1 TOTECO, ta techyoltachilijtoc huan tijmati nochi ten na.

2 Ta cuali tijmati sinta nimosehuía o nimoquetza.

Huan quema niitztoc huejca,

ta tijmati taya nijpixtoc ipan notalnamiquilis.

3 Ta technextilía nopa ojti cati monequi nijtoquilis,

huan techilhuía canque nicalaquis huan canque nimosiyajquetzas.

Sesen talojtzi ta tijmati canque niitztoc.

4 Ta TOTECO, tijmati taya niquijtos hasta quema ayemo nicamanalti.

5 Ta techyahualojtoc pampa tiya ica noixpa huan ica noica,

huan nopani tijtalía momax para techtiochihuas.

6 Nochi ni tamanti cati ta tijmati nelía cuajcualtzi,

huan ohui para nijneltocas.

7 Amo cana hueli nimotatis ten moTonaltzi.

Amo cana huelis nimotatis huan amo tiitztos nopona.

8 Sinta nitejcos hasta ilhuicac para nimotatis,

ta nopona tiitztoc.

Huan sinta niyasquía ipan nopa hueyi ostot campa itztoque mijcatzitzi,

ta nepa tiitztoc.

9 Sinta nijpiyasquía noeltapal huan nipatanisquía,

huan niquixcotonasquía nopa hueyi at,

10 hasta nepa techyacanasquía ica mohueyi chicahualis.

11 Sinta nijchihuasquía campeca para nimotatis ipan tzintayohuilot,

nopa tzintayohuilot mocuepasquía taahuili yahualtic ten na,

pampa ta tiitztos nopona.

12 Pampa yon nopa tzintayohuilot amo hueli techtatis moixpa, Toteco.

Pampa para ta nopa yohuali taahuía quej elisquía tonaya.

Nopa tzintayohuilot huan taahuili ta tiquita san se.

13 Ta tijsencajqui sesen tamanti cati onca iijtic notacayo.

Huan quema niitztoya iijtico nonana,

tijmotzquilti sesen tamanti cati nijpiya.

14 Nimitztascamati pampa techsencajqui ma nieli se tamanti cati nelía cuajcualtzi.

Quena, nopa tequit cati tijchijqui quema techsencajqui nel pano yejyectzi,

San nijtetzaita para nimoilhuis ten nochi cati ta tijchijtoc ipan notacayo.

15 Ta techtachilijtoya quema na nipejqui nimoscaltía nel nimotatijtoya ten nochi sequinoc ipan iijtico nonana.

Quema amo aqui más quitachilijtoya,

ta techchijchijqui ica mohueyi yajatil,

quej se cati cuali quimati taxinepalohua.

16 Ta techitac quema ayemo nitacatiyaya.

Huan quema ayemo nitaijyotilanayaya, tiquixquetzqui quesqui tonali niitztosquía.

Huan sesen tonali cati niitztosquía huan taya nopantis,

ta tiquijcuilo ipan moamatapohual.

17 Toteco Dios, nijmachilía nelía cuajcualtzi quema nimomaca cuenta para ta tijsenhuiquilía timoyolilhuía ten na.

18 Hasta amo hueli nijpohua quesqui huelta timoyolilhuía ten na ipan se tonal.

Huan ica ijnaloc quema niisa,

ta noja timoyolilhuijtoc ten na.

19 Toteco Dios, nelía elisquía cuali sinta tiquintzontamiltisquía nochi masehualme cati amo mitztepanitaj.

Xijchihua ma nechtalcahuica nopa temictiani,

20 pampa inijuanti mitztaijilhuíaj,

huan san quiahuilmatij motoca.

21 TOTECO, ¿amo quinamiqui para niquincualancaitas inijuanti cati mitzcualancaitaj?

¿Amo quinamiqui nicualanis ica mocualancaitacahua?

22 Quena, tahuel niquincualancaita,

pampa niquinita quej nojquiya elisquíaj nocualancaitacahua na.

23 NoTeco Dios, xijtachili noyolo huan xiquita nochi cati eltoc nopona.

Huan xijyejyeco notalnamiquilis para tiquitas sinta xitahuac cati nimoilhuía.

24 Technextili sinta ipan notalnamiquilis onca se talnamiquilisti cati amo mitzpactía,

huan techyacantiya ipan nopa ojti cati tehuica campa onca nemilisti para nochipa.