1 TOTECO, amo techtaijyohuilti quema ticualani.

Huan amo techtatzacuilti ica mohueyicualancayo.

2 Miyac nechcocohua cati amo cuali nijchijtoc.

Eltoc quej nochi mocuataminhua calactoc ipan na.

Quena, eltoc quej techajsitoc,

pampa nijmati ticualani ica na.

3 Huan pampa ticualani pampa nitajtacolchijtoc,

nijmati quenicatza nochi notacayo mococohua.

Yon se noomiyo amo cuali eltoc.

4 Nochi notajtacolhua huetztoc nopani.

Eltoc quej nimisahuisquía campa miyac at.

Notajtacolhua eltoc quej se tamamali tahuel etic cati amo hueli niquijyohuía.

5 Palani notacayo pampa nijchijqui se huihuiyot.

Mijyotíaj nococohua.

6 Nicuitapanhuitoltic huan amo hueli nijtanana notzonteco.

Semilhuit nichocatinemi por cati nijchijtoc.

7 Nochi notacayo tiquisa.

Huan ya tantinemi nochicahualis por notajtacol.

8 Nimomati quej nitatejtejtzonti.

Yon quentzi fuerza amo nijpiya.

Nelía niaxti ipan noyolo.

9 NoTeco, ta tijmati quenicatza nijnequi sempa niitztos cuali moixpa.

Nochi cati nimoilhuía tanemijya nesi moixpa.

Amo teno hueli nimitztatilía.

10 Noyolo nelhuihuipica,

huan ya tantinemi nochicahualis.

Ayecmo hueli nitachiya cuali.

11 Nonelhuampoyohua huan noteixmatcahua san nechhuejcaitaj, pampa quiijiyaj nococohua.

12 Inijuanti cati quinequij nechmictise quisencahuaj taquetzti para nechmasiltise.

Cati quinequij nechcocose talojtzitzi nechilhuíaj quenicatza nechtzontamiltise.

Semilhuit quitemohuaj quenicatza nechcajcayahuase.

13 Pero na nimochihua quej amo nijcaqui cati quiijtohuaj.

Nimochihua quej se cati amo hueli camanalti huan amo nijtapohua nocamac para niquinnanquilis.

14 Quena, na nimochihua quej amo nijcaqui inincamanal,

huan amo teno niquijtohua para ica nimomanahuis.

15 Pampa san ipan ta nimochiya, TOTECO, tinoDios.

Na nijcajtoc momaco para xiquinnanquili huan techmanahui.

16 San nimitztajtanía para amo xiquincahuili ma noca huetzcaca.

Amo xiquincahuili ma mohueyitalica noixpa pampa nihuetzqui.

17 Nijmati nimiquis pampa tacuajcualoli amo nechcahua yon se talojtzi.

18 TOTECO, nijnequi nimitzpanextilis nochi notajtacolhua,

pampa nelía nimotequipachohua ica cati nijchijtoc.

19 Nocualancaitacahua momiyaquilijtoque huan moyoltetilijtoque.

Miyac nechcualancaitaj, masque amo teno niquinchihuilijtoc.

20 Masque cati cuali niquinchihuilijtoc, nechcuepilijtoque ica cati fiero.

Nechcualancaitaj pampa nijtoquilía cati cuali.

21 NoTeco Dios, amo techcajtehua noselti.

Amo ximoiyocatali ten na.

22 ¡Toteco! Xihuala nimantzi techpalehuiqui, ta tinotemaquixtijca.