6
वारमता पोल्वादियाता लोप्पा कट्ला
(मत्याल 12:1-8; मार्कल 2:23-28)
1 उंद देबा इद्रम आता इतेके, येसु वारमता पोल्वादियाते, गोह्क अय्स मतव बोराङो पोलह्कना नडुमतुह्क अनजोर मतोग़. दायह्पा येसुनाङ कग़यवालोर गोह्कनाङ एन्किन ऊचिसि, पोलेतुन तेंडलाहि कय्कने तुर्स्किसि पेनेह्क तिंदुर. 2 तेन ऊळिसि अगा मतोर उय्तुर परुसिर येसुन इतोर, “पोल्वादियाते बेदे कबळ कीयलाह पोलो, तान मीट बह नोमविर?” इनजोर ओरिन कट्ला कीतोर. 3 अस्के येसु इद्रम इतोग़, “मुनेटा कालमते दाविद राजाल तनाङ ऐंगेटोर बार, कग़्व वसतस्के बह कीतोर? 4 ओरु देवुळता रावुळतगा बह अतोर, अगा देवुळतुह्क वाटटाङ आरिङ बूमयालोरिन विळ्सिस, दुस्रोरिह्क तिंदलाह पोलो आंदु.✡ 6:4 लैव्यव्यवस्था 24:9 पोलवेकाय अवे आरिन बूमयालोर ओरिह्क तिनदलाह ईतोर, तेन मीट देवुळता सास्त्रमते बेस्केन अर्वविरा? अस्के देवुळि दाविद राजानु ‘तपतिन’ इनो अले,” ✡ 6:4 1 शमूएल 21:1-6 इतोग़. 5 ओरिन ओसो इतोग़, “नना माने-मन्कना नडुम पुटटोनन आंदन, पोल्वादियाते पोलनदिन, पोलवदिन वेहतनद अदिकर नाक मन्ह्ता,” इनजोर इतोग़.
वाग़ता कयदोन येसु सव्रे कीस्तोग़
(मत्याल 12:9-14; मार्कल 3:1-6)
6 अद्रमे ओसो उंद देबा, येसु पोल्वादियाते यहुदिरा उंद पार्तनाता लोन अनजि काग़्हतलाह आतोग़. अगा ओर्वोग़ वाग़ता कयदोग़ मतोग़. 7 अद लोतगा उय्तुर सास्त्रमगूरुर ओसो परुसिर, पोल्वादियाते ओग़ मन्कना कयदुन येसु सव्रे कीस्तोग़ा, बार केवोग़ा, इनजोर ऊळसोर मंदुर. सव्रे कीतोग़ इतेके माट पोल्वादियाते येसुना कबळ कीयनद तप तोहतकोम इनजोर इंदुर.* 6:7 परुसिराङ अडोङ मतपु, मन्कन सव्रे कीयना इद वने उंदि कबळलेह्कान आंदु, अदिह्क अदु पोल्वादियाते कीयलाह पोलो आंदु. मति देवुळता सास्त्रमते अद्रमता अडो वेहतद इले. 8 मति येसु मात्रम ओरा पोटालोप्पाडाङ पोल्लोन पुतोग़. पुनजि ओग़ वाग़ता कयदोनु, “नडुम वास निल्म!” इतोग़, इतस्के ओग़ तेदिस नडुम नितोग़. 9 ओग़ मन्कल तेदतस्के येसु अगा मतोरिन इतोग़, “नना उंद पोल्लो मीक ताल्ह्किह्नन, पोल्वादियाते बाताल पोलिह्ता? बेसता कबळ कीयनदा, बार लाग्वा कबळ कीयनदु? जीवातुन पिसिह कीयनदा, बार बूळे कीयनदु? वेहाट!” इतोग़. 10 येसु सबेटोरके ऊळतोग़, मति बोग़े बह वळ्ह्कोग़. वळ्ह्कवाह्कु वाग़ता कयदोन इतोग़, “नीवा कय आहा!” इताहे ओग़ तना कयदुन आहतोग़. आहतस्के ओना कय पूरा सव्रेम आता. 11 मति सास्त्रमगूरुर ओसो परुसिर पका ओङ आसि पलत पेसिस, येसुन बह कीस हव्ककल इनजोर तम-तमाय वळ्ह्किंदुर.
