1 ¡Timitztascamatij, Toteco Dios, pampa tiitztoc tonechca!

Pampa masehualme tepohuilíaj nochi huejhueyi tamanti cati tijchijtoc.

2 Huan Toteco Dios quiijtohua:

“Quena, quema ya nimocualtalijtos, na niquixquetzas se tonali.

¡Huan niquintatzacuiltis quej quinamiqui nochi nopa taixpanoca masehualme!

3 Masque ni taltipacti mohuisos huan nochi masehualme huihuipicase,

itaquetzalhua amo huetzise pampa na niquinquetztoc cuali ipan inilugar.”

4 Niquinilhui masehualme cati mohueyimatij ma amo mohuihuinequica.

Huan niquinilhui taixpanoca masehualme ma amo mohueyimatica.

5 Niquinilhuijtoc cati quipiyaj chicahualisti ma amo tetamiijilhuica.

Huan quema ancamanaltij, amo ximoyacaquetzaca para anmohueyimatise.

6 Pampa san Toteco hueli tehueyitalía.

Amo aqui cati huala ten campa quisa tonati, o ica campa oncalaqui,

o campa huactoc tali huelis quihueyitalis se masehuali. ¡Amo!

7 San Toteco Dios itztoc Juez.

San yaya nopa tetajtolsencajquet cati hueli tehueyitalía huan temaca chicahualisti.

Huan sequij masehualme quinhueyitalía huan sequij quinechcapantalía.

8 Toteco quipixtoc imaco se caxit cati temitoc ica tailisti cati nelía cococ.

Huan ya nopa eltoc nopa tatzacuiltili cati quintitanilis taixpanoca masehualme ipan ni taltipacti.

Huan monequis quiise hasta quitamise ica nochi itetejtzo.

9 Pero na para nochipa nitepohuilis nochi cati quichijtoc Toteco Dios,

yaya cati iTeco Jacob.

10 Yaya quiijtohua: “Na nijtamiltis ininchicahualis nopa fiero masehualme,

pero cati itztoque xitahuaque noja niquinmacas más chicahualisti.”