1 Xijtascamatica TOTECO por nochi nopa huejhueyi tamanti cati yaya quichihua.

Xitepohuilica ipan nochi taltipacti cati yaya quichijtoc.

2 ¡Xijhuicatica!

Quena, xijhuicatica tiohuicat.

Xitepohuilica ten nopa huejhueyi tiochicahualnescayot cati yaya quichijtoc.

3 ¡Ximopaquilismacaca ipan Toteco!

¡Quena, xipaquica nochi amojuanti cati anquihueyichihuaj TOTECO!

4 Xijtemoca TOTECO huan ichicahualis.

Quena, nochipa xijtemoca para anquiixmatise más.

5 Xiquelnamiquica nopa tiochicahualnescayot cati yaya quichijqui por amojuanti.

Xiquelnamiquica itamachtil huan cati yaya quiijtojtoc.

6 Aniixhuihua Abraham cati itequipanojca Toteco,

huan amojuanti aniconehua Jacob cati Toteco quitapejpeni,

xiquelnamiquica.

7 Yaya TOTECO huan yaya toDios.

Cati yaya tanahuatijtoc para mochihuas, ya nopa monextía ipan nochi taltipacti.

8 Yaya amo quema quielcahuas nopa camanal sencahuali cati quichijqui,

masque tacactiyase masehualme huan ininconehua huan mil hueltas tacatise ininteipan ixhuihua,

yaya amo quielcahuas.

9 Noja eltoc nopa camanal sencahuali cati quichijqui ica Abraham huan Isaac.

10 Teipa quiompahui nopa camanal sencahuali ica Jacob para ma pano ica nochi israelitame,

huan elis para inijuanti para nochipa.

11 Huan Toteco quiijto:

“Na nimechmacas nopa tali Canaán para elis amoaxca para nochipa.”

12 Quinilhui ya ni quema inijuanti noja ayemo eliyayaj miyaqui,

huan san itztoyaj quej paxalohuani ipan tali Canaán.

13 Teipa san panotinenque ten se tali hasta seyoc tali,

huan ten se tanahuatilisti hasta seyoc tanahuatilisti.

14 Pero ipan nochi nopa tamanti Toteco amo quincahuili ma quinajsi se tamanti cati amo cuali.

Huan tanahuatiani cati quichijque campeca para quinchihuilise cati fiero,

Toteco quintatzacuilti.

15 Toteco Dios quinilhui:

“Amo xiquincuatotonica nomasehualhua cati niquintapejpenijtoc,

yon amo teno xiquinchihuilica notajtolpanextijcahua.”

16 Toteco quititanqui se hueyi mayanti ipan tali Canaán,

huan quinquixtili nochi tamanti tacualisti cati ica mopanoltiyayaj.

17 Pero teipa Toteco quititanqui se tacat ma quinyacana para quinmanahuis imasehualhua ten nopa mayanti.

Quena, elqui José cati quinamacatoyaj para ma tequipanoti san tapic ipan tali Egipto.

18 Huan nepa ipan tatzacti quimetzcocojque quema quimetzilpijque ica tepos cadena,

huan quiilpilijque se teposti iquechta.

19 Nopona itztoya José hasta ajsic nopa tonali cati TOTECO quiixquetztoya.

Quena, Toteco quiyejyeco José para quiitas sinta cuali elqui iyolo.

20 Huajca Faraón cati eliyaya hueyi tanahuatijquet, tanahuati ma quiquixtica.

Huan quicajqui ma yahui majcajtoc.

21 Teipa nopa tanahuatijquet quitali ma quinyacana nochi itequipanojcahua,

huan ma quimocuitahui nochi cati quipixtoya.

22 Elqui ya icuenta para quintatzacuiltis itequipanojcahua cati más huejhueyi,

huan para ma quintalnamicti cati huehuentzitzi.

23 Teipa Israel ajsico ipan tali Egipto,

huan itztoya nopona ihuaya iconehua ipan tali Cam.

