1 Nelía cuali para timitzhueyichihuase, TOTECO,

ta nopa Dios Cati Más tiHueyi.

Cuali ma timitzpaquilismacaca ica huicat.

2 Ica ijnaloc ma titepohuilica motaicnelilis pampa hueyi moyolo,

huan ica tapoyahui ma tipaquica miyac pampa nelía titemachti.

3 Ma tihuicaca huan ma titatzotzonaca ica nopa tatzotzonali cati itoca arpa, guitarra huan lira.

4 NoTeco Dios, ta nelía techchihuilijtoc miyac tamanti cati cuali,

huan techchijtoc ma nipaqui.

Yeca nihuica ica miyac paquilisti.

5 ¡TOTECO, ta tijchihua huejhueyi tiochicahualnescayot!

¡Huan motalnamiquilis amo aqui hueli quimachilía!

6 Nopa masehualme cati huihuitique amo quimatij yon amo quimachilíaj.

7 Masehualme cati fiero ininemilis motananaj huan mohueyichihuaj ica tamanti cati amo cuali,

pero amo quimatij para teipa quintzontamiltise huan ayecmo quema motananase.

8 Pero ta tiTOTECO, mitzhueyitalijtose para nochipa pampa ta tiDios Cati Más Hueyi.

9 Xiquita nica itztoque mocualancaitacahua, pero nojquiya nica tiquintzontamiltis.

Quena, TOTECO, nochi masehualme cati quichihuaj cati amo cuali, ta tiquinsemanas.

10 Pero na techmacas chicahualisti quej se toro cati nemi cuatita.

Huan sempa techaltis ica moaceite cati temaca yancuic chicahualisti.

11 Niquitas quenicatza huetzise nocualancaitacahua.

Huan nijcaquis quenicatza quintzontamiltise nopa taixpanoca tacame cati motanantoque ica na.

12 Pero cati itztoque xitahuaque iixpa Toteco quipiyase chicahualisti.

Elise cuajcualtzitzi quej ixochiyo apachijcuahuit.

Mohueyichihuase quej nopa tiocuame cati onca ipan tali Líbano.

13 Masehualme cati cuajcualme quipiyase chicahualisti quej cuame cati quintoctoque ipan ichaj TOTECO,

huan Toteco Dios yaya quinmocuitahuis.

14 Huan quema nopa cuajcualme huehuejtiyase, noja quipiyase fuerza.

Itztose quej cuame cati temacase inintajca,

huan nochipa xoxohuixtose.

15 Huan ya nopa quinextis para TOTECO cati nechmocuitahuía quichihua cati melahuac.

Nochipa yaya xitahuac tetajtolsencahua.