितोग़ तग्वाङ केवाल सामुवेल आंदोग़, ओग़ देवुळता कबुरतोग़ वने आंदोग़, ओना वेला एवनाह तग्वाङ केवालोर ओरिन ताकिह कींदुर. 21 सामुवेलना वेलातस्के, ‘माक इंजेक राजाल गावले,’ इनजोर मावा तादोर-बाबोर देवुळतुन ताल्ह्कतोर. अदिह्क देवुळि, बिन्यामिनना कूळतोग़* 13:21 पूरा इस्रयेल देसेम याकुब मुय्तोनग्डाहि पुट वाता, याकुब मुय्तोनाङ बारा मग़्क मतोर. ओरग्डाहि इस्रयेलतोर बारा कूळिनोर पुट वातोर, वीस्रा मग़ना पेदिर बिन्यामिन आंदु. ‘कीस’ पेदिरतोना मग़ि सोलुन ओरेनाह्क निल्पिह कीस ईता. ओग़ रेंड वीसाङ वर्साङ राजेम ताकिह कीतोग़.
22 “पया देवुळि सोलुनग्डाहि राजेम गुंजिसि दाविदिह्क ईता. देवुळि दाविदना लोप्पा बेस-नेह्ना वेहता, ‘यीसाना मग़ि दाविद नाक विचर वातोन नना ऊळतन.✡ 13:22 1 शमूएल 13:14 नना बाताल-बाताल वेहतकन, ओग़ अव सबे कबस्क कीयनोग़,’ इनजि वेहता.
23 “अद्रमे वेल्लाङे वर्साना पया, देवुळि मावा तादोर-बाबोरिन मुनेन करल कीतपु दाविदिनाये सटमते पुट वातोग़ मन्कल येसुन, इस्रयेल मन्कलोरिन पिसिह केवाल इनजोर लोहता. 24 येसु तना कबळ सुरु केवाय, एते मीहवाल योहन सबे इस्रयेल मन्कलोरिन, ‘पापमता अग़दाहि मलसि देवुळता पेदिरते एग़ मीम्ह्टु,’ इनजोर पोकुर कीतोग़. 25 योहन तना कबळतुन मारिह कीयनद वेला एवयह्पा मन्कलोरिन इद्रम इंदोग़, ‘नना बोनन इनजि मीट विचर कीतिर? मीट बोन केपतिर ओग़ नना आयोन, ओग़ पया वायनोग़. नना ओना कादुन इटलाह वने ओपोन,’ इतोग़.
26 “मावोर इस्रयेलतोरिर, अब्रहम मुय्तोना पुळ्गतोरिर,† 13:26 अब्रहम मुय्तोना पुळ्गतोरिर, इतेके इस्रयेल लोकुर आंदुर. यहुदिरा देवुळतुन मोळ्कवालोरिर, येसुसामि लोकुरिन पिसिह कीयनद कबुरतुन मयगाने देवुळि लोहचीता. 27 येरुसलेम मनवालोर यहुदिर ओसो ओरा मुक्यालोर, येसुये पिसिह केवाल इनजोर पुनोर आस मतोर. वारम-वारमता पोल्वादियाते देवुळता कबुरतोरा सास्त्रमतुन अर्विंदुर, मति तान ओर पुनोर. पुनवालेवा येसुन हव्कनाह कीसि, अदे सास्त्रम करल आता. 28 येसुन हव्कना सिक्सा ईयना इद्रम ओना पोग़ोन बातय कसुर दोर्किह कीया पग़वोर. मति पिलाति इनवाल गुमसिनगा अनजि, ‘वेन हव्कनागुटातगा वेळ्हा,’ इनजोर अर्जि कीतोर. 29 अस्के वेल्लाय मुनेन, ‘मन्कलोर देवुळ लोहवाल पिसिह केवान इद्रम-इद्रम कीयनुर,’ इनजोर देवुळता कबुरतोर रासिस मतोर, अव सबे पोल्लोङ करल आताङ. अस्के पया हव्कनागुटाताहि येसुना सेत्तातुन रेहचि गुमयातगा मिसतोर. 30 मति देवुळि ओन हामुरताहि तेग़्किह कीता. 