1 Nelía niquicnelía TOTECO pampa yaya nechtacaquilía quema nimotatajtía huan nechnanquilía.

2 Huan pampa mohuijtzoma huan nechnanquilía,

nimotatajtis ica ya nochi tonali quema niyoltos.

3 Nechyahualojtoya miquilisti.

Nijmachiliyaya quej niitztosquía ipan ostot,

pampa nechajsic miyac cuesoli huan tequipacholi.

4 Huajca nijtzajtzili TOTECO huan niquilhui:

“TOTECO, techmanahui.”

5 ¡TOTECO nelía cuali iyolo!

¡Yaya senquisa xitahuac!

¡Toteco tahuel tetasojta!

6 TOTECO quinmocuitahuía cati moechcapanohuaj huan itztoque quej coneme.

Na ya nimictinemiyaya huan yaya nechmanahui.

7 Ama huelis nimosiyajquetzas pampa TOTECO nechchihuilijtoc cati cuali.

8 Nechmanahuijtoc imaco miquilisti,

quihuatztoc noixayo huan nechpalehuijtoc para ma amo nihuetzi ipan tajtacoli.

9 Ipan ni taltipacti campa itztoque masehualme,

nimonejnemiltis xitahuac iixpa TOTECO.

10 Na nijneltocayaya Toteco, huajca niquijto:

“Nitaijyohuía miyac, Toteco.”

11 Huan quema ayecmo nijmatiyaya taya nijchihuas, niquijto:

“Nochi masehualme san istacatij.”

12 Huan ama ya niitztoc cuali.

¿Quenicatza huelis nijtaxtahuis TOTECO por nochi cati nechchihuilijtoc?

13 Nijhualiquilis xocomecat iayo quej se tacajcahualisti,

huan nijhueyimatis TOTECO pampa nechmaquixtijtoc.

14 Miyacapa nijhualiquilis TOTECO nopa tacajcahualisti cati nijtajtolcahuili nijmacas.

15 TOTECO quiita para tahuel ipati ininemilis imasehualhua cati quinicnelía,

huan amo quincahuilía miquise san quej hueli.

16 TOTECO, na nimotequipanojca,

quena, niicone se nonana cati nojquiya mitztequipano.

Huan techmanahuijtoc ten campa niilpitoya.

17 Nimitzpaquilismacas huan nimitztascamatis huan ta tiquitas quej elisquía se tacajcahualisti.

18 Miyacapa nijhualiquilis TOTECO nopa tacajcahualisti cati nijtajtolcahuili nijmacas.

19 Quena, nijmacas TOTECO nopona ipan icalixpa ichaj cati eltoc ipan altepet Jerusalén.

¡Paquilisti!