येसुनाङ बारा बळयिर
(मत्याल 10:1-4; मार्कल 3:13-19)
12 पया उंद दिया देवुळता संगे वळ्ह्कलाह येसु उंद गुड्रातगा अतोग़. अनजि नग़्का पिळ्विळ देवुळतुन पार्तना कीतोग़. 13 पङवियतस्के कग़यवालोर सबेटोरिन तनगा केयतोग़. केयिसि ओरग्डाह बारा मन्कलोरिन आचतोग़, आचिसि ओरिन तनाङ बळयिर इनजोर पेदिर तासतोग़. 14 ओर बारा मन्कलोराङ पेदिर्क इह मन्ह्ताङ: सिमोन (वेन पत्रु इनजोर येसु दुस्रा पेदिर तासिस मतोग़),✡ 6:14 योहन 1:42 सिमोनना तमोग़ आंद्रेयाल, जेबेदिनाङ मग़्कु याकुब ओसो योहन वेर तमोग़ इर्वुर, पिलिप, बार्तोलोम, 15 मत्याल (सिद्वा एनवाल लेवि, ओन मत्याल वने इंदुर), तोमाल, अल्पुना मग़ि याकुब, सिमोन (वेग़ रोम सर्करता अडम पार्टितोग़ मतोग़). 16 तदु इनवाल यहुदाल,† 6:16 वेग़ यहुदाना दुस्रा पेदिर तदु मता (मत्याल 10:3; मार्कल 3:18). वेना तपेना पेदिर वने याकुबिय मता. ओसो केर्योत नाटेनोग़ यहुदाल (वेग़े आक्रिते येसुन कोंटेतोरा कयदे पोसीतोग़).
येसु रोगह्लोरिन सव्रे कीस्तोग़
(मार्कल 3:7-12)
17 पया येसु ओरा संगे गुड्रा पोग़ोटाहि रेगिसि, गुड्रा कचुदा पलातगा नितोग़. अगा ओनाङ कग़यवालोर वेल्लाटोरे मतोर. ओसो येरुसलेम सहरताहि, यहुदिरा बूमताङ दुस्राङ नाह्कनाहि, सम्दुर कचुदा सोर-सिदोन एरियाताहि, वेल्लाटोर लोकुर ओनगा जमा आस मतोर. 18 जमा आतोरग्डाहि उय्तुर ओग़ वेहतनाङ पोल्लोङ केंजलाह वास मतोर. उय्तुर बार तमाङ रोगह्कनाहि सव्रेम आयलाह वास मतोर. देयह्क पोस मतोर वने वासि सव्रेम आंदुर. 19 देवुळताहि सव्रे कीयनद लाव येसुनगा मताह्कु, ओग़ सबेटोरिन सव्रे कीसोर मतोग़. अदिनेनाह्क सबेटोर ओन बोयलाह ऊळिंदुर.
देय्वातोर बोरु, देय्वा लेवोर बोरु
20 पया येसु तनाङ कग़यवालोरिन ऊळिस इद्रम इतोग़,
“बोर लेवोरिर मह्निर, मीट देवुळता देय्वातोरिर.
देवुळबाबाल मियद्रमतोरिह्के राजाल आस्तोग़.✡ 6:20 मत्याल 5:3
21 बोर इंजेक कग़्विह्क तिपलते मह्निर, मीट देवुळता देय्वातोरिर.
देवुळि मीक पंजिह कीयग़ा.✡ 6:21 मत्याल 5:6
बोर इंजेके अळसोर कनिर पोहतह्निर, मीट देवुळता देय्वातोरिर.
