1 Nelía paqui nopa masehuali cati TOTECO quitapojpolhuijtoc itajtacolhua huan quiixpolojtoc nochi itaixpanolhua.

2 Quipiya paquilisti cati ya quipohuilijtoc TOTECO itajtacolhua,

huan ayecmo quitajtacoltía ica yon se tamanti.

Ipan iyolo ayecmo mocajcayahua quej amo teno quichijtoc.

3 Quema ayemo nijpohuilijtoya TOTECO quenicatza nitajtacolchijtoya,

semilhuit niaxtiyaya hasta nijmatqui para tantoya nochicahualis.

4 Techtatzacuiltiyaya tonaya huan tayohua.

Techtatzacuiltij hasta nijmatiyaya nicuahuaquiyaya quej soquiat huaqui quema chicahuac tatotoniya.

5 Pero teipa nimitzpohuili nochi notajtacolhua huan yon se amo nijtati.

Nimotemacac nimitzpohuilis nochi notaixpanolhua huan ta, TOTECO, nochi techtapojpolhui,

huan techquixtili nopa taeticayot.

6 Monequi para nochi cati moaxcahua mitztemose quema itztoque ipan tequipacholi.

Monequi motemachise ipan ta,

huan masque tequipacholi momiyaquilis quej se atajti cati chicahuac mixcuepa,

amo quinajsis.

7 TOTECO, ipan ta nimotemachía quema onca tequipacholi,

huan ta techmocuitahuía.

Tijchijtoc para sequinoc ma nechyahualoca,

huan inijuanti huicaj chicahuac para mitzhueyichihuase pampa techmanahuijtoc.

8 TOTECO quiijtohua:

“Na nimitztalnamictis huan nimitznextilis nopa ojti cati más cuali,

cati monequi ipan timonejnemiltis.

Na nimitzconsejomacas huan nimitztachilijtos.

9 Amo ximochihua quej se cahuayo,

o se mula cati amo quipiya talnamiquilisti,

cati monequi tijtalilis se tepos camachali ica se lazo huan tijtilanas para mitzneltocas.”

10 Amo cuajcualme quipantise miyac taijyohuilisti,

pero tojuanti cati timotemachíaj ipan TOTECO,

yaya techyahualojtoc ica itaicnelilis.

11 Xipaquica ipan TOTECO,

amojuanti cati anitztoque xitahuaque iixpa.

Amojuanti cati anquineltoquilíaj,

xitzajtzica ica paquilisti por cati TOTECO quichijtoc.