31 येसु हामुरताहि तेग़्कतापया, ओना संगे गालिल पटटाहि येरुसलेम सहरते अंज मतोरिह्क वेल्लाङे दियाङ दिससोर मतोग़. इंजेके ओरे मन्कलोर मावा यहुदि लोकुरा मुनेह येसुना साक्सि मन्ह्तोर. 32 देवुळि मावा तादोर-बाबोरिन वेल्लाय मुनेन करल कीस मता. अदे करलता बेसता कबुरतुन इंजेके माट वने मीकु वेहतलाह आतोम. 33 इद्रमे देवुळि येसुन जीवा अर्हनाह कीसि, मावा तादोर-बाबोरा संगे मुनेन कीतद करलतुन, मयेनाह्क इंजेके निटम आनाहि कीता. इदु, देवुळताङ पाटाना पुस्तकता पाटा 2 तगा इद्रम रासतद मन्ह्ता इतेके,
‘निमा नावा मग़निन,
नेंडे नना नीवा तपेनन आतन,’✡ 13:33 देवुळताङ पाटाङ 2:7
इनजोर रासतद मन्ह्ता. 34 डोलिस मतोग़ किर्स्तुन, देवुळि जीवा अर्हचीता, तानापया ओग़ बेस्केन डोलोग़. इद पोल्लोतुन देवुळि मावा तादोर-बाबोरिन मुनेन वेहच मता. देवुळि ओरिन वेहतद पोल्लो इद्रम रासतद मन्ह्ता इतेके,
‘नना मीक बर्कत ईकन इनजि दाविदिन करल कीस मतन अद करल सेतेम मन्ह्ता, मियेनाह्क मन्ह्ता,’✡ 13:34 यशायाह 55:3
इनजोर वेहता. 35 अदिह्क देवुळताङ पाटाना पुस्तकतग्डा ओसो उंद पाटाते दाविद राजाल देवुळतुन इद्रम इतोग़,
‘नीवा पवित्र सेवकिना सेत्तातुन कळिय एविन आयकिन,’✡ 13:35 देवुळताङ पाटाङ 16:10
इतोग़. 36 पवित्र सेवकिनन इनजोर दाविद तन्क इनोग़ इनजि माट पुतल, बाराह्क इतेके, दाविदि तना वेलाते, देवुळि ओन्क ईतद कबळतुन मारिह कीसि डोलतोग़. डोलतस्के ओनाङ तादोर-बाबोराङ सेत्तानु बेगा मिसतोर अगान ओना सेत्तातुन वने मिसतोर, अस्के ओना सेत्ता कळियता. 37 मति देवुळि जीवा अर्हचीतोग़ येसुना सेत्ता कळियो.
38 “अदिह्क मावोरिर, इद पोल्लोतुन पुन्ज मन्ह्टु, इद्रम देवुळि येसुना मेटे मीवा पापमतुन मापि कीयग़ा इनजि माट मीकु वेहतलाह आतोम. 39 मोसानाङ अडोङ माळतेके मीकु पापमताहि मापि दोर्को आयग़ा, मति सबेटोर येसुन विस्वस केवालोरिह्क तमा पापमताहि मापि दोर्कग़ा. 40-41 देवुळता कबुरतोर मुनेन ताना पोल्लोतुन केंजवोरिह्क इद्रम रासतोर इतेके,
देवुळ इन्ह्ता, ‘इद ऊळाट नावा पोल्लोतुन पास्कवालोरिर,
नावा नेयमतस्के मीट बामिस डोलकिर,
बाराह्क इतेके, मीवा वेलाते नना इद्रमता कबळ कीकन इतेके,
बोग़ाय वासि मीकु तेळियिह कीतेके,
नना इद्रम कीकन इनजि मीट मुर्तिय विस्वस केविर आयकिर,’ इनजोर देवुळि वेहता,✡ 13:40-41 हबक्कूक 1:5
इनजि रासतद मन्ह्ता. ओर रासतद सिक्साता लेह्का मीक आयमाकि इनजि तेळियिस मन्ह्टु,” इनजोर वेहचि पोलु रोमतोग़.‡ 13:40-41 येसुन विस्वस केवेके ओरिह्क सिक्सा दोर्कग़ा इनजि पोलु इद्रम वेहतोग़.
