1 TOTECO, nelía momiyaquilíaj nocualancaitacahua.

Quena, nelmiyaqui motananaj para techtehuise.

2 Miyaqui quiijtohuaj para ta amo quema techpalehuis.

3 Pero TOTECO, ta techyahualohua para techmanahuis.

Ta cati techhueyitalía huan san ta cati tihueli techyolchicahua.

4 Chicahuac nimitztzajtzili, TOTECO,

para techpalehuis.

Huan ta technanquili hasta campa tionitztoc nepa ipan motepe cati tatzejtzeloltic.

5 Yeca nimotejqui huan cuali nicochqui.

Huan quema niisac,

amo teno nopantitoya pampa ta, TOTECO, techmocuitahuía.

6 Ama ayecmo nechmajmatise masque majtacti mil nocualancaitacahua nechyahualose para nechtehuise.

7 Ximotanana, TOTECO.

Techmaquixti, ta tinoTeco Dios.

Chicahuac xiquinmaquili nochi nocualancaitacahua ipan inixayac.

Xiquintanpojpostequi nopa mosisinijca masehualme,

para tamis nochi ininchicahualis huan amo teno huelis nechchihuilise.

8 San ta, TOTECO, hueli titemaquixtía.

Hueyi paquilisti quipiyaj nochi momasehualhua.