1 NoTeco Dios cati nimitzhueyitalía,

technanquili quema nimotatajtía ica ta,

amo san xitacacto.

2 Pampa nopa tajtacolchijca masehualme nechejelnamiquij huan nechistacahuíaj.

3 Inijuanti nechcualancaitaj huan nechyahualohuaj para nechilhuise camanali cati amo monequi.

Nechtehuíaj masque amo teno niquinchihuilijtoc.

4 Na niquinicnelía huan nimotatajtía para tiquintiochihuas.

Pero masque ya nopa nijchihua,

noja más quichihuaj campeca para nechtzontamiltise.

5 Na niquinchihuilía cati cuali,

pero inijuanti nechtaxtahuíaj ica cati amo cuali.

Masque niquinicnelía, inijuanti nechcualancaitaj.

6 NoTeco, xiquintali imaco se cati fiero.

Se cati quimati tetatelhuía ma quinhuica iixpa se juez cati fiero para ma quintajtolsencahua.

7 Huan quema ya quintajtolsencajtose, xijchihua para nochi quimatise para quihuicaj tajtacoli.

Huan quema motatajtíaj, xiquita quej elisquía tajtacolchihuaj.

8 Nimitztajtanía para inemilis nocualancaitaca ma amo huejcahua ipan ni taltipacti.

Huan seyoc tacat ma quichihua nopa tequit cati yaya quichihuayaya.

9 Iconehua ma mocahuaca icnotzitzi huan isihua ma mocahua icnotzi.

10 Iconehua ma monejnencaquixtica huan ma motaejehuijtinemica.

Ma quitemoca tacualisti huejca ten ininchaj cati ya tamisosolijtoc.

11 Ma quitamitacuijcuilica cati quitatanejtiyayaj,

huan cati seyoc tali ehuani ma quiquixtilica nochi cati quitantoc ica itequi.

12 Amo aqui ma quipalehui ica yon se tamanti huan amo aqui ma quintasojta iconehua cati icnotzitzi.

13 Ma miquica nochi iconehua.

Ma tamiixpolihuica huan ayecmo aqui ma quielnamiqui inintoca.

14 TOTECO, amo xiquelcahua nochi inintajtacolhua itatahua huan inanahua.

Huan amo xiquintapojpolhui.

15 Ma mocahua inintajtacolhua moixpa, TOTECO,

pero ayecmo aqui ma quinelnamiqui nopa masehualme ipan ni taltipacti.

16 Pampa inijuanti amo quinejque quipalehuise inihuampo.

Nojquiya quinquixtijque cati teicneltzitzi huan quinmictijque cati motequipachohuayayaj.

17 Quinpactiyaya quintelchihuase inihuampo.

Huajca ama ta nojquiya xiquintelchihua.

Amo quema quintiochijque sequinoc,

huajca ama nojquiya amo xiquintiochihua.

18 Nopa tatelchihualisti tahuel quinpactía pampa eltoc ipan nochi cati quichihuaj.

Tatelchihuaj mojmosta quej mojmosta moquentíaj iniyoyo,

o quiij at o quicuaj se tacualisti cati ajhuiyac.

19 Huajca ama ipani ma huetzi nopa tatelchihualisti,

quej elisquía se yoyomit cati quinpantzacuas o quej inintzinquechilpica.

20 Quej nopa, TOTECO, xiquintaxtahui nopa nocualancaitacahua cati nechistacahuíaj,

huan cati quinequij nechmictise.

21 Pero TOTECO, ta cati tinoTeco,

techita na quej elisquía nimocone cati nijhuica motzonquisca.

Yeca techchololti imaco nocualancaitaca pampa ta titemachti huan tinelcuali.

22 Na nitaijyohuía huan tahuel monequi motapalehuil,

Tahuel nechcocohua noyolo.

23 Niyajtinemi para nimiquis huan nitaijyohuía quej se chapoli cati quitahuiso se masehuali.

24 Notancua ayecmo quipiya chicahualisti pampa tahuel nimosajtoc.

Huan notacayo ayecmo nacayo.

25 Nochi masehualme ipan taltipacti nechhuetzquilíaj.

Yeca nochi cati nechitaj quiojoliníaj inintzonteco huan nechpinajtíaj.

26 ¡TOTECO Dios, techpalehui!

¡Techmaquixti pampa ta tahuel titetasojta!

27 Techmaquixti miyacapa,

para nochi ma quimatica para ta cati tijchijtoc, TOTECO.

28 Huan teipa sinta nechtelchihuaj, amo teno ipati,

pampa ta techtiochihuas.

Sinta motananase ica na,

pinahuase,

huan na nijsenhuiquilis nimopaquilismacas,

pampa na nimotequipanojca.

29 Ma mopinahualtica miyacapa inijuanti cati nechistacahuíaj.

Quena, xiquinpinahualti.

30 Pero na talojtzitzi nijtascamatis TOTECO,

huan nijpaquilismacas iniixpa nochi masehualme.

31 Pampa yaya itztoc inihuaya cati teicneltzitzi para quinmanahuis inimaco inincualancaitacahua.