42 पया पोलु, बार्नबस पार्तनाता लोताहि पेसिस वातस्के, “इव पोल्लोङ वायना वारमता पोल्वादिया वने माक वेहाटु,” इनजोर अगा जमा आस मतोर ओरिन अर्जि कींदुर. 43 मोळ्कनग्डाह लेङतस्के, वेल्लाटोर यहुदिर, ओसो यहुदि दर्मते ओळियतोर दुस्रा जाततोर पोलुना, बार्नबसिना पयाह-पयाह अतोर. अतस्के वेर इर्वुर ओरा संगे गोटिङ कीसोर, ओरिन “देवुळि मीकु ईयनद दयातुन नमसोर मन्ह्टु,” इनजोर वेहतोर.
44 पया दुस्रा वारमता पोल्वादियाते देवुळताङ पोल्लोङ केंजलाहि, पार्तनाता लोतगा, जोक-जोक पूरा नाटेनोर इतपे जमा आस मतोर. 45 मति वेल्ला मुडुन ऊळिसि यहुदि मुक्यालोरा जीवा कर्वता, कर्वतस्के पोलुन पास्किस ओग़ इतव पोल्लोना विरुद वळ्ह्कतोर. 46 मति पोलु, बार्नबस मुर्तिय रेयवालेवा इतोर, “मावोरिर, मीक यहुदिरिह्के देवुळता पोल्लोतुन मुने वेहतना मता, मति मीट कोनि तान पास्किसि, अमेसाता पिसमुळतुन दोर्किह कीयना लेह्काडोर आयविर इनजि तोहतिर. अदिह्क इंजेके माट इगा यहुदि आयवोरगा दाय्ह्नोम. 47 देवुळि माक इद्रम उकुम ईता इतेके,
‘नना लोकुरिन बेद्रम पिसिह कीय्ह्नन इनजोर निमा दुनियामेटोरिन वेहतकिन इनजि,
नना नीक दुस्राङ जातिनोरेनाह्क वेह्च तोहवानिन आयकिन इनजोर निल्पिह कीतन’✡ 13:47 यशायाह 49:6
इनजोर उकुम ईता,” इनजोर इतोग़. 48 इदिन केंजिसि अग्डोर यहुदि आयवोर पका गिर्दा आसि देवुळता कबुर बेसता इनजोर इंदुर. अमेसाता पिसमुळतुन दोर्किह कीयिर इनजोर बय्तुरिन देवुळि मुनेन आचिस मता, अय्तुर येसुन विस्वस कीतोर.
49 अद्रमे पया लोकुर येसुना पोल्लोतुन पिसिदिया एरियाताङ वेल्लाङे नाह्कनगा पोकुर कीतोर. 50 मति सहरतगा, यहुदिरा देवुळतुन मोळ्कनव कदर दोर्कनाङ आस्क मताङ. अविनु ओसो सहरतोर पेदल्किन यहुदिर ओङ तेग़्हचीतोर, तेग़्ह्चीतस्के सबेटोर कलियिसि पोलुन, बार्नबसिन तिपल कीसि तमा एरियाताहि ओरिन पूंडटोर. 51 अस्के “देवुळ मीवा पोग़ोन सिक्सा अर्हतग़ा” इदिन तोहतलाहि पोलु, बार्नबस, तमाङ काल्कनगा तुंडिस मतद दुरातुन ओरा मुनेह दुल्पतोर, दुल्पिसि इकुनियुम इनदनद सहरते अतोर.§ 13:51 इकुनियुम सहर गलत्या पटटे मता, पिसिदिया एरियाता अंताकिया सहरताहि 130 किलोमिटर जेक मता. 52 मति पिसिदिया एरियाता अंताकिया सहरतोर विस्वसिर देवुळता पवित्र जीवाते निंदिसि, दिनम बेस गिर्दाते मंदुर.