पेग़्के मीट गिर्दाते कवयकिर.✡ 6:21 मत्याल 5:4
22 “माने-मन्कना नडुम पुटटोनाङ मीट कग़यवालोरिर मताह्कु, लोकुर मीकु कोंटे कीयनुर, मीकु पूंडिस ईयनुर, मीकु पास्कनुर, मीक लागोर इनजोर मीवा कदर रेहतनुर, अस्के मीट देवुळता देय्वातोरिर. 23 बोर मीवा विरुद मन्ह्तोर, वेराङ तादोर-बाबोर वने अद्रमलेह्काने मुनेतोर देवुळता सेतेम कबुरतोरिन तिपल कीतोर, इदिन सीता कीम्ह्टु. केंजाट, ओर कबुरतोरा लेह्का मीक वने देवुळदीपते बेरा इनम दोर्कग़ा. अदिह्क मीक तिपल कीयनस्के, मीट गिर्दाते एंदना-पाग़ना कीम्ह्टु,”✡ 6:23 मत्याल 5:12 इनजोर इतोग़.
24 येसु ओसो इद्रम इतोग़, “ए मता मन्कलोरिर! मीट देवुळता देय्वालेवोरिर. बाराह्क इतेके इद बूमतगा मीवा मालसोमता सुकम, अचोने मीक दोर्कग़ा! 25 इंजेके तिंड-बंड मनवालोरिर! मीट देवुळता देय्वालेवोरिर, पेग़्के मीट कग़्वते मनदकिर. इंजेके कवयलाह आतोरिर! मीट देवुळता देय्वालेवोरिर, पेग़्के मीट आलिह कीस अळयकिर. 26 इंजेके सबेटोरा कदर दोर्किह केवालोरिर! मीट देवुळता देय्वालेवोरिर. बोर मीक कदर ईस्तोर वेराङ तादोर-बाबोर वने मुनेतोर जोल कबुरतोरिह्क अद्रमे कदर ईन्दुर. वेर जोल कबुरतोरा लेह्का मीक वने सिक्सा दोर्कग़ा.
कोटुलतोरिन जीवा कीयना
27 “इंजेके नावा पोल्लोतुन केंजिस ताकवालोरिर, मीक नना बाताल वेहतह्नन, बेस केंजाटु. मीवा विरुदतोरिन जीवा कीम्ह्टु. मीक कोटुल केवालोरिन बेस ऊळाटु. 28 बोर मीकु सरप ईस्तोर, ओर बेस पिसिर इनजोर देवुळतुन कोळ्व कीसोर ताल्ह्काटु.✡ 6:28 मत्याल 5:44 बोर मीकु तिपल कीस्तोर, ओरेनाह्क देवुळतुन पार्तना कीम्ह्टु. 29 बोग़ाय नीवा उंद बुकातुन चापुळ ईतेके, दुस्रा बुकातुन वने चापुळ ईयलाह मुनेह कीमु. ओसो बोग़ाय अग़-ओङते निमा पोग़ोट्क केग़तद कोटजगातुन तेंडिस ओतेके, ओन्क नीवा आङतुन वने ओयलाह ईमु. 30 बोग़ाय नीक बातालाय ताल्ह्कतेके, ओन्क अद ईमु.✡ 6:30 मत्याल 5:42 ओसो बोग़ाय नीवा मालसोमतुन ओतेके, नावा नाक मल्हच ईम इनजोर ताल्ह्कमा. 31 लोकुर मीवा संगे बेद्रम ताकना इनजि मीवा विचर मन्ह्ता, अद्रमे मीट ओरा संगे ताकाटु.✡ 6:31 मत्याल 7:12
