1 Nelía paquij nochi cati monejnemiltíaj xitahuac,

huan cati senquisa quichijtinemij cati quiijtohua iley TOTECO.

2 Paquij nopa masehualme cati quitemohuaj TOTECO ica nochi iniyolo huan quichijtinemij cati yaya quiijtohua.

3 Pampa inijuanti amo quichihuaj cati amo cuali.

Monejnemiltíaj senquisa ipan iojhui TOTECO.

4 Ta techmacatoc motanahuatilhua para ma tijchihuaca cati quiijtohuaj.

5 ¡Tahuel nijnequisquía nijchijtinemis senquisa cati techyolmelajtoc ma tijchihuaca!

6 Quej nopa amo nipinahuasquía sinta niquinchijtinemis nochi motanahuatilhua.

7 Na nimitztascamatis ica nochi noyolo quema ya nijmachilis nochi motamachtilhua cati xitahuac.

8 Na nijchihuas nochi cati techyolmelajtoc ma tijchihuaca ipan tonemilis.

Yeca amo techtahuelcahua.

9 ¿Taya monequi quichihuas se telpocat para itztos tapajpactic moixpa, TOTECO?

Monequi quipohuas mocamanal huan quichihuas cati quiijtohua.

10 Na ica nochi noyolo nimitztemojtoc, Toteco.

Amo techcahuili nimoiyocacahuas ten motanahuatilhua.

11 Ipan noyolo nicajoctoc nochi cati tiquijtojtoc,

para amo nitajtacolchihuas ica ta.

12 TOTECO, ta cati nochi mitzhueyimatij,

technextili quenicatza nijchihuas nochi cati techyolmelajtoc.

13 Na nitepohuilijtoc nochi motamachtilhua cati ta techmacatoc.

14 Más nimopaquilismacatoc pampa ninemi ipan moojhui huan nijchihua cati ta tiquijtojtoc,

huan amo ipan ricojyot.

15 Nimoyolilhuis ten motanahuatilhua huan ninemis ipan nopa ojti campa quiijtohuaj ma ninejnemi.

16 Nimopaquilismacas ica cati techyolmelajtoc,

huan amo quema niquelcahuas mocamanal.

17 Na nimotequipanojca, techchihuili cati cuali.

Techcahuili ma niitzto miyac tonali para nijsenhuiquilis nijtepanitas mocamanal.

18 Techixtapo para niquitas nopa huejhueyi tamachtilisti cati quipiya moley.

19 Na san nipaxalohua ipan ni taltipacti.

Amo xijtati motanahuatilhua ten na pampa monequi ma nechyacana.

20 Ipan noyolo tahuel nijnequi nijchihuas nochi cati xitahuac quej quiijtohua motamachtil.

21 Ta tiquinajhua nopa taixpanoca masehualme cati mohueyimatij.

Inijuanti itztoque quej tatelchihualme pampa quinhuejcamajcahuaj motanahuatilhua.

22 Amo xiquincahuili ma nechpinahualtica pampa na nijtepanita nochi cati ta tiquijtohua.

23 Hasta nopa huejhueyi tacame cati quipiyaj tequiticayot mosehuijque para nechejelnamiquise,

pero na nimotequipanojca,

senquisa nimoyolilhuía ten nochi cati ta techyolmelajtoc.

24 Pampa motajtol nechtaahuilía huan nechconsejomaca.

25 Nelía nimotequipachohua hasta nihuetztoc ipan taltepocti.

Xijyancuili nonemilis ica mocamanal.

26 Na nimitzpohuili nochi cati nijsencajtoc nijchihuas huan ta techtacaquili.

Ama technextili quenicatza nijchihuas nochi cati techyolmelajtoc.

27 Techchihua ma nijmachili nopa ojti cati ipan ninemis para niquintoquilis nochi motanahuatilhua.

Huan na nimoyolilhuis ipan nochi nopa huejhueyi tamanti cati tijchihua.

28 Nichoca pampa tahuel nitaijyohuía.

Techyolchicahua ica mocamanal.

29 Techpalehui mojmosta para amo niistacatis.

Huan pampa techicnelía, techpalehui ma nijmati nochi moley.

30 Na nijtapejpenijtoc nopa ojti cati melahuac,

huan san nimoilhuía ten motamachtil.

31 Na nimotatzquilijtoc ipan motajtol huan nijchihuas cati quiijtohua.

¡TOTECO, amo techcahuili nihuetzis ipan pinahualisti!

