1 Nijpixqui noyolo huan nimochixqui para TOTECO ma nechpalehuiqui.

Huan yaya, quena, moechcapano huan nechtacaquili quema nijnojnotzayaya.

2 TOTECO nechtananqui quema nijmatiyaya niitztoya ipan se ostot campa mahuilili.

Eltoya quej nimisahuijtinemiyaya ipan soqui atoli cati huejcata,

huan ayecmo nijmatiyaya taya nijchihuas.

Pero TOTECO nechmaquixti ten nopa tequipacholi.

Quena, nechquetzqui ipan se hueyi tet campa temachti.

Huan teipa nechyacanqui ipan se cuali ojti.

3 Huan teipa noTeco Dios nechmacac se huicat yancuic,

se huicat cati ica ma nijpaquilismacas.

Miyac cati quicaquise nochi cati TOTECO nechchihuilijtoc, motemachise ipan ya.

4 Paqui nopa masehuali cati motemachía ipan TOTECO,

huan amo motemachía ipan cati mohueyimatij,

yon ininpan cati quinhueyichihuaj teteyome.

5 TOTECO noDios, ta techchihuilijtoc miyac tamanti cati huejhueyi.

Amo aqui quiaxilis mohueyi chicahualis.

Ta nochipa techpixtoc ipan motalnamiquilis.

Quena, tahuel miyac tamanti cati cuajcualtzi tijsencajtoc techchihuilis.

Sinta nijnequisquía niteyolmelahuas sesen tamanti cati techchihuilijtoc,

amo nihuelisquía.

Pampa nochi cati cuali techchihuilijtoc quipano cati hueli nijpohua.

6 Ya nijmati nopa cati más tijnequi para timasehualme ma timitzmacaca.

Amo hueyi ipati moixpa nopa tapiyalme huan sequinoc tamanti tacajcahualisti cati masehualme mitzmacaj.

Amo hueyi ipati moixpa nopa tacajcahualisti cati tijtatíaj moixpa por totajtacolhua.

Techtapohuilijtoc notalnamiquilis para hueli nijmachilía cati más tijnequi ten tojuanti.

Tijnequi ma timotemacaca ica ta.

Ya nopa, quena, hueyi ipati moixpa.

7 Yeca nimitzilhuijtoc:

“Nica niitztoc.

Ya nihuala quej ijcuilijtoc ipan mocamanal para nijchihuasquía.

8 ¡NoTeco Dios!

Nechpactía nijchihuas mopaquilis,

huan motamachtil nijhuica ipan noyolo.”

9 Miyacapa iniixpa momasehualhua niteyolmelajtoc para ta, TOTECO,

tiquinchihua masehualme xitahuaque moixpa.

Cuali tijmati para amo san nicajoctoc cati nijmati.

10 Amo nijtatijtoc nopa cuali camanali ipan noyolo para amo aqui niquilhuis.

Nochi masehualme niquinyolmelahua para ta tiquinmaquixtis.

Nochipa nitematiltis para ta nelía titemachti huan titepalehuía.

Nepa miyacapa nitepohuilis para titetasojta huan amo timoyolpata.

11 TOTECO, nijmati amo quema tijcahuas techtasojtas.

Nimochiya ipan moteicnelijcayo,

pampa ta nochipa techmocuitahuis.

12 Miyac tequipacholi nijpiya campa hueli.

Amo hueli nijpohua nochi.

Notajtacolhua nechtantoc huan nichoca hasta amo hueli nitachiya.

Notajtacolhua nelmiyac hasta quipano imiyaca notzoncal.

Tantinemi noyolo huan nochicahualis.

13 TOTECO, techmanahuiqui.

Quena TOTECO, ximoisihuilti huan techpalehuiqui.

14 Ma mopinahualtica huan ma mocuapoloca cati quinequij nechtzontamiltise.

Xiquinquixti cati nechcualancaitaj huan tahuel xiquinpinahualti.

15 Nochi cati noca paquij ma huetzica.

Xiquincuepa san ica inimax.

16 Pero ma paquica miyac nochi cati mitztemohuaj.

Quena, paquij cati mitzicnelíaj pampa tiquinmaquixtijtoc.

Nochipa quiijtohuaj:

“Nelía hueyi TOTECO.”

17 Masque nimotequipachojtoc huan nechpolohua ten ica nipanos,

nijmati para ta TOTECO techelnamiqui.

Ta tinoTeco Dios, techpalehuis huan techmanahuis.

NoTeco Dios, amo xihuejcahua quema nimitznotza.

Nimantzi techpalehuiqui.