1 TOTECO, ximohuijtzoma quentzi huan techtacaquili quema nimotatajtía.

Technanquili pampa niteicneltzi huan niitztoc ipan tequipacholi huan taohuijcayot.

2 NoTeco Dios, techmanahui pampa na nijchihua campeca para nijchihuas cati quiijtohuaj motanahuatilhua.

Techmaquixti pampa na nimitztequipanohua huan san ipan ta nimotemachía para techmocuitahuis.

3 TOTECO, xijpiya hueyi moyolo ica na pampa nochi se tonal nimitztzajtzilijtoc,

huan ipan ta nimochiya para techpalehuis.

4 Toteco, techmaca paquilisti pampa na san ta nimitzhueyichihua.

5 Toteco, ta nelía ticuali huan timoquetztoc timocualtalijtoc para titetapojpolhuis.

Tiquinicnelía huan nimantzi tiquintasojta nochi cati mitztajtaníaj motapalehuil.

6 TOTECO, techtacaquili quema nimotatajtía.

Quena, techtacaquili quema nimitztzajtzilía.

7 Nimitztzajtzilis ipan nopa tonali quema nechajsis taohuijcayot,

pampa san ta technanquilía huan techpalehuía.

8 Ipan nochi sequinoc cati quintocaxtíaj “dioses”,

amo onca seyoc quej ta, Toteco.

Huan amo aqui hueli quichihua huejhueyi tamanti quej ta tijchihua.

9 Elqui ta cati tiquinchijchijqui nochi talme ica inimasehualhua.

Yeca hualase huan mitzhueyichihuase, Toteco.

Huan mitzhueyitalise ta cati titatzejtzeloltic,

10 pampa ta tahuel tihueyi huan tijchihua huejhueyi tamanti.

¡San ta nelía tiDios!

11 TOTECO, technextili moojhui huan nijtoquilis pampa san ya nopa temachti.

Xijchihua para noyolo ma mitzhueyitepanita,

huan ma quiimacasi mitzixpanos nochi nonemilis.

12 TOTECO Dios, nimitzpaquilismacas ica nochi noyolo huan nimitzhueyitalis para nochipa,

13 pampa tahuel hueyi motaicnelilis ica na,

huan amo quema tami.

Ta techmanahuijtoc para amo niyas micta campa tanahuatía miquilisti.

14 Toteco Dios, miyac masehualme cati mohueyimatij huan cati mosisiníaj motanantoque para nechtehuise.

Huan miyac tatehuijca masehualme huan taixpanoni quinequij nechmictise,

huan amo moyolilhuíaj ten ta.

15 Pero ta Toteco nelía titetasojta huan hueyi moyolo.

Amo nimantzi ticualani.

San ta titeicnelía huan san ta timelahuac.

16 Techtachili ica miyac taicnelijcayot huan techmaca chicahualisti na nimotequipanojca.

Huan xijmanahui icone mosihua tequipanojca.

17 Xijnexti se tanextili para ta techcualita.

Quej nopa quiitase nocualancaitacahua,

huan pinahuase pampa momacase cuenta para ta, TOTECO,

tahuel techpalehuía huan techyoltalía.