32 Sinta techmacas noyolo cati cuali moixpa,

huajca na achi más nijchijtinemis cati quiijtohuaj motanahuatilhua.

33 TOTECO, technextili quenicatza nijchihuas nochi cati techyolmelajtoc.

Huan nijchijtinemis nochi tonali hasta nimiquis.

34 Techmaca talnamiquilisti huan nijchijtinemis nochi cati quiijtohua moley.

Quena, nijchijtinemis ica nochi noyolo.

35 Techyacana ipan nopa ojti cati technextilía motanahuatilhua,

pampa san ya nopa nijnequi nijchihuas.

36 Xijchihua para más ma nijnequi motajtol huan amo tomi.

37 Techhuejcatali ten nochi tamanti cati amo cuali para amo niquixtocas.

Más cuali talojtzitzi techyolchicahua para senquisa ninemis ipan moojhui.

38 Techmatilti na, nimotequipanojca, para temachti techmacas cati techtajtolcahuilijtoc,

pampa san ta nimitzimacasi huan nimitztepanita.

39 Amo techcahuili ma niquinimacasi cati nechpinahualtíaj pampa nimitztepanita,

pampa motamachtil senquisa cuali huan xitahuac.

40 TOTECO, na tahuel nijnequi nijchihuas cati quiijtohuaj motanahuatilhua.

Xijyancuili nonemilis pampa ta senquisa tixitahuac.

41 TOTECO, techtasojta huan techmaquixti ten nocualancaitacahua,

san quej tiquijtojtoc tijchihuas.

42 Quej nopa huelis niquinnanquilis inijuanti cati nechpinahualtíaj,

huan niquinmachiltis para san nimotemachía ipan mocamanal.

43 Amo techquixtili mocamanal cati melahuac huan amo techcahuili ma niquelcahua,

pampa san ipan motamachtil na nimotemachía.

44 Na nijtepanitas moley mojmosta.

Quena, para nochipa nijtepanitas moley huan amo quema tamis.

45 Ninemis nimajcajtoc pampa niquintemohua motanahuatilhua para nijchihuas cati quiijtohuaj.

46 Na niquinpohuilis motajtol tanahuatiani,

huan amo nipinahuas.

47 Na nimopaquilismacas ipan motanahuatilhua pampa tahuel niquinicnelía.

48 Nimomatananas para nijnextis notatepanitacayo por motanahuatilhua,

huan san nimoyolilhuijtinemis ten nochi cati techyolmelajtoc ma tijchihuaca ipan tonemilis.

49 Amo quema xiquelcahua cati techtajtolcahuilijtoc techchihuilis na, nimotequipanojca,

pampa san ya nopa nijchixtoc.

50 Cati techtencahuilijtoc techchihuilis nechyoltalía quema nimopantía ipan taijyohuilisti.

Quena, nochi cati tiquijtojtoc nechmaca yancuic chicahualisti ipan nonemilis.

51 Nopa masehualme cati mohueyimatij nechpinajtíaj pampa nimitztepanita, Toteco,

pero masque ya nopa, na amo nimohuejcatalis ten moley.

52 TOTECO, na niquelnamiqui motamachtil cati huejcajquiya techmacac.

Huan motamachtil nochipa nechyoltalía.

53 Nelía tahuel nicualani ica nopa taixpanoca masehualme cati quitahuelcahuaj moley.

54 Nochi cati techyolmelajtoc nechhualiquilijtoc paquilisti,

huan nechchijtoc ma nihuica campa hueli campa niitztinentoc quej niseyoc tali ejquet.

55 Ica tayohua nimitzelnamiqui, TOTECO,

huan nijnequi nijchihuas cati quiijtohua moley.

56 Nijseli tahuel miyac tatiochihualisti pampa nijchijqui cati quiijtohuaj motanahuatilhua.

57 ¡TOTECO, san ta tinoaxca!

Na niquijtojtoc para nijtepanitas cati quiijtohua mocamanal.

58 Ica nochi noyolo nijnequi motatiochihualis.

Techtasojta senquisa quej techtajtolcahuilijtoc para tijchihuas.

59 Nimotachili quenicatza nimonejnemiltiyaya

huan nimantzi nimocuetqui para nijchihuas cati quiijtohua motajtol.

60 Quena, nimoisihuiltía para nijchihuas cati quiijtohuaj motanahuatilhua.

61 Miyac taixpanoca masehualme nechyahualojtoque para ma nitajtacolchihua inihuaya,

pero na amo niquelcajtoc moley.

