1 Toteco Dios, san ta quinamiqui ma timitzhueyimatica,

ta cati tiitztoc ipan altepet Jerusalén.

Huan quinamiqui ma timitzmacaca nochi cati timitztajtolcahuilijtoque timitzmacase.

2 Ta technanquilía quema timotatajtíaj huan techmaca cati timitztajtaníaj,

huajca nochi masehualme ipan taltipacti ma hualaca campa ta.

3 Masque toyolo temitoc ica tajtacoli huan techtantoc,

ta techtapojpolhuía nochi totaixpanolhua.

4 ¡Nelía tipaquij miyac tojuanti cati techtapejpenijtoc para ma tihualaca,

huan ma tiitztoquij mohuaya ipan motiopa cati tatzejtzeloltic!

¡Ta techmacas hueyi paquilisti huan nochi cati cuali cati onca nopona!

5 Quema timitztajtaníaj se tamanti,

ta technanquilía ica huejhueyi tamanti.

Toteco Dios, nochi masehualme ipan taltipacti motemachíaj ipan ta.

Quena, masque itztoque hasta campa ontantoc hueyi at,

nochi motemachíaj para ta tiquinpalehuis.

6 Ta ica mohueyi chicahualis tiquinchijchijqui nopa tepeme huan tiquintatzquilti campa eltoque.

7 Ta tijtacahualtía nopa hueyi at quema mosisinía.

Huan tiquinyoltalía masehualme campa hueli quema quinequij motehuise.

8 ¡Yeca nochi masehualme cati itztoque hasta campa ontantoc taltipacti,

mitztepanitaj huan mitzimacasij para mitzixpanose quema quiitaj nopa huejhueyi tamanti cati tijchihua!

Tijchihua para masehualme ma paquica ten quema tanesi huan hasta quema tayohuiya.

9 Ta ticatequía ni taltipacti para ma taelilti.

Nopa hueyame cati ta moaxca amo quema huaquij.

Ta tijcualtalía ni tali para momasehualhua ma quitocaca inixinach,

huan teipa tijchihua para ma onca se hueyi pixquisti.

10 Ta tijxolonía ica miyac at nopa surcos ipan mila.

Tijchihua ma huetzi at para ma yamaniya nopa tali huan ma poxoni nopa taltojtolomit.

Huan tijchihua para ma ixhua nochi tamanti tatocti ipan nochi taltipacti.

11 Teipa sese xihuit tijtamiltía ica se pixquisti cati nelía cuajcualtzi.

Huan nopa mixti tijchihua ma quihuetzilti miyac at.

12 Onca sacat ipan huactoc tali,

huan campa taixtemolis moscaltíaj cuajcuali xihuit,

huan temacaj inixochiyo.

Nesi quej moscaltíaj ica miyac paquilisti.

13 Ta tijchijtoc para nochi potreros ma temica ica borregojme para quicuase nopa sacat.

Huan ipan nochi nopa tamayamit motanantoc trigo mili.

Eltoc quej nochi cati ta tijchijtoc ipan taltipacti tzajtzij ica paquilisti huan huicaj.