Nopa Amatlajcuiloli para nopa Hebreo Tlaneltocani
Miyac israelitame quineltocatoyaj Tohueyiteco Jesucristo, pero tlacame quintlaijiyohuiltiyayaj pampa quineltoquiliyayaj. Huajca sequin inijuanti itztoyaj nechca para quicahuase Tohueyiteco huan sampa quichihuase nopa tlamantli tlen quichihuayayaj huejcajquiya. Yeca tlen quiijcuilo ni amatlajcuiloli quichijqui campeca para quinyolchicahuas huan quinfuerzajmacas para quisenhuiquilise quitoquilise Tohueyiteco. Sequin moilhuiyayaj para Moisés o elhuicac ehuani itztoyaj más hueyi que Jesús. Ni amatlajcuiloli technextilía nopa hueyi tlamachtilistli para san yajaya Tohueyiteco Jesucristo tlen más hueyi tlen nochi sequinoc.
Hebreos quipiya majtlactli partes:
Hebreos 1:1-3 Jesús tlen Icone Toteco itztoc para nochipa huan yeca más hueyi que nochi itiocamanalojcahua Toteco.
Hebreos 1:4 ―- 2:18 Jesús itztoc más hueyi que elhuicac ehuani.
Hebreos 3:1 ―- 4:13 Jesús itztoc más hueyi que Moisés huan Josué.
Hebreos 4:14 ―- 7:28 Jesús itztoc se totajtzi tlen más hueyi que nopa totajtzitzi tlen itztoyaj huejcajquiya pampa Toteco quitlalijtoc para elis totajtzi para nochipa.
Hebreos 8:1 ―- 9:28 Ica Jesús Toteco quichihuas se tlajtolsencahuali ica tlacame tlen yancuic huan tlen más cuali que nopa achtohui tlajtolsencahuali.
Hebreos 10:1-39 Imiquilis Jesús achi más ipati que ininmiquilis nopa tlapiyalime tlen temacayayaj queja tlacajcahualistli huejcajquiya, pampa imiquilis temachtli mitzmaquixtis tlen motlajtlacolhua huan nopa tlapiyalime, axtle.
Hebreos 11 Tlaneltoquili eltoc tlen más ipati huan yeca techilhui tlen miyac huejhueyi israelitame quineltocaque Toteco.
Hebreos 12 Quinyolchicahua nopa israelita tlaneltocani para ma mochihuaca temachme hasta itlamiya tonali. Ma tijtlalica totlachiyalis ipan Jesús.
Hebreos 13:1-19 Quejatza ma timonemiltise para tijpaquilismacase Toteco.
Hebreos 13:20-25 Se tlamaijtoli huan quinnahuatijtehua.
1
Toteco technojnotztoc ica Icone, Jesucristo
1 Huejcajquiya Toteco Dios quinnojnotzqui tohuejcapan tatahua miyac huelta ica itiocamanalojcahua. Quemantzi quinnojnotzqui itiocamanalojcahua ipan temictli, quemantzi ica tlanextili huan quemantzi itztoya nechca inijuanti quema quincamahuiyaya. 2 Pero ama ipan ni itlamiya tonali Toteco technojnotztoc ica Icone tlen yajaya techtitlanili. Toteco Dios quitequimacac Icone ma quichijchihua nochi tlamantli tlen onca huan quiijtojtoc para nochi tlen onca eltoc iaxca. 3 Itlatlanex Toteco Dios tlahuía ipan Icone pampa Icone itztoc san se ica ya. Quena, Jesucristo itztoc queja iixcopinca tlen technextilía quejatza itztoc Toteco Dios. Ica itlajtol, Icone Toteco quimajcuitoc nochi tlen onca ipan tlaltepactli huan elhuicactli campa eltoc, pampa itlajtol tlahuel quipiya chicahualistli. Yajaya mijqui para techpajpacas tlen totlajtlacolhua huan teipa yajqui elhuicac huan mosehuito inejmatl Toteco Dios campa más onca tlatlepanitacayotl.
Icone Toteco itztoc más hueyi que nochi ielhuicac ejcahua Toteco
4 Ya ni technextilía para Icone Toteco itztoc más hueyi que nochi elhuicac ehuani, pampa Toteco quimacac Icone tequihuejcayotl1:4 O se itoca. tlen onpano más hueyi que nopa tlen ielhuicac ejcahua quipiyaj. 5 Toteco Dios ax quema quiilhuijtoc se elhuicac ejquetl tlen quiilhui Icone.
Quiijto: “Ta tiNocone.
Ama nitlayolmelahua tlamiyacapa para na nimoTata.”
Huan ax quema quiijto tlen se elhuicac ejquetl:
“Na nielis iTata huan yajaya elis Nocone.”
6 Huan sejcoyoc ipan iTlajtol Toteco ijcuilijtoc nopa tlen Toteco quiijto quema quiixnextis Icone tlen quipiya hueyi tlatlepanitacayotl ipan ni tlaltepactli. Quiijto:
“Ma quihueyichihuaca nochi noelhuicac ejcahua.”
7 Pero tlen inintequi elhuicac ehuani, quiijtohua:
“Toteco Dios quinchijqui ielhuicac ejcahua ma itztoca tonaltzitzi.
Quena, quintequihuía queja tlayolmelahuani tlen itztoque queja tlilelemectli.”
8 Pero quema Itlajtol Toteco camati tlen Icone, quiijto:
“Ta tiDios, titlanahuatis para nochipa huan ax quema tlamis motlanahuatilis.
Titlatlajtolsencahuas senquistoc xitlahuac huan temachtli.
9 Mitzpactía nochi tlen cuali huan tijcocolía nochi tlen ax cuali.
Yeca Toteco Dios, yajaya tlen moTeco,
mitztequitlalijtoc tiitlanahuatijca huan mitzmacatoc más paquilistli que nochi sequinoc.”
10 Nojquiya Toteco Dios quiilhui Icone:
“NoTeco, ipan ipejya nochi tlen onca, ta tijchijchijqui itlatzinpehualtil tlaltepactli.
Ta tijchijchijqui nochi hasta elhuicactli ica moma.
11 Nochi inijuanti tlamise, pero ta, tiitztos para nochipa.
Tlaltepactli huan elhuicactli sosolihuise queja sosolihui se yoyomitl.
12 Tiquinmimilos queja elisquía se tlaquemitl tlen sosoltic huan ya ajsic hora para tlantiyas.
Pero ta, noTeco, tielis san se para nochipa.
Ax quema tihuehuejtiyas, niyon ax quema tlamis monemilis.”
13 Huan Toteco Dios ax quema quiilhui se elhuicac ejquetl queja quiilhui Icone ipan ni tlajtoli:
“Ximosehui nica nonejmatl campa onca más tlatlepanitacayotl,
hasta nijchihuas para tiquinnahuatis nochi mocualancaitacahua.”
14 Ielhuicac ejcahua Toteco itztoque san tonaltzitzi tlen tlatequipanohuaj. Quena, Toteco quintitlantinemi para quinpalehuise huan quinmocuitlahuise nochi tlacame tlen Toteco quintlapejpenijtoc para quinmaquixtis tlen inintlajtlacolhua.