1 Ipan ta, TOTECO, nimotatajtía ica nochi noyolo.

2 Ipan ta, noTeco Dios, nimotemachía.

Amo techcahuili ma nimopinahualti.

Amo xiquincahuili nocualancaitacahua ma nechhuetzquilica.

3 Amo quema mopinahualtijtoc se cati ipan ta motemachijtoc.

Ma pinahuaca inijuanti cati nimantzi quinequij mitzixpanose.

4 TOTECO, technextili moojhui.

Quena, technextili nopa pilojtzi campa tijnequi ma ninejnemi.

5 Techyacana ipan moojhui cati xitahuac huan techmachti,

pampa ta tinoTeco Dios huan tinotemaquixtijca.

Ipan ta nimotemachía ipan ten hueli hora.

6 TOTECO, xiquelnamiqui moteicnelilis cati tijpixtoc para nochipa,

cati hasta ten huejcajquiya titenextilijtoc,

huan yeca techtasojta.

7 Amo xiquelnamiqui notajtacolhua cati nijchijqui quema nitelpocatixtoya.

Xiquelcahua quema nimotepanitayaya moixpa.

TOTECO, techelnamiqui ica motaicnelilis pampa hueyi moyolo icana.

8 TOTECO, ta nelía ticuali huan tixitahuac.

Yeca tiquinnextilía tajtacolchihuani nopa cuali ojti cati ipan ma nejnemica.

9 Tiquinyacana cati moechcapanohuaj ipan nopa ojti cati más xitahuac.

Quena, tiquinmachtía inijuanti cati quitemohuaj taya mopaquilis.

10 Quema se masehuali quitoquilía motanahuatil, TOTECO,

nochi ojti cati ipan tijhuica quinextilía motaicnelilis,

huan quinextilía para ta tiitztoc tixitahuac.

11 ¡TOTECO! Techtapojpolhui notajtacol masque nelía hueyi.

Techtapojpolhui pampa quej nopa tiquijtojtoc tijchihuas.

12 TOTECO, ica masehualme cati quiimacasij mitzixpanose,

tiquinnextilis nopa cuali ojti cati tijtapejpenijtoc para inijuanti.

13 Tiquintiochihuas miyac,

huan ininconehua quiselise nopa tali cati tiquinmacas.

14 TOTECO tiquinpohuilía cati eltoc ipan moyolo inijuanti cati mitztepanitaj huan quiimacasij mitzixpanose.

Quena, tiquinnextilía nochi cati inihuaya timocajtoc masehualme.

15 Nochipa nimitztemohua TOTECO,

huan nijchiya para techpalehuiqui,

pampa san ta tihuelis techmanahuis ten ni taquetzti.

16 Techtachili, TOTECO,

huan xijpiya hueyi moyolo ica na,

pampa niitztoc noselti huan nimoyoltequipachohua.

17 Nimoyoltequipachohua ica tahuel miyac tamanti cati ohui.

Techmanahui ten nopa tequipacholi.

18 Xijtachili nopa tequipacholi cati nechcuatetzopa huan nechtaijyohuiltía.

Huan techtapojpolhui nochi notajtacolhua.

19 Xiquita quesqui nocualancaitacahua niquinpiya huan quenicatza tahuel nechcualancaitaj.

20 Techmocuitahui huan techmaquixti para amo nechcocose.

Amo xijcahua ma nechpinahualtica,

pampa ipan ta nimotemachijtoc.

21 Techmanahui pampa nitemachti huan nijchihua cati xitahuac,

huan nimotemachijtoc ipan ta.

22 NoTeco Dios, techmaquixti tiisraelitame ten nochi totequipachol,

pampa timomasehualhua.