1 NoTeco Dios, techmaquixti,

pampa ni taohuijcayot tahuel mochijtoc hueyi hasta nijmachilía nimiquis.

Eltoc quej at cati nechatzonpolihuiltisnequi,

huan ya ajsic hasta noquechta.

2 Eltoc quej nimasitoc ipan soquit cati huejcata huan amo hueli niquisa.

O quej nechyahualosquía tahuel miyac at huan huejcata.

3 Tahuel nichocatoc hasta nisiyajtoc.

Nimitztzajtzilijtoc, Toteco Dios, hasta nechcocohua noquechta huan ayecmo hueli nicamanalti.

Nochi noixteyol semajtoc ica choquisti.

Ya niixcuatic pampa campa hueli nitachixtoc para niquitas sinta tihuala, Toteco Dios, para techpalehuis.

4 Tahuel miyaqui nopa masehualme cati nechcualancaitaj masque amo teno niquinchihuilijtoc.

Nelía quipiyaj miyac chicahualisti nocualancaitacahua cati quinequij nechmictise.

Pero na amo niquinixpanotoc.

Quinequij nechtatzacuiltise ica se tamanti cati amo nijchijtoc.

5 NoTeco Dios, ta tijmati para nelía nihuihuitic,

huan tiquixmati nochi notajtacolhua.

6 TOTECO, ta tiDios Cati Tijpiya Nochi Chicahualisti,

amo xiquincahuili ma huetzica ipan tajtacoli por na notajtacol,

nopa masehualme cati motemachíaj ipan ta.

Ta cati titoTeco tiisraelitame,

amo xiquincahuili ma pinahuaca sequinoc israelitame ica cati nijchijtoc na.

7 Pampa nimitzicnelía, niquijyohuijtoc pinahualisti,

huan nechhuetzquilijtoque hasta amo nijmatqui taya nijchihuas.

8 Hasta noicnihua nechchihuaj quej amo nechixmatij huan nechitaj,

quej elisquía niehua ipan niseyoc altepet.

9 Quena, niquicnelía motiopa ica nochi noyolo hasta nimotemaca nimiquis por ya.

Huan cati mitztaijilhuíaj ta,

nojquiya nechtaijilhuíaj na pampa nimitztequipanohua.

10 ¡Quena, tahuel nechhuetzquilíaj huan nechpinajtíaj,

quema nichoca huan nimosahua iixpa Toteco!

11 ¡Tahuel fiero camanaltij ten na quema nimoquentía yoyomit cati sosoltic para nijnextis nimotequipachohua por notajtacolhua!

12 Nopa tayacanca tequichihuani cati mosehuíaj campa icalte nopa altepet,

noca motahuetzquiltíaj.

Huan nopa ihuintini noca huicatinemij.

13 Pero TOTECO na nijsenhuiquilía nimitztemohua huan nimotatajtía ipan ta,

pampa nijmati ajsis tonali para techtacaquilis.

Toteco Dios, ica mohueyi taicnelilis technanquili,

pampa ta nochipa techicnelijtoc.

Huajca technanquili quema nimotatajtía huan techmanahui.

14 Techquixti ten ni soquit cati huejcata campa nimasitoc.

Amo techcahuili para niatzonpolihuis.

Techmanahui inimaco cati nechcualancaitaj.

Techquixti ten ni hueyi at cati nechyahualojtoc.

15 Amo xijcahuili ma nechtaijyohuilti ni hueyat,

yon amo xijcahuili nopa at ma nechtolo.

Techmanahui para amo nimasis ipan nopa ostot cati tahuel huejcata.

16 TOTECO, technanquili quema nimitztzajtzilía pampa ta nelía ticuali.

Ta techicnelía miyac huan tijpiya hueyi moyolo ica na.

17 ¡Amo ximotati quema nimitztemohua pampa tahuel nitaijyohuía!

Ximoisihuilti, xihuala huan techmaquixtiqui.

18 Xihuala, noTeco Dios huan techmanahuiqui.

Techmaquixti inimaco nocualancaitacahua.

19 Ta tijmati quenicatza camanaltij fiero ten na huan quenicatza nechpinahualtijtoque.

Quichijtoque para ayecmo aqui ma nechtepanita.

Ta tiquinixmati nochi nocualancaitacahua huan tijmati taya quiijtojtoque sese inijuanti.

20 Inijuanti tahuel nechyolcocojtoque huan nechtequipacholmacatoque.

Nijtemojtoc ajquiya nechtasojtasquía huan nechyoltalisquía,

pero yon se amo nijpanti.

21 Quema nimayanayaya nechmacaque pajti cati temictía para ma nijcua.

Huan quema niamiquiyaya nechmacaque ma niqui vinagre.

22 Nopa paquilisti cati inijuanti quipiyaj ma mocuepa tequipacholi.

Huan nopa tasehuilisti cati quipiyaj ica inihuampoyohua,

ma mocuepa cualancayot.

23 Ma huala ininpani tzintayohuilot huan ma huihuipicaca, ma ayecmo quipiyaca más fuerza.

Ma elica popoyotzitzi huan ma tami nochi ininchicahualis.

24 Xiquinnextili mohueyi cualancayo huan xiquintzontamilti.

25 Inintequicalhua ma mocahua sosoltic,

huan ipan ininchajchaj ma tatzitzicato.

Ayecmo aqui ma itzto.

26 Pampa inijuanti más quitaijyohuiltíaj cati ta tijcocojtoc,

huan quipinajtíaj cati ta tijtequipacholmacatoc.

27 Xiquijcuilo nochi inintajtacolhua huan amo xiquintapojpolhui.

28 ¡Xiquixpolo inintoca ipan moama campa eltoc inintoca inijuanti cati yoltoque!

¡Ma amo quipiyaca tasehuilisti quej quipiyaj nopa masehualme cati itztoque xitahuaque moixpa!

29 Pero na cati nitaijyohuía huan niteicneltzi,

techmaquixti huan techtanana.

Quena, Toteco Dios, techtali campa ta tiquitas quinamiqui.

30 Huan huajca nihuicas huan nijpaquilismacas Toteco Dios.

Quena, nijhueyimatis huan nijtascamatis.

31 Huan TOTECO achi más quipactis ya nopa,

huan amo quej sinta nijmacasquía se toro o se becerro cati tacuacuajhuía huan quipiya iistihua.

32 Inijuanti cati teicneltzitzi quiitase Toteco Dios quema quinmacas itapalehuil,

huan yeca tahuel paquise.

Huan nochi cati quitemohuaj Toteco Dios itztose ica paquilisti.

33 Pampa TOTECO quintacaquilía cati teicneltzitzi,

huan amo quintahuelcahua inijuanti cati itztoque ipan tatzacti.

34 ¡Xijpaquilismacaca TOTECO nochi amojuanti cati anitztoque ipan ilhuicacti huan taltipacti!

¡Ma quihueyichihuaca nochi cati itztoque ipan hueyi at!

35 Pampa Toteco Dios quimaquixtis ialtepe, Jerusalén,

huan sempa quincualtalis nopa altepeme ipan tali Judá.

Huan imasehualhua mochantise nopona huan moaxcatise nopa tali.

36 Huan teipa ininconehua nojquiya moaxcatise nopa tali.

Huan nochi cati quitequipanohuaj huan quiicnelíaj Toteco itztose nopona temachme.