1 TOTECO, xijtacaquili nocamanal.

Xijchihuili cuenta quema niaxti.

2 Ta tinoTeco Dios cati tiitztoc tinotanahuatijca, techtacaquili quema nimitztajtanía techpalehui,

pampa amo aqui seyoc nijtajtanía.

San nimotatajtía ica ta.

3 Sese ijnaloc nelcualca nimitzpohuilía cati nopanti, TOTECO.

Mojmosta nimitztajtanía cati monequi,

huan san nimochiya para technanquilis.

4 Ta tiToteco Dios cati amo mitzpactía cati amo cuali.

Yeca amo tiquincahuilía amo cuajcualme ma itztoca mohuaya.

5 Cati mohueyimatij amo hueli moquetzase moixpa.

Tiquincualancaita nochi cati quichihuaj cati amo cuali.

6 Tiquintzontamiltía masehualme cati istacatij.

Quena, TOTECO, amo tijnequi tiquinitas cati tacajcayahuaj huan temictíaj.

7 Pero na, pampa hueyi motaicnelijcayo,

huelis nicalaquis mochaj.

Quena, huelis nimitzhueyichihuas ipan motatzejtzeloltijca tiopa,

pampa nimitztepanita huan nimajmahui para nimitzixpanos.

8 TOTECO, techyacana quej nohuaya timocajtoc tijchihuas,

pampa itztoque nocualancaitacahua.

Technextili moojhui cati xitahuac.

9 Nocualancaitacahua amo quema quiijtohuaj cati melahuac.

Amo aqui hueli motemachía ipan inincamanal.

Ipan iniyolo san quinequij tetzontamiltise.

Inincamac eltoc fiero quej quema quitapohuaj se mijca ostot.

Tecamanalhuíaj ica camanali cati cuajcualtzi san para tacajcayahuase.

10 Xiquintatzacuilti, noTeco Dios.

Xiquinmasilti ica cati amo cuali moilhuijtoque quinchihuilise sequinoc.

Xiquinhuejcamajcahua pampa miyac inintajtacolhua.

Quena, xiquinhuejcamajcahua pampa mohuejcatalijtoque ten ta.

11 Pero ma paquica nochi cati motemachíaj ipan ta para xiquinpalehui.

Nochipa ma huicaca ica paquilisti pampa ta tiquinmanahuía.

Cati mitzicnelíaj paquij ipan ta.

12 Pampa ta, TOTECO, tiquintiochihua cati quichihuaj cati xitahuac moixpa.

Motaicnelijcayo quinyahualohua quej se tepos tzajcayot cati quinmocuitahuía.