32 “बोर मीक जीवा कीस्तोर, सिरप ओरिने मीट जीवा कीतिर इतेके मीक देवुळि बाताल पाय्दा ईयग़ा? देवुळतुन पुनवोर पापिर वने अहे कीस्तोरा, केवोरा?✡ 6:32 मत्याल 5:46 33 अद्रमे मीक बेस ऊळवालोरिह्के मीट बेसताङ कबस्क कीस ईतेके, तानेनाह्क वने देवुळि मीक बाताल पाय्दा ईयग़ा? देवुळतुन पुनवोर पापिर वने अहे कीस्तोरा, केवोर? 34 मीटु करा ईयनस्के, ओसो वने मल्हच एवालोरिह्के करा ईतेके, तानेनाह्क देवुळि मीक बाताल पाय्दा ईयग़ा?✡ 6:34 मत्याल 5:42 देवुळतुन पुनवोर पापिर वने तमा ईतद करा पूरा मल्स दोर्कग़ा इनजोर पुनजि, ओर्विह्क-ओर्वोग़ करा ईस्तोर. 35 अद्रम केवा, मीवा विरुदतोरिन वने जीवा कीम्ह्टु, ओरिह्क बेसताङ कबस्क कीसीम्ह्टु. ओसो मल्स दोर्कग़ा इनजोर सीता केवालेवा करा ईम्ह्टु. अस्के देवुळि मीकु बेरा इनम ईयग़ा, मीटु सबेट्काय बेरा देवुळताङ मग़्क-मयास्क आयकिर. बाराह्क इतेके देवुळता सीता केवोरा ओसो लाग्वोरा पोग़ोन वने देवुळि गूनम तोहतह्ता. 36 बेद्रम मीवा देवुळबाबाल लोकुरिन दया कीस्तोग़, अद्रम मीट वने दया केवालोरिर आम्ह्टु.
दुस्रोरिन तप तोहतना आयो
37 “दुस्रोरा तप तोहमाटु, तोहतिर इतेके देवुळ वने मीवा तप तोहतग़ा.✡ 6:37 मत्याल 7:1 दुस्रोनु कसुरतोनिन इनजोर इनमाटु, इनवेके देवुळि मीक वने कसुरतोरिर इनो आयग़ा. दुस्रोरिन मापि कीम्ह्टु, कीतेके देवुळि मीक वने मापि कीयग़ा. 38 दुस्रोरा गर्ज मतेके, ओरिह्क चिव्टम आयवालेवा ईम्ह्टु, ईतेके देवुळि मीक वने ईयग़ा. बेसतल बुदतोर साव्कर्क, गोट्टातुन निहच कोग़िस-कोग़िसि, नेल पोवनाह मेल्हचि मीवा जोर्कातगा वळयनुर, अद्रमलेह्का मीक ईयग़ा. अहे बेद गोट्टाते मीट दुस्रोरिह्क कह्च ईय्ह्निर, अदे गोट्टाते देवुळि मीक कह्च ईयग़ा,”✡ 6:38 मत्याल 7:2; मार्कल 4:24 इनजोर इतोग़.
39 ओसो येसु इद्रमता पुन्पिह कीयनद पीटो वेहतोग़, “बोग़ाय गुडि, दुस्रोग़ गुडिन अग़ तोहचीया पग़यह्तोग़ा? बह वेर इर्वुर आसि बोंदातगा अरवोर आयनुरा?✡ 6:39 मत्याल 15:14 40 बोग़ाय कग़यवाल तना गूरुह्क वीळिस बेस्केन बेरोग़ आयोग़, पुनविर? मति गूरुनाङ पूरा कग़यिसि, ओग़ कग़यवाल गूरुना लेह्कान आस्तोग़.