62 Tajco yohual nimijquehua para nimitztascamatis por motamachtil cati senquisa xitahuac.

63 Na niquinita quej nohuampoyohua nochi cati mitzimacasij huan mitztepanitaj,

huan nochi cati quichihuaj cati quiijtohuaj motanahuatilhua.

64 ¡TOTECO, nochi taltipacti temitoc ica motaicnelijcayo!

Technextili nochi cati techyolmelajtoc ma nijchihua ipan nonemilis.

65 ¡TOTECO, tahuel techchihuilijtoc cati cuali na, nimotequipanojca!

Techtiochijtoc senquisa quej tiquijtojtoc para tijchihuas.

66 NoTeco, techchihua ma nijmachili cati cuali huan techmaca talnamiquilisti,

pampa na niquinneltocatoc motanahuatilhua.

67 Achtohuiya quema ayemo techechcapantalijtoya para techtatzacuiltis,

san nimocuapolojtinenqui.

Pero ama senquisa nijchihua cati quiijtohua mocamanal.

68 Ta nelía ticuali huan tijchihua san cati cuali.

Huajca techmachti quenicatza ma nijchihua cati techyolmelajtoc para nijchihuas.

69 Nopa masehualme cati mohueyimatij nechistacahuijtoque,

pero na ica nochi noyolo nijchijtinemis cati quiijtohuaj motanahuatilhua.

70 Inijuanti huihuitique huan tzactoc inintalnamiquilis,

pero na nochipa nimopaquilismaca ipan moley.

71 Nelía cuali para techechcapantali,

pampa technextili para ma nijchihua nochi cati techyolmelajtoc ma tijchihuaca ipan tonemilis.

72 Para na más ipati moleyes huan amo millones ten oro huan plata.

73 TOTECO, ta ica momax tijsencajqui notacayo.

Huajca ama techpalehui ma niquinmachili motanahuatilhua huan niquintzontecomatis.

74 Nochi cati mitztepanitaj huan motemachíaj ipan ta,

paquise quema nechitase,

pampa na nimotemachía ipan mocamanal.

75 TOTECO, na nijmati para motamachtil senquisa xitahuac.

Huan nopa tatzacuiltili cati techmacatoc nojquiya xitahuac,

huan nechhualiquilis tamanti cati cuali.

76 Huajca ama techyoltali ica moteicnelijcayo,

senquisa quej techilhuijtoc na, nimotequipanojca, para tijchihuas.

77 Techyahualo ica motaicnelijcayo para ma niyolto,

pampa san ipan moley nijpantía paquilisti.

78 Ma huetzica ipan pinahualisti nopa masehualme cati mohueyimatij,

pampa tahuel nechcocojtoque ica iniistacaticayo.

Pero na san nimoyolilhuijtinemis cati quiijtohuaj motanahuatilhua.

79 Ma sempa mosentilica nohuaya nopa masehualme cati mitzimacasij huan mitztepanitaj,

huan cati quiixmatij motajtol.

80 Xijchihua para noyolo ma monejnemilti xitahuac ipan nochi cati techyolmelajtoc.

Huan quej nopa amo quema nimopinahualtis.

81 Na nitapolosnequi pampa nijchiya para techmaquixtis ten nocualancaitacahua,

pampa nimotemachijtoc ipan cati tiquijtojtoc para techchihuilis.

82 Noixteyolhua siyahuij pampa quinequij quiitase ma pano nochi cati techtajtolcahuilijtoc para tijchihuas.

¿Hasta quema techyoltalis ica motapalehuil?

83 Ya nihuehuentzi huan nitzocoyolijtoc quej se cuetax bolsa cati quitalijtoque campa pocti,

pero amo niquelcajtoc cati techyolmelajtoc.

84 ¿Quesqui tonali monequi nijchiyas para tiquintatzacuiltis cati nechtoquilijtinemij?

85 Nopa masehualme cati mohueyimatij huan cati quicualancaitaj moleyes quichijtoque se hueyi ostot para ma nimasi.

86 Techpalehui, pampa motanahuatilhua senquisa xitahuac,

huan nechtepotztocatinemij masque amo teno nijchijtoc.

87 San quentzi nechixpolihuiltisquíaj,

pero na amo niquinixpanotoc motanahuatilhua yon amo niquincajtoc.