24 Huan Toteco tahuel quinmiyaquili iixhuihua Jacob,

huan quipixque más chicahualisti,

huan amo quej inincualancaitacahua cati quinnahuatiyayaj.

25 Teipa Toteco quinyolpatac nopa egiptome,

huan quinchijqui ma quincualancaitaca nopa israelitame.

Quena, quincualancaitaque huan quinchihualtijque ma tetequipanoca san tapic.

26 Pero teipa Toteco quititanqui itequipanojca, Moisés,

huan Aarón cati yaya quintapejpenijtoya.

27 Huan inijuanti quichijque huejhueyi tanextili huan tiochicahualnescayot ipan tali Egipto.

28 Quena, Toteco quititanqui tzintayohuilot ipan nochi nopa tali,

pampa amo quitacaquilijque itanahuatil para ma quincahuaca imasehualhua ma yaca majcajtoque.

29 Teipa quicuetqui esti nochi at cati oncayaya ipan nopa tali.

Huan nopa michime mijque.

30 Teipa quintitanqui tahuel miyac temasolime ipan nochi nopa tali,

huan calajque hasta ipan nopa cuarto campa cochiyaya nopa tanahuatijquet.

31 Teipa quema Moisés camanaltic,

hualajque miyac sayolime.

Huan atime quipolcajhuicoj nopa tali.

32 Nojquiya quintitanili huejhueyi tesihuit huan amo at.

Huan tapetaniyaya campa hueli ipan nochi nopa tali.

33 Huan nopa tesihuit quinenpolo nochi xocomeca mili, huan higuera cuame,

huan quitami pojpostejqui nopa huejhueyi cuame.

34 Teipa Toteco camanaltic huan ajsicoj tahuel miyac chapolime,

hasta amo aqui hueliyaya quinpohua.

35 Huan quicuajque nochi tamanti xihuime cati oncayaya ipan nopa tali,

huan nojquiya quitamicuajque nochi tamanti pixquisti.

36 Teipa quinmicti nopa coneme cati achtohui tacatque ipan sese familia ten tali Egipto.

Quinmicti masque nopa tetatme tahuel paquiyayaj huan motepanitayayaj por nopa iniachtohui cone.

37 Huan Toteco quinquixti imasehualhua ica temachili,

huan quihuicaque miyac oro huan plata.

Huan ipan nopa tonali amo mococo yon se imasehual Toteco.

38 Huajca nopa egiptome nelía pajque quema quisque nopa israelitame,

pampa nochi inijuanti tahuel quinimacasiyayaj.

39 Toteco quipatajqui inintzonta se mixti para quinecahuilis huan amo quintatis tonati.

Huan ica tayohua quitaliyaya se tilelemecti inintzonta para ma quintaahuili.

40 Quitajtanijque ma quinmaca nacat para quicuase,

huan quintitanili solime.

Nojquiya quinmacac nopa tacualisti cati itoca “maná” cati huetzqui ten ilhuicac para ica ma ixhuica.

41 Toteco quitapo se tet huan quisqui at hasta mochijqui quej se hueyat,

cati motalo ipan nopa huactoc tali campa amo teno eliyaya.

42 Pampa yaya quielnamijqui cati ica mocajtoya itequipanojca Abraham.

43 Huajca ica miyac paquilisti Toteco Dios quinquixti imasehualhua cati quintapejpenijtoc ipan tali Egipto.

44 Huan quinmacac imasehualhua nopa talme cati elqui iniaxca masehualme cati amo israelitame.

Huan moaxcatijque ica nochi nopa pixquisti cati nopona oncayaya.

Quicuajque cuatacti cati sequinoc quitoctoyaj.

45 Nochi ya ni quichijqui para ma quichijtinemica cati quinilhuijtoya huan ma quintoquilijtinemica itanahuatilhua.

¡Paquilisti!