1 Lau inai Paulo, Keriso Iesu ena aposetolo tauna. Inai dagi lau karaia noho iseda Hamauria Diravana bona Keriso Iesu edia oda dainai. Keriso be iseda guba mauri do ita abia, ita naria noho ena laloa namona dalana. 2 Timoteo e, oi be lauegu natuna korikori, Iesu oi badinaia dainai.

Inai revareva lau torea oi dekenai, bona lau ura iseda Tamana Dirava bona Keriso Iesu, iseda Lohiabada dekena amo hariharibada bona bogahisihisi, bona maino do oi abia.

3 Makedonia dekenai lau lao dainai, oi lau noia, Efeso dekenai do oi lao, bona unuseni do oi noho. Tau haida unuseni ese hadibaia hereva koikoi idia gwauraia noho. Oi ese edia gaukara do oi hadokoa. 4 Oi ese idia do oi hamaoroa, hadibaia koikoi, gori bona sene taudia edia ladana tahua herevadia do idia hadokoa. Badina laloa inai bamona ese hepapahuahu sibona idia havaraia. To Dirava ena gaukara be abidadama dekena amo ia tubu noho. 5 Lauegu oda ena anina korikori be, lau ura lalokau do ia vara, laloa goevagoeva, laloa maoromaoro bona abidadama korikori dekena amo. 6 Haida ese inai bamona kara namodia idia rakatania vadaeni. Unai dainai hereva kavakava idia gwauraia noho. 7 Idia ura Dirava ena taravatu hadibaia gaukara idia karaia, to edia hereva edia anina, bona idia hereva goadagoada gaudia edia anina, idia diba lasi.

8 Ita diba Taravatu be namo, bema tau ta ese do ia gaukaralaia maoromaoro neganai. 9 To inai danu ita diba be namo: Taravatu be kara maoromaoro taudia totona lasi. Lasi, Taravatu be inai bamona taudia totona: Taravatu negea taudia, kerere taudia, Dirava gari henia lasi taudia, kara dika taudia, guriguri kara ura lasi taudia, mai edia lauma lasi taudia, tamadia o sinadia idia alaia taudia, ala-ala taudia. 10 Sihari kava taudia, tatau ese tatau danu sihari karaia taudia, taunimanima idia henaoa taudia, koikoi taudia, kota lalonai hereva koikoi taudia. Oibe, Taravatu be inai bamona taudia totona, bona ekalesia ena hadibaia hereva momokani idia negea taudia danu. 11 Unai hadibaia hereva momokani, be Namo Herea Momokani bona Hairai Diravana ena Sivarai Namona. Bona unai Dirava ese iena Sivarai Namona gwauraia tauna lau ia halaoa vadaeni.

12 Iseda Lohiabada Keriso Iesu ese lau dekenai siahu ia henia, badina ia laloa lau be hegeregere iena gaukara do lau karaia. Vadaeni ia ese lau ia abia hidi, iena hesiai tauna ta. Unai dainai lau tanikiu henia. 13 Momokani, gunaguna lau ese Keriso lau hereva dika henia, lau dagedage henia, bona iena ladana lau hadikaia. To Dirava ese lau ia bogahisihisi henia, badina be abidadama lau do diba lasi, bona egu kara ena dika lau do diba lasi dainai. 14 Oibe, iseda Lohiabada ese iena hariharibada bada herea lau dekenai ia henia. Vadaeni abidadama bona lalokau lau davaria, Keriso Iesu lalonai ita noho neganai ita davaria gaudia be unai.

15 Inai lau gwauraia hereva be momokani herea, bona taunimanima ese idia dae bona hamomokania be namo: Keriso Iesu be tanobada dekenai ia mai, be kara dika taudia hamauria totona. Bona kara dika tau dikana momokani be lau inai. 16 To Dirava ese lau ia bogahisihisi henia ena badina be inai: Keriso ia ura iena haheauka, be lau dekena amo do ia hedinaraia namonamo, taunimanima ibounai edia vairana dekenai. Vadaeni egu kara dika bada Keriso ese ia gwauatao, be idia itaia neganai, idia danu ia do idia abidadama henia, bona iena mauri hanaihanai do idia davaria. 17 Dirava be Noho Hanaihanai King, ia mase diba lasi, matana dekenai ita itaia diba lasi, ia sibona mo be Dirava. Ia do ita matauraia, bona ia do ita hanamoa bada, harihari ia lao bona hanaihanai. Amen.

18 Lauegu natuna Timoteo e, oda oi dekenai lau henia be inai: Dirava ena tuari lalonai do oi tuari namonamo, peroveta hereva gunana ese oi ia herevalaia hegeregerena. 19 Inai tuari lalonai, abidadama bona laloa maoromaoro do oi dogoatao auka. Haida be laloa maoromaoro dekena amo idia raka siri vadaeni. Unai dainai edia abidadama ia dika, vanagi be davara nadi dekenai ia kamokau, bona ia dika bamona. 20 Inai bamona idia karaia vadaeni taudia rua be inai: Humenaio bona Alesana. Idia ruaosi be Satani ena imana dekenai lau henia, panisi do idia abia totona. Dirava ena ladana do idia hadikaia lou lasi.