1 TOTECO, ximonexti.

Ta tiDios cati tijpiya motequi para tiquincuepilis cati amo cuali techchihuilijtoque tocualancaitacahua.

2 Ximotanana huan xijtatzacuilti ni tali.

Nochi cati mohueyimatij xiquintatzacuilti quej quinamiqui.

3 TOTECO, ¿hasta quema tamis tatanise huan mopaquilismacase nopa masehualme cati amo aqui quitepanitaj?

4 ¿Hasta quema tamis tetaijilhuise huan mohueyimatise nopa tajtacolchijca masehualme?

5 TOTECO, inijuanti tahuel quintaijyohuiltíaj huan quintequipacholmacaj momasehualhua cati tiquinicnelía.

6 Inijuanti quinmictíaj sihuame icnotzitzi cati ehuani ipan sequinoc altepeme huan cati icnotzitzi.

7 Huan quiijtohuaj para ta, TOTECO, amo tiquita,

yon amo timomaca cuenta.

Quej nopa quiijtohuaj ten ta cati tiiTeco tohuejcapan tata Jacob.

8 Amojuanti cati anhuihuitique ten ni masehualme, xijmachilica.

¿Hasta quema anquitequihuise amotalnamiquilis para antamachilise?

9 Toteco quichijchijqui tonacashua,

huajca ¿anmoilhuíaj para amo quicaquis cati anquiijtohuaj?

Yaya quichijchijqui toixteyol,

huajca ¿anmoilhuíaj para amo quiita cati anquichihuaj?

10 Yaya quintatzacuiltía masehualme ipan nochi talme,

¿anmoilhuíaj amo amechtatzacuiltis nojquiya?

Yaya quimati nochi cati pano,

huan ¿anmoilhuíaj amo quimati taya anquichihuaj?

11 TOTECO quiixmati inintalnamiquilis masehualme huan quimati para san moilhuíaj tamanti cati amo cuali.

12 Pero cuali ininpanti nopa masehualme cati ta, TOTECO,

tiquintatzacuiltía para tiquintalnamictis.

Ya nopa quinpalehuía para quitoquilise moojhui,

huan para monejnemiltise xitahuac ipan motanahuatilhua.

13 Huan para itztose ica paquilisti quema ajsis nopa tonali cati fiero.

Pero nopa masehualme cati amo quitepanitaj TOTECO mochihuilíaj se ostot para ipan momasiltise huan motzontamiltise.

14 Pampa TOTECO amo quintahuelcahuas imasehualhua pampa inijuanti iaxcahua.

15 Se tonali Toteco tetajtolsencahuas xitahuac,

huan nochi cati itztoque ica ininemilis xitahuac,

inijuanti paquise miyac.

16 ¿Ajquiya nechmanahuis inimaco nopa mosisinijca masehualme?

¿Ajquiya nechmocuitahuis ten nopa taixpanoca masehualme?

17 Sinta Toteco amo nechpalehuijtosquía,

huajca noyolo ya eltosquía campa tatzitzicatoc pampa ya nimictosquía.

18 Na nitzajtzic huan niquijto:

“TOTECO, moxitanía noicxihua.”

Huan yaya nechtasojtac huan nechmaquixti.

19 NoTeco, quema san nimoyolilhuía ten miyac tequipacholi huan san ya nopa nijmati,

ta techyoltalía.

Techchihua ma nimotemachi ipan ta huan techmaca paquilisti.

20 Se tanahuatijquet cati amo quichihua cati xitahuac,

amo tijcahuas para mosentilis ica ta.

Yon amo itztoc mohuaya cati quichihua se tanahuatili cati amo xitahuac.

21 Pero tanahuatiani cati quej nopa tachihuaj, mosentilíaj huan mocamanalhuíaj para quenicatza quimictise se cati amo teno quichijtoc,

o se cati cuali monejnemiltía.

22 Pero TOTECO yaya nechmocuitahuía pampa tahuel miyac chicahualisti quipiya.

Ipan noTeco Dios nimotatía huan amo teno huelis nechajsis pampa yaya nechmanahuía.

23 Huan Toteco Dios quichijtoc para ma huetzi ininpani nopa mosisinijca masehualme nochi nopa tamanti cati amo cuali quichijtoque.

Yaya quintzontamiltis senquisa quej quisencajtoyaj quinchihuilise sequinoc.

Quena, TOTECO toDios yaya quintzontamiltis.