1 Mali tebira howa Yudasa halu ibunaga agali hearu ti hale hayane Selugusu igini Demidiriasahanda ibunaga ami agali hongohe dewaore haru halu iba sibini biralu puwa Tiribolisi tano wiagoria iba sibi anda ibaga iba angeni ibu nga layago hale hene. 2 Ai agali Demidiriasa ogonime Kini Andiogusu homelo bo wahalu ibu aba hamene Lisiasabi bo wahalu ibunime gabumane haru halu handaya ho hene.

3 Horo ogoningi agali mbira mini Alagimusu hene. Ala ibu agali loma binigo mo miaga haguane timbuni henego mani howa wai biyangi howa ibunaga mamali mana wiaru wahai ho hene. Ibu mitangi bu handalu Yuda wali agalime ibu pani ngulubada lo manda bialu gi ho howabi ibu loma binigo mo miaga agali haguane timbuni howa biabe bialu haga wiagobi lone ibuni mo yu dai buwa bialu habe nahe wiago manda bu hene. 4 Ani manda bu howa mali handari mbira pira duriani mbira (151) layagola Alagimusuhanda Kini Demidiriasa hondo pene. Ani puwa ogoningi ibugua manda mbira ngolome wabinibi ayage yunibi ira olibe maganebi Yuda wali agali tigua Anduane Homogonaga andaha bu yalu piaga mana winidagua yalu puwa kinihondo mini. Ani puwa ibunaga mini wiago kinihondo latagi nahe dege hene. 5 Mani howa Kini Demidiriasahanda ibu agali ganisolo hearu baba mandagi bi midini mbira lolene wiagola ibu heba lami̱ya íbu lene. Ani íbu lowa lalu, Yuda wali agalime mbirale mbira agi bule hamelo kabe, lalu hale hene. Ani hale hayagola Alagimusuhanda ibuha lulu mini wu hene ngelo heago latagi hene.

Ibugua lalu, 6 Yudasa Magabeusu ibugua Yuda hameigini aria maru ti mini Hasidi laga hearu haru halu ibuni mo haguane ko ka. Bibahendengi agali uruni tigua wali agalime wai bialu haabo helonaga tinaga bu miniha mo heya haabo haragome dindi mo bayale ngelonaga hondo ha nabiaga ka. 7 Tigua i̱naga biabe timbuni i̱ abahanda i̱ni giha mo ya halu homene yu hewago mo wahalu biya. Ayu i̱ oali ibirudagoni 8 irane i̱ mbirale bibahende kininaga ngago damene mitangi howa ibini. Ani bialu i̱naga wali agali bu karunaga genda yalu ibini. Agali ko o mini laruruninaga lulu mana bialu heagome i̱ dindiha genda timbuniore mo yu anda ibiya. 9 Kini-o í̠na dara holene irane nawini howa wali agali bibahende dara hai halu ti heba miniha dungulo haga kegoni. Í̠na mbirale bibahende baya hangu dabo handai howa nde i̱ daluha dindi ngago bayale helo biamogo bulene mitangi bialu i̱naga wali agali genda yu karu biamogo bulene mitangi bibe. 10 Agali Yudasa ogoni homa nabi haabo hayagua í̠naga dindiha wali agali bayale holene nawulubada, lene.

11 Alagimusuhanda bi lai hayagola abaleore Yudasa waitigi agali mini Kininaga Nenege laga hearume bi laga laga bialu Kini Demidiriasa mo tandagore hene. 12 Anidagua biyagola Kini Demidiriasa ibugua heyalu abaleore agali ami haguane mbira nogo elebana handaya ho haga heago dabalu Yuda dindiha gabumane haguane howa haru hole pu lene. 13 Ibugua Yudasa homelo bo waholenebi agali Yudasa baba mandagi ibaga bu haga hearu bo taliatogo lolenebi. Alagimusu Anduane Homogonaga anda kagonaga biabe bialu helo loma binigo mo miaga agali haguane timbunibi helo dabo helalimu laga bialu bi lamiai hene. 14 Wali agali maru Anduane Homogohondo mini mbiraore nawiaga Yudiaha haga heneru ti Yudasa gi halu ibida pugupugu biniru ogoningi Niganola ho mbiraore hene. Tigua lo manda bialu Yuda dindi mo ko holene anda ibirangi tini mo ko nahe bayale holebirama lo manda bu hene.

15 Yuda ti hale ho hearia Nigano heba agali Anduane Homogohondo mini mbiraore nawