1 ¡Xijpaquilismacaca TOTECO!

Quena, xijpaquilismacaca nochi amojuanti anitequipanojcahua.

2 Xijpaquilismacaca nochi amojuanti cati anitztoque ipan ichaj TOTECO huan cati annentinemij icalixpa.

3 Xijpaquilismacaca TOTECO pampa yaya nelía cuali.

Xijhuicatica ica tiohuicat pampa yaya hueyi iyolo.

4 Pampa TOTECO quitapejpenijtoc Jacob para quiicnelis.

Quintapejpeni nochi iixhuihua ma elica iaxcahua.

5 Na nijmati para TOTECO tahuel hueyi.

Nijmati para yaya tahuel más hueyi que nochi cati quintocaxtíaj “dioses”.

6 TOTECO quichihua nochi cati quinequi quichihuas ipan ilhuicacti, taltipacti,

huan ipan hueyi at huan campa más huejcata.

7 Quichihua para ipan nochi taltipacti ma motanana mixti,

huan nojquiya quititani tapetanilot huan quichihua ma huetzi at.

Yaya quinahuatía ma quisa nopa ajacat campa moajoctoc.

8 Quichijqui ma miqui nopa achtohui ejquet ipan sese familia ten tali Egipto,

huan nopa achtohui ejquet ten inintapiyalhua.

9 Quichijqui huejhueyi tiochicahualnescayot ipan tali Egipto iixpa Faraón huan itequipanojcahua.

10 Quintzontamilti miyac masehualme ipan miyac talme.

Quinmicti tanahuatiani cati quipiyayayaj miyac chicahualisti.

11 Quimicti Sehón cati eliyaya inintanahuatijca nopa amorreos.

Nojquiya quimicti Og tanahuatijquet ten tali Basán huan nochi nopa tanahuatiani ipan tali Canaán.

12 Huan nochi nopa tali cati quinahuatiyayaj nopa tanahuatiani quincuili,

huan quinmacac nopa talme nopa israelitame quej elisquía se tamanti cati inintata quincahuilijtejqui.

13 TOTECO, masehualme mitzelnamictose para nochipa.

Nochi masehualme cati tacactiyase mitzixmajtose para tahuel tihueyi.

14 Pampa TOTECO quintajtolsencahuas xitahuac nochi imasehualhua,

huan yaya quintasojtas itequipanojcahua.

15 Nopa masehualme cati itztoque ipan talme cati amo quiixmatij Toteco,

quinhueyichihuaj teteyome ten oro huan plata cati quinchijchijtoque ica inimax.

16 Nopa teteyome quipiyaj inincamac, pero amo camanaltij,

quipiyaj iniixteyol, pero amo tachiyaj.

17 Quipiyaj ininacas, pero amo tacaquij,

huan nojquiya amo hueli taijyotilanaj.

18 Nopa masehualme cati quinchijchihuaj nopa teteyome san se huihuitique quej nopa teteyome,

huan nojquiya san se huihuitique cati ininpan motemachíaj.

19 ¡Anisraelitame, xijpaquilismacaca, TOTECO!

Amojuanti antotajtzitzi cati aniixhuihua Aarón, xijpaquilismacaca TOTECO.

20 Aniixhuihua Leví, xijpaquilismacaca TOTECO.

Huan nochi amojuanti cati anquiimacasij huan anquitepanitaj TOTECO,

xijpaquilismacaca.

21 Nochi masehualme ipan altepet Jerusalén ma quipaquilismacaca TOTECO pampa yaya itztoc nica ipan altepet Jerusalén.

¡Paquilisti!