1 ¡TOTECO, techtacaquili quema nimotatajtía!

Xijchihuili cuenta nocamanal quema nimitztzajtzilía para techpalehui.

2 Amo ximohuejcatali ten na ipan nopa hora quema nitaijyohuía.

¡Ximohuijtzoma para techtacaquilis huan nimantzi technanquili quema nimitznotza!

3 Pampa mojmosta nonemilis tantiya quej pocti.

Huan noomiyohua nijmachilía quej tatasquía.

4 Tahuel nimococohua ipan noyolo.

Ayecmo nijpiya chicahualisti.

Niitztoc quej se xihuit cati pilintoc.

Ayecmo nimayana huan niquelcahua para nitacuas.

5 Huan pampa tahuel niaxtitoc,

tamicuahuaqui nocuetaxo ipan noomiyo.

6 Nijmati quej nielisquía nopa tzojpilot cati nemi ipan nopa tali campa amo teno eli,

o quej cuamojmojti cati iselti itztoc ipan huactoc tali.

7 Nochi yohuali ayecmo nicochi.

Niitztoc quej nopa totot cati nemi iselti huan mosehuía itzonco se cali.

8 Nocualancaitacahua mojmosta nechpinajtíaj huan nechtelchihuaj.

9 Ayecmo nijcua pantzi.

Ama nijcua cuajnexti huan cati niqui momanelohua ica noixayo,

10 pampa tahuel ticualantoc ica na.

Na nijmati techtananqui huan teipa techmajcajtoc huejca ten ta.

11 Nonemilis panoti chicahuac quej tayohuilot.

Huan notacayo pilinti quej xihuit.

12 Pero ta TOTECO, tiitztos para nochipa,

huan nochi cati tacactiyase para nochipa mitzelnamictose.

13 Na nijmati para ta timotananas huan tihualas para tijtasojtaqui altepet Jerusalén.

Huan ama ya ajsic tonali para tijtasojtas huan tijpalehuis quej tijtajtolcajtoc.

14 Pampa momasehualhua tahuel quinicnelíaj nopa teme ten itepa Jerusalén,

huan hasta quitasojtaj nopa taltepocti cati onca ipan icalles ni altepet pampa nochi moaxca ta.

15 Huajca nochi talme huan inintanahuatijcahua ma huihuipicaca iixpa TOTECO.

Quena, huihuipicase quema quiitase ihueyitilis.

16 Pampa TOTECO sempa quicualtalis altepet Jerusalén.

Huan nopona yaya monextis ica nochi ihueyitilis.

17 Yaya quintacaquilis nopa teicneltzitzi quema motatajtise,

pampa yaya nochipa mochixtoc para quintacaquilis huan quinmacas cati quitajtaníaj.

18 Niquijcuilohua ya ni para nochi cati tacactiyase teipa ma nojquiya quihueyichihuase TOTECO por nochi cati quichijtoc.

19 Pampa TOTECO quihualtachili taltipacti ten nepa ilhuicac campa eltoc itiopa.

Quena, ten ilhuicac quitachili cati onca ipan taltipacti.

20 Huan quintacaquili quema axtiyayaj imasehualhua cati tetequipanohuayayaj ipan sequinoc talme.

Huan quinmanahui imaco miquilisti.

21 Huajca miyac masehualme sempa hualase ipan altepet Jerusalén para quipaquilismacase TOTECO.

Quena, quipaquilismacase ipan nochi ni altepet.

22 Huan miyac tanahuatiani ten ni taltipacti hualase para quitequipanose huan quihueyichihuase TOTECO.

23 Yaya nechquixtili nochicahualis quema noja polihuiyaya tajco para nimiquis,

huan nonemilis quichijqui más cototzi.

24 Pero nijtzajtzili huan niquilhui:

“NoTeco Dios, ta tiitztoc para nochipa.

Amo techcahuili nimiquis quema noja nechpolohua tajco imiyaca tonali para niitztos.

25 Hasta ipejya tonali ta tijtali itzinpehualtil ni taltipacti,

huan ica momax tijsencajqui ilhuicacti.

26 Masque nochi cati tijsencajqui se tonali tamis,

ta tiitztos para nochipa.

Quena, nochi cati tijchijtoc sosolihuise quej se yoyomit,

huan ta tiquinpatas quej se tacat mopata huan moquentía se iyoyo cati yancuic,

huan nopa cati sosoltic quitahuisohua.

27 Pero ta amo quema tihuehuejtiyas.

Nochipa san se tiitztos.

Tiitztos para nochipa huan monemilis amo quema tamis.

28 Pero tojuanti cati timotequipanojcahua,

hasta toixhuihua, itztose ica temachili,

huan hasta iniixhuihua cati tacactiyase itztose cuali moixpa.”