41 “निमा नीवा कोंडाते मनदनद इळ्पेलेह्काडा बेरा तपतुन सीता केवा, नीवा गोतयाना कोंडाता पोडलेह्काडा इचीटा तपतुन बाराह्क ऊळिह्निन? 42 आपुना कोंडाता बेरा इळ्पेतुन ऊळवा, ‘नीवा कोंडाता पोडि नाक तेंडलाह ईम,’ इनजि निमा नीवा गोतयान बह इनदा पग़यकिन? एय सोङ केवानिन! मुने निमा नीवा कोंडाता इळ्पेतुन तेंडा. ताना पया नीवा गोतयाना कोंडाता पोडि तेंडलाह बेस ऊळ पग़यकिन.✡ 6:42 मत्याल 7:3-5
मन्कना बुदि बेद्रम, ओना कीयनद कबळ अद्रम
43-44 “सबे मराङ तमाङ कायानग्डाहे पुनदा वास्ताङ. बेदे बेसतल मरा लाग्वाङ कायाङ आदो. अहे करबता मरा बेसताङ कायाङ आदो. लोकुर कोयेना जपताहि तोया पंडिङ कोयोर. अहे लिंगुळ आपाना जपताहि रेंगाबेद्रिङ कोयोर.✡ 6:44 मत्याल 7:16 45 बेसतोग़ मन्कल तना पोटाताहि बेसताङ पोल्लोङ पेसिह कीस्तोग़. अद्रमे लाग्वोग़ मन्कल तना पोटाताहि लाग्वाङ पोल्लोङ पेसिह कीस्तोग़. बाराह्क इतेके मन्कना पोटातगा मुनेताहि बेव पोल्लोङ निंदिस मन्ह्ताङ, अवे पोल्लोङ ओना तोडटाहि पेसिह्ताङ.✡ 6:45 मत्याल 12:34,35
रेंड रीतिनाङ लोह्क
(मत्याल 7:24-27)
46 “नना वेहतनव पोल्लोन केंजविर इतेके, नाक बाराह्क ‘सामि, सामि’ इह्निर?✡ 6:46 मत्याल 7:21 47 बोग़ नयगा वासि, नावाङ इव पोल्लोङ केंजिसि, अहे ताकिह्तोग़, ओग़ मन्कल बेद्रमतोग़ आंदोग़, इदिन नना मीक वेहतह्नन, केंजाटु. 48 ओग़ मन्कल बेद्रमतोग़ इतेके, तना लोन दोहतह्पा पर्पा जागातगा वेल्लाह नालिङ तर्विसि, पाय्वाङ दोहचि लोन तेहतोग़. तेहतापया उड्रा वाता ओसो एताङ लच्काङ वने वासि लोतुन दल्गताङ, तेला मति अद लोन मुटो, बाराह्क इतेके तानाङ पाय्वाङ पर्पा जागाते दोहतव मताङ. 49 मति बोग़ नावा पोल्लोतुन केंजिसि, अह ताकोग़, ओग़ इद्रमतोग़ मन्कल आंदोग़ इतेके, तना लोन दोहतह्पा पाय्वाङ दोहवाये ओरेहे तोळ्योतगा लोन तेहतोग़. तेहतापया उड्रा वासि लोतुन दल्गता, अस्के अद लोन मुटिस पूराय बूळेम आता,” इनजोर येसु ओरिन इतोग़.
✡6:4 6:4 लैव्यव्यवस्था 24:9
✡6:4 6:4 1 शमूएल 21:1-6
*6:7 6:7 परुसिराङ अडोङ मतपु, मन्कन सव्रे कीयना इद वने उंदि कबळलेह्कान आंदु, अदिह्क अदु पोल्वादियाते कीयलाह पोलो आंदु. मति देवुळता सास्त्रमते अद्रमता अडो वेहतद इले.
✡6:14 6:14 योहन 1:42
†6:16 6:16 वेग़ यहुदाना दुस्रा पेदिर तदु मता (मत्याल 10:3; मार्कल 3:18). वेना तपेना पेदिर वने याकुबिय मता.
✡6:20 6:20 मत्याल 5:3
✡6:21 6:21 मत्याल 5:6
✡6:21 6:21 मत्याल 5:4
✡6:23 6:23 मत्याल 5:12
✡6:28 6:28 मत्याल 5:44
✡6:30 6:30 मत्याल 5:42
✡6:31 6:31 मत्याल 7:12
✡6:32 6:32 मत्याल 5:46
✡6:34 6:34 मत्याल 5:42
✡6:37 6:37 मत्याल 7:1
✡6:38 6:38 मत्याल 7:2; मार्कल 4:24
✡6:39 6:39 मत्याल 15:14
✡6:42 6:42 मत्याल 7:3-5
✡6:43-44 6:44 मत्याल 7:16
✡6:45 6:45 मत्याल 12:34,35
✡6:46 6:46 मत्याल 7:21