1 TOTECO, ta tiDios Cati Tijpiya Nochi Chicahualisti,

tahuel cuajcualtzi motiopa.

2 Nelía tahuel nijnequi nicalaquis ipan icalixpa nopa tiopamit,

para nimonechcahuis huan nihuicas ica nochi noyolo para ta, Toteco Dios, cati tiitztoc.

3 TOTECO, ta tiDios Cati Tijpiya Nochi Chicahualisti.

Ta tinotanahuatijca huan tinoTeco.

Campa motaixpa ipan mochaj nochi quipantíaj ininchaj,

hasta nopa cochome huan tiopan tachpanani cati nopona motepasoltíaj,

para nopona quintacatiltíaj ininconehua.

4 ¡Nelía paquij nopa masehualme cati itztoque ipan motiopa huan quisenhuiquilíaj mitzpaquilismacaj!

5 Cuali ininpanti nopa masehualme cati itztoque momaco, Toteco,

huan quitoquilíaj moojhui huan yahuij Jerusalén para mitzhueyimatise.

6 Quema panose campa ohui huan ipan nopa tamayamit ten Choquisti,

quipatase para elis quej se cuajcualtzi ameli cati temitos ica at quema huetzi at,

pampa nopona quipantise miyac tatiochihualisti.

7 Huan quej nopa nejnentiyase mojmosta ica más chicahualisti,

huan ajsise ipan Jerusalén para nopona monextise moixpa, Toteco.

8 TOTECO Dios, ta tiDios Cati Tijpiya Nochi Chicahualisti, techtacaquili quema nimotatajtía.

Quena, techtacaquili ta tiiTeco Israel.

9 Toteco, ta cati techmanahuía.

Xijcualita huan xijtiochihua nopa tanahuatijquet cati ticaltijtoc para tanahuatis ipan Israel.

10 Achi más cuali ma niyolto se tonal huan ma niitzto ipan motiopa, Toteco,

huan amo niyoltos se mil tonali huan san ninentinemis campa hueli.

Quena, achi más cuali san nimoquetzasquía campa icalte motiopa, Toteco,

huan amo niitztos ipan se hueyi cali campa onca tajtacoli.

11 Pampa ta, Toteco Dios, techtaahuilía huan techmanahuía.

Ta techicnelía huan techhueyitalía.

Huan nochi cati monejnemiltíaj xitahuac ipan moojhui,

ta tiquinmacas nochi tamanti cuajcuali cati inijuanti quinequij.

12 Toteco Dios, ta tiDios Cati Tijpiya Nochi Chicahualisti,

nelía paquij nopa masehualme cati motemachíaj ipan ta para tiquinmocuitahuis.