1 Techtasojta, noTeco Dios, xijnexti motaicnelilis ica na,

pampa san ipan ta nimotemachía para techmanahui.

Quej se pilpiyotzi motatía ieltapaltzala inana,

na nojquiya nimotatía ipan ta hasta panos ni hueyi taohuijcayot cati eltoc quej se hueyi ajacat.

2 Nijtzajtzilis Toteco Dios Cati Más Hueyi.

Quena, nijnojnotzas Toteco Dios cati nochipa nechpalehuía ipan nochi tamanti.

3 Ten ilhuicac nechtitanilía itapalehuil para nechmaquixtis.

Yaya nechchololtis inimaco nocualancaitacahua cati ica miyac cualanti nechtepotztocatinemij,

huan quinequij nechtzontamiltise.

Pampa yaya Toteco Dios temachti huan tahuel nechicnelía.

4 Nechyahualojtoque masehualme cati mosisiníaj quej tecuanime.

Inincamanal eltoc quej tit cati quisa inincamaco.

Inintancoch tajtatequi quej cuataminti huan ininenepil tatequi quej macheta.

5 NoTeco Dios, nochi ma mitzhueyichihuaca ipan nochi ilhuicacti.

Mohueyitilis ma quitemiti ni taltipacti.

6 Nocualancaitacahua quitalijtoque se taquetzti para ma nimasi,

yeca tahuel nimajmahui.

Nojquiya quichijque se ostot ipan ojti para ma nimoostohui,

pero xiquita inijuanti huetzque nopona.

7 NoTeco Dios, ipan noyolo nipaqui huan nijpiya tasehuilisti.

Huan yeca nimocualtalijtoc para nihuicas huan nijsencahuas tiohuicat para ta.

8 Na nimocualtalía para nijtzotzonas noarpa huan noguitarra.

Cualca niijsa para nimitztatzotzonilis.

9 Na nimitztascamatis iniixpa masehualme pampa ta, Toteco, techchihuilijtoc miyac tamanti cati cuajcualtzi.

Huan nihuicas para nimitzhueyimatis iniixpa masehualme ten nochi talme.

10 Motaicnelijcayo nelhueyi quej ipatajca ilhuicacti huan huejcapantic hasta quipano mixti.

Ta tahuel titemachti.

11 Toteco Dios, nochi ma mitzhueyichihuaca ipan nochi ilhuicacti.

Mohueyitilis ma quitemiti ni taltipacti.