*13:4 13:4 अंताकिया सहरताहि सिलुकिया सहर 26 किलोमिटर मता.
†13:4 13:4सिलुकिया सहरताहि कुपरुस देसेम एवनेके पोळ्द मुलन्दु अचोन जेक मता. कुपरुस देसेम बेरा उंदि तोग़ि मता. ओसो बार्नबस अदे देसेमते पुटटोग़.
‡13:6 13:6 पापुस सहर अद कुपरुस देसेमता गुमसिना नाग़ मता. पापुस सहर सलमिस सहरताहि 145 किलोमिटर जेक मता.
§13:6 13:6 यहुदि लोकुरिह्क पूजर-गूनिङ कीयलाह पोलो, मति वेग़ बार-येसु जोल कबळतोग़, लाग्वा बुदतोग़ मताह्कु अद्रम कींदोग़.
*13:9 13:9 इद वचनताहि सोलुना पेदिर पोलु इनजोर मन्ह्ता. वेल्लाटोर यहुदिरिह्क रेंड पेदिर्क मताङ. उंदि यहुदि पेदिर, उंद युनानि पेदिर. सोलुना युनानि पेदिर पोलु आंदु, सोलु इद ओना यहुदि पेदिर आंदु.
†13:14 13:14 पिसिदिया एरियाता अंताकिया सहर पिरगा सहरताहि 177 किलोमिटर जेक मता.
‡13:16 13:16अद अंताकिया सहरतगा यहुदिर मतोर, ओसो यहुदि आयवोर वने वेल्लाटोर मतोर. यहुदि आयवोर वेल्लाटोर यहुदिरा पार्तनाता लोतगा वासि यहुदिरा देवुळतुन मोळ्किंदुर, यहुदिराङ अडोन माळिंदुर, मति डायना रिवज केवोर. ओरिन यहुदिरा देवुळतुन मोळ्कवालोर इनजोर इंदुर. पोलु वेहता बोटटोग़ अस्के पार्तनाता लोतगा मतोर यहुदिर ओसो यहुदि आयवोर वेर येसुना विस्वसिर आयोर.
§13:19-20 13:19-20 इस्रयेल मन्कलोर बेद कनान देसेमते जागा आतोर, अद देसेमतुन पया इस्रयेल देसेम इंदुर.
*13:21 13:21 पूरा इस्रयेल देसेम याकुब मुय्तोनग्डाहि पुट वाता, याकुब मुय्तोनाङ बारा मग़्क मतोर. ओरग्डाहि इस्रयेलतोर बारा कूळिनोर पुट वातोर, वीस्रा मग़ना पेदिर बिन्यामिन आंदु.
✡13:22 13:22 1 शमूएल 13:14
†13:26 13:26 अब्रहम मुय्तोना पुळ्गतोरिर, इतेके इस्रयेल लोकुर आंदुर.
✡13:33 13:33 देवुळताङ पाटाङ 2:7
✡13:34 13:34 यशायाह 55:3
✡13:35 13:35 देवुळताङ पाटाङ 16:10
✡13:40-41 13:40-41 हबक्कूक 1:5
‡13:40-41 13:40-41 येसुन विस्वस केवेके ओरिह्क सिक्सा दोर्कग़ा इनजि पोलु इद्रम वेहतोग़.
✡13:47 13:47 यशायाह 49:6
§13:51 13:51 इकुनियुम सहर गलत्या पटटे मता, पिसिदिया एरियाता अंताकिया सहरताहि 130 किलोमिटर जेक मता.