88 Pampa hueyi moyolo, techcahuili ma niitzto.

Huan quej nopa nijsenhuiquilis nijchihuas cati quiijtohua motajtol.

89 TOTECO, mocamanal eltos temachti para nochipa nepa ilhuicac.

90 Mojmosta ta titemachti huan tiitztos temachti ica nochi cati tacactiyase para nochipa.

Cuali ta tijtatzquilti ni tali huan quej nopa eltoc.

91 Nochi tamanti mocahua campa tiquinnahuati ma eltoca hasta ama ni tonal.

Quena, nochi tamanti cati tijchijqui mitzneltocaj huan mitztequipanohuaj.

92 Sinta amo nimopaquilismacatosquía ipan moley,

huajca ya nimictosquía ica tequipacholi.

93 Amo quema niquinelcahuas motanahuatilhua,

pampa ica motanahuatilhua techmacatoc yancuic chicahualisti.

94 Na nimoaxca, techmaquixti pampa nochipa nijchijtinentoc cati quiijtohuaj motanahuatilhua.

95 Masque nopa taixpanoca tacame motatise ipan ojti para nechtzontamiltise,

na san nimoyolilhuijtos ten motajtol.

96 Nochi tamanti cati más cuajcualtzi niquitztoc canque ontami,

pero motanahuatilhua, amo quipiyaj inintamiya.

97 ¡Tahuel niquicnelía moley!

San ten ya nimoyolilhuijtinemi semilhuit.

98 Motanahuatilhua nechchijtoque más nitalnamiqui que nocualancaitacahua.

Pampa motanahuatilhua nechyacantiyahuij mojmosta.

99 Quena, achi más nitalnamiqui hasta niquintani inijuanti cati notamachtijcahua,

pampa na nimoyolilhuijtinemi ten motajtol.

100 Na más nijmachilía que nopa huehue tacame,

pampa nijchihua cati quiijtohuaj motanahuatilhua.

101 Amo quema nijnectoc nijtoquilis se ojti cati amo cuali,

pampa senquisa nijnequi nijchihuas cati quiijtohua mocamanal.

102 Amo nimohuejcatalijtoc ten motamachtil,

pampa ta technextilía quenicatza ma nimonejnemilti.

103 Nijmati nelía ajhuiyac mocamanal.

Achi más tzopelic nijmati que sayolnecti.

104 Motanahuatilhua nechmacaj talnamiquilisti.

Yeca amo nijnequi niquitas yon se tamanti istacatili.

105 Mocamanal eltoc quej se taahuili cati quitaahuilía noojhui campa ninejnemi para amo nimotepotanis.

106 Se huelta nitatestigojquetzqui,

huan ama sempa nitatestigojquetzas para nijchihuas cati quiijtohuaj motamachtilhua pampa nelía xitahuac.

107 TOTECO, nechca eltoc para nimiquis inimaco nocualancaitacahua.

Techmaca yancuic chicahualisti quej tiquijtojtoc para tijchihuas.

108 TOTECO, nimitztajtanía xijseli nopa tascamatili cati nimitzmaca quej se tacajcahualisti.

Huan technextili motamachtil.

109 Mojmosta nimopantía campa mahuilili para nonemilis,

pero amo niquelcajtoc moley.

110 Nopa taixpanoca masehualme quitalíaj taquetzti para ma nimasi huan nihuetzis ipan tajtacoli,

pero na amo nimoiyocanequis ten motanahuatil.

111 Na san nimoaxcatijtoc motajtol,

pampa san ipan motajtol nijpantía paquilisti.

112 Ica nochi noyolo nijchihuas cati quiijtohuaj motanahuatilhua nochipa hasta nimiquis.

113 Amo nijnequi niquinitas masehualme cati quichihuaj ome inixayac.

Pero na niquicnelía moley.

114 Ipan ta nimotatía para amo nechcocose nocualancaitacahua huan ipan ta nimomanahuía.

Pampa nimotemachía san ipan mocamanal.

115 Ma nechtalcahuica nopa masehualme cati fiero inintalnamiquilis.

Ma amo nechcuatotonica pampa na nijnequi nijchihuas cati quiijtohuaj motanahuatilhua, Toteco Dios.

116 Huajca noTeco, techmaca yancuic fuerza senquisa quej techtajtolcahuili.

Huan quej nopa sequinoc amo quema huelis quiijtose para san tapic nimochixtoc ipan ta.

117 Techfuerzajmaca para nimomaquixtis inimaco nocualancaitacahua,

huan nochipa nijpiyas paquilisti para nijchihuas cati techyolmelajtoc.

