1 Ma nochi quipaquilismacaca TOTECO cati nechtatía para amo nechajsise nocualancaitacahua.

Yaya nechyacana huan nechnextilía quenicatza nitatehuis.

2 Yaya nechtasojta huan yaya nechpixtoc campa temachti.

Yaya nechpixtoc imaco huan nechchololtis ten nocualancaitacahua.

Yaya notamanahuijca huan ipan ya nimotemachijtoc.

Yaya quintalijtoc nomaco miyac talme ica inimasehualhua para ma niquinnahuati.

3 TOTECO, ¿taya topati timasehualme para toca timocuatotonía?

¿Taya topati para tahuel ta techpatiita?

4 Pampa tonemilis san panotehua quej se ajacat huan quej se ecahuili.

5 TOTECO, xijcuilpacho nopa ilhuicacti huan xitemo techpaxaloqui.

Sinta tiquinajsis nopa tepeme, popocase.

6 Xijtitani tapetanilot quej elisquía cuataminti,

huan xiquinsemana nochi mocualancaitacahua huan ma ayecmo quimatica taya quichihuase.

7 Hasta ten nepa ilhuicac xijxitahua momax huan techmaquixti.

Techchololti inimaco ni nocualancaitacahua cati ehuani ipan sequinoc talme huan tahuel quipiyaj chicahualisti.

Na nijmati quej nimisahuisquía ipan se at cati tahuel huejcata.

8 Inijuanti san quinpactía istacatise.

Tatestigojquetzaj para quiijtose cati melahuac,

huan nimantzi istacatij.

9 NoTeco Dios, na nihuicas huicat cati yancuic,

huan nitatzotzonas ipan noarpa cati quipiya majtacti cuerdas.

10 Pampa ta cati tiquinchihua ma tatanica tanahuatiani.

Ta cati techmaquixti na nimotequipanojca, David, para ma amo nechmictica ica macheta.

11 Nojquiya techmaquixti huan techmanahui inimaco nocualancaitacahua,

pampa inijuanti san teistacahuíaj huan tacajcayahuaj.

12 Xijchihua para totelpocahua ma elica tejtetique huan huejcapantique quej cuame cati cuajcualtzi moscaltíaj.

Huan toichpocahua ma elica cuajcualtzitzi,

quej nopa taquetzalme cati quinyejyecchijtoque,

huan quinquetztoque ipan ininchajchaj tanahuatiani.

13 Xijchihua para tocoxtalhua ma temica ica miyac tamanti pixquisti.

Huan toborregojhua ma momiyaquilica hasta ma mochihuaca miles huan millones ipan topotrero.

14 Xijchihua totorojhua ma quipiyaca miyac chicahualisti para tequitise.

Amo xijcahuili yon se tocualancaitaca ma quiyahualo toaltepe.

Techmaca tasehuilisti campa hueli.

Amo xijcahua para se ten tomasehualhua monequis tetzajtzilis para ma quinpalehuica pampa quipanti cati fiero ipan tocalles.

15 Quena, nelía paquij nopa masehualme ipan se altepet cati quej ni eltoc,

huan amo quipiya cati fiero.

Quena, nelía paquij cuali masehualme cati quipiyaj TOTECO quej ininDios,

huan ipan ya motemachíaj.