1 Notalnamiquilis temitoc ica camanali cati cuajcualtzitzi.

Niquijcuilos ni huicat para ma tijhuicatica totanahuatijca.

Tahuel nijnequi nitepohuilis ni huicat cati nijsencajtoc, huan ya ni quiijtohua:

2 Ta más ticuajcualtzi ten nochi sequinoc telpocame,

huan cuajcualtzi cati tiquijtohua,

pampa Toteco Dios mitztiochijtoc para nochipa.

3 Ximocualtalili momacheta para titatehuis,

ta cati nelía amo timajmahui.

Nelía tinesi ticuajcualtzi pampa ta titanahuatijquet cati más hueyi.

4 Xitejco ipan cahuayo huan xitataniti ica nochi mohueyitilis.

Ta tiquinmanahuía cati teicneltzitzi huan cati quichihuaj cati melahuac.

Titetajtolsencahua xitahuac.

Nelía huejhueyi tamanti tijchihua.

5 Tatentili nopa cuataminti cati tijhuica,

huan quinajsis iniyoltipa mocualancaitacahua quema tiquinmelaitas,

huan tiquinmajcahuilis.

Ma huetzica moicxita nochi ten campa hueli talme campa quintepanitaj teteyome.

6 Toteco Dios, titanahuatis para nochipa huan amo quema tamis.

Quena, motanahuatilis elis senquisa xitahuac.

7 Tiquicnelía cati melahuac huan tijcualancaita cati amo cuali.

Yeca Toteco Dios, yaya cati moTeco mitztequitalijtoc titanahuatijquet,

huan mitzmacatoc más paquilisti huan más tatepanitacayot,

que nochi sequinoc tanahuatiani.

8 Nochi moyoyo mijyotía ica nopa taajhuiyacayot mirra, áloe huan canela.

Huan mitzpaquilismacaj ica tatzotzonali nepa ipan mochaj campa quiyejyectalijtoque nochi tapepecholi ica tamanti cati tahuel cuajcualtzitzi huan pajpatiyo.

9 Iniichpocahua sequinoc tanahuatiani quipiyaj nopa hueyi tatepanitacayot para mitztequipanose.

Huan ica monejmat mosehuijtoc nopa ichpoca tanahuatijquet cati elis mosihua cati quiyectalijtoque ica oro cati onca ipan tali Ofir.

10 Xijtacaquili ichpocat.

Quena, xijtacaquili cuali, nocone,

cati nimitzilhuis:

Ayecmo xiquintoquili motatahua,

moicnihua huan nochi cati timomajtoya tijchihua.

11 Nopa tanahuatijquet tahuel mitznequi,

huan nelía paqui ica moyejyejca.

Huajca monequi tijneltocas pampa ama ya moTeco.

12 Hualase mitzpaxaloquij iichpocahua nopa tanahuatijquet ten altepet Tiro.

Quena, cati más tominpixtoque ipan nopa altepet hualase huan mitztamajmacaquij.

Ya ni quichihuase pampa quinequise ximohuampojchihua inihuaya.

13 Nopa ichpoca monamictijquet mocualtalía ipan ichaj ica tamanti cati más cuajcualtzi.

Yaya iichpoca se tanahuatijquet huan ama mocuilis ne tanahuatijquet cati hueyi.

Tahuel cuajcualtzi nopa ichpocat ica iyoyo cati nelcuajcualtzi cati tajtzonti ica oro.

14 Quena, cuajcualtzi quiyoyontijtoque ica iyoyo tajtzonti huan ama quihuicase iixpa nopa tanahuatijquet cati ihuaya monamictis.

Itepotzco yase iichpocapoyohua cati quinnotztoc.

15 Ica hueyi paquilisti calactiyahuij ipan nopa hueyi cali campa ichaj nopa tanahuatijquet.

16 Tanahuatijquet, se tonali tiquinpiyas moconehua,

huan tiquinmacas tequiticayot para tanahuatise quej mohuejcapan tatahua mitzmacaque.

Quena, teipa tiquinpiyas motelpocahua cati mitzpalehuise.

Huan tijchihuas ma tanahuatica hasta campa hueli techaj ipan nochi motal.

17 Huan na ica ni huicat cati niquijcuilojtoc para ta,

Toteco Dios, quichihuas para masehualme ma mitzelnamiquica sese xihuit cati panotiyas.

Quena, masehualme ipan ten hueli tali camanaltise para nochipa ten nopa huejhueyi tamanti cati ta tijchijqui.