118 Ta tiquinhuejcamajcajtoc nochi cati quitahuelcahuaj cati techyolmelajtoc.

Inijuanti quiijtohuaj talnamiquij, pero amo cana, san mocajcayahuaj.

119 Nochi masehualme cati quinpactía tajtacolchihuaj ipan ni taltipacti tiquinita quej itetejtzo teposti cati mocahua quema tijmolonía para tijtapajpacchihuas.

Pero na niquicnelía huan nijtepanita motajtol.

120 Nochi notacayo huihuipica pampa mitzimacasi huan mitztepanita, Toteco.

Huan nojquiya niquimacasi motatzacuiltil,

huan yeca amo nijnequi nimitzixpanos.

121 Na nijchijtoc cati xitahuac huan cati melahuac moixpa.

Amo techtahuelcahua inimaco nocualancaitacahua.

122 Xitatestigojquetza para techtiochihuas na, nimotequipanojca.

Amo xiquincahuili ma nechtaijyohuiltica nopa masehualme cati mohueyimatij.

123 Campa hueli nitachixtoc pampa nijchixtoc techmaquixtiqui ten nocualancaitacahua,

hasta siyajtoque noixteyolhua.

Nijchixtoc techmanahui senquisa quej tiquijtojtoc para tijchihuas.

124 TOTECO, ipan motaicnelijcayo techchihuili cati cuali na, nimotequipanojca.

Technextili quenicatza nijchihuas cati techyolmelajtoc ma tijchihuaca.

125 Na nimotequipanojca, techmaca talnamiquilisti,

para niquixmatis motajtol.

126 TOTECO, ya ajsic tonali para timonextis huan tijchihuas cati tiquita para cuali.

Pampa ni taixpanoca masehualme ayecmo quitepanitaj moley.

127 Pero na más niquinicnelía motanahuatilhua huan amo quej oro cati senquisa cuali.

128 Pampa nochi motanahuatilhua nelía xitahuac.

Yeca amo nijnequi niquitas yon se tamanti istacatili.

129 Motajtol nelía cuajcualtzi, TOTECO,

yeca nijtoquilijtinemi ica nochi noalma.

130 Quema quiixtomaj mocamanal,

techtaahuilía huan techtalnamictía nochi timasehualme,

hasta nojquiya masehualme cati pilquentzi quimachilíaj.

131 Yeca tahuel nijnequi niquixmatis más cati quiijtohuaj motanahuatilhua,

huan ya nopa nijtemohua.

132 Techtachili huan techtasojta,

quej timomajtoc tiquinchihuilía cati mitzicnelíaj.

133 Techyacana ipan se cuali ojti ica mocamanal para amo nechtanis yon se taixpanoli.

134 Techmanahui ten nopa tacame cati mosisiníaj huan quinequij nechtaijyohuiltise.

Huan quej nopa nijchihuas cati quiijtohuaj motanahuatilhua.

135 Ma monexti moteicnelijcayo ipan moxayac quema techtachilía na, nimotequipanojca,

huan techmachti nochi cati techyolmelajtoc para ma tijchihuaca.

136 Tahuel nichoca pampa miyac masehualme amo quitepanitaj moley.

137 TOTECO, ta nelía tixitahuac huan nochi tatzacuiltili cati titemaca nojquiya xitahuac.

138 Nochi motajtol xitahuac huan temachti para ipan ma timotemachica.

139 Nelía nimotequipachohua huan nicualani,

pampa nocualancaitacahua amo quitepanitztoque cati ta tiquijtojtoc.

140 Nochi moley nijyejyecojtoc huan niquitztoc para nelía tatzejtzeloltic.

Yeca niquicnelía.

141 Nelía niteicneltzi huan miyac amo quinequij nechitase,

pero na amo niquinelcajtoc motanahuatilhua.

142 Ta tijchihua cati xitahuac para nochipa huan moley senquisa melahuac.

143 Nopani huetztoc tequipacholi huan taijyohuilisti,

pero motanahuatilhua san ya nopa nechyolchicahuaj.

144 Motajtol nochipa xitahuac.

Techmaca talnamiquilisti para nijmachilis huan quej nopa huelis niitztos.

145 Ica nochi noyolo nimitztzajtzilía.

Technanquili noTeco, huan nijchihuas cati techyolmelajtoc.

146 Na nimitztzajtzilía huan nimitzilhuía:

“Techmaquixti ten nocualancaitacahua”,

huan nijchihuas cati quiijtohua motajtol.

147 Nimijquehua ica ijnaloc quema ayemo quisa tonati,

huan nimitztzajtzilía, TOTECO, pampa san ipan mocamanal nimotemachía.

148 Ica tayohua amo nicochi pampa san nimoyolilhuía ten nochi cati tiquijtojtoc techchihuilis.

149 Techtacaquili pampa titetasojta, TOTECO.

Techmaca yancuic chicahualisti quej quiijtohua motamachtil para tijchihuas.

150 Nechca hualahuij nopa tacame cati mosisiníaj huan nechtepotztocatinemij.

Inijuanti mohuejcatalijtoque ten moley.

151 Pero ta tinoTeco tiitztoc nonechca.

Nochi motanahuatilhua senquisa melahuac.

152 Hasta quema niitztoya nipilquentzi niquixmatqui motajtol,

huan nijmatqui para motajtol amo quema mopatas para nochipa.

153 Xijtachili notaijyohuilis huan techmanahui,

pampa amo niquelcajtoc moley.

154 Quena, techtenpalehui huan techmanahui quej techtajtolcahuilijtoc tijchihuas.

155 Amo tiquinmaquixtis nopa masehualme cati amo mitztepanitaj.

pampa inijuanti amo quitacaquilíaj cati techyolmelajtoc.

156 TOTECO, ta tahuel techtasojta.

Techmaca yancuic chicahualisti quej quiijtohua motamachtil para tijchihuas.

157 Miyac nocualancaitacahua nechtepotztocatinemij huan quichihuaj campeca para ma nimitzixpano,

pero na amo nijcajtoc motajtol.

158 Na niquincualancaita nopa tacajcayahuani,

pampa inijuanti amo quichihuaj cati quiijtohua mocamanal.

159 Xiquita TOTECO, na tahuel niquinicnelía motanahuatilhua.

Techmaca yancuic chicahualisti pampa ta nelía ticuali,

huan hueyi moyolo.

160 Nochi mocamanal senquisa melahuac.

Quena, nochi motamachtil senquisa xitahuac huan huejcahuas para nochipa.

161 Tacame cati quipiyaj tequiticayot nemij notepotzco para nechcocose masque amo teno niquinchihuilijtoc,

pero ipan noyolo san niquimacasi para niquixpanos mocamanal.

162 Na nimopaquilismaca ipan mocamanal quej se cati paqui miyac quema quipantijtoc cati tahuel patiyo.

163 Nijcualancaita nochi tamanti istacatili,

pero niquicnelía miyac moley.

164 Nimitzhueyimati chicome huelta ipan se tonal,

huan nimitztascamati pampa xitahuac motamachtil.

165 Nochi cati quiicnelíaj moley quipiyaj miyac tasehuilisti ipan iniyolo,

huan amo huetzise ipan tajtacoli.

166 TOTECO, tahuel nimochixtoc para techmaquixtis

huan yeca niquintepanita motanahuatilhua.

167 Na nijneltoca motajtol huan niquicnelía ica nochi noyolo.

168 Na nijchihua cati quiijtohuaj motanahuatilhua huan motajtol,

pampa ta tiquixmati nochi cati nijchihua.

169 TOTECO, xijtacaquili cati nimitztajtanía,

techmaca talnamiquilisti senquisa quej tiquijtojtoc para tijchihuas.

170 Xijtacaquili cati nimitztajtanía quema nimotatajtía,

huan techmanahui quej tiquijtojtoc techchihuilis.

171 Na nimitzpaquilismacas,

pampa ta technextilijtoc quenicatza nijchihuas nochi cati techyolmelajtoc ma tijchihuaca.

172 Nitepohuilis nochi cati tiquijtojtoc,

pampa nochi motanahuatilhua senquisa xitahuac.

173 Ximocualtali para techmanahuis,

pampa na nijtapejpenijtoc nijchihuas cati quiijtohuaj motanahuatilhua.

174 TOTECO, nijnequi techmaquixtiqui,

pampa na san nimopaquilismaca ica moley.

175 Techcahuili ma noja niitzto para nimitzhueyimatis.

Xijcahuili para motamachtil ma nechpalehui.

176 Na nimocuapolojtoc quej se pilborregojtzi,

yeca xihuala para techtemoqui,

pampa na amo niquelcajtoc para niquintepanitas motanahuatilhua.