1 Xijpaquilismacaca TOTECO pampa nelía cuali para tihuicase tiohuicat para ya.

¡Nelía cuajcualtzi huan quinamiqui!

2 TOTECO sempa quicualtalis altepet Jerusalén,

huan quinsentilis nopa israelitame cati quinsemanqui,

huan itztoque ipan sequinoc talme quej seyoc tali ehuani.

3 Yaya quinyolchicahua cati quipiyaj yoltequipacholi huan quinpajtía campa mococojtoque.

4 Yaya quimati quesqui imiyaca sitalime onca huan sesen quintocaxtalijtoc.

5 Toteco nelía hueyi huan quipiya miyac chicahualisti.

Italnamiquilis amo aqui hueli quitamimachilía.

6 TOTECO quinhueyitalía cati moechcapanohuaj,

pero nochi amo cuajcualme quintahuisos talchi.

7 Xihuicaca para anquitascamatise TOTECO.

Xihuicaca por nochi cati quichijtoc toDios huan xitatzotzonaca ica arpa.

8 Toteco yaya quitzacua ne ilhuicacti ica mixti.

Yaya taahuetziltía ipan taltipacti.

Quichihua ma moscalti xihuit ipan cuatitamit.

9 Yaya quintamaca nopa tecuanime cati nemij cuatita.

Ininpilconehua nopa cacalot quintamaca,

quema pehuaj chocaj pampa mayanaj.

10 Quema Toteco quiita se cahuayo cati motalohua chicahuac,

o quema quiita se tacat cati quipiya miyac fuerza,

amo paqui por ininchicahualis.

11 Pero TOTECO quipantía miyac paquilisti ipan masehualme cati quitepanitaj.

Quipantía miyac paquilisti ipan cati mochiyaj ipan ya iteicnelilis.

12 Nochi amojuanti ipan ni altepet Jerusalén,

xijhueyimatica TOTECO.

Quena, nochi cati itztoque ipan tepet Sion,

xijpaquilismacaca amoDios.

13 Pampa yaya cuali quitzactoc icaltehua amoaltepe para amo hueli quitapos yon se amocualancaitaca.

Huan yaya tahuel quintiochijtoc amoconehua.

14 Yaya quititanis tasehuilisti ipan nochi amotal,

huan amechmacas trigo cati más cuali para ica ximopanoltica.

15 Yaya quintitanis itanahuatilhua ipan nochi taltipacti.

Huan quema yaya camanaltis,

icamanal nimantzi ajsis hasta campa hueli techaj.

16 Yaya quichihuas ma huetzi sital set cati chipahuac quej nexti.

Huan quiijtzelohua tasesecayot ipan tali hasta campa hueli.

17 ¿Ajquiya hueli quiijyohuis nopa tasesecayot?

18 Pero teipa yaya quinahuatis ma huala tatotonilot huan atiyas nopa tasesecayot.

Quichihuas ma pehua taajacas huan nopa at cati mochijqui tasesecayot ipan atajti sempa motalos.

19 Yaya quinmacac israelitame itanahuatilhua,

huan quinilhuijtoc nochi cati cuali ma quichihuaca ipan inialtepe,

para tetajtolsencahuase xitahuac.

20 TOTECO amo quinchihuilijtoc ni tamanti masehualme ipan sequinoc talme.

Inijuanti ayemo quiixmatij itanahuatilhua, pero tojuanti, quena.

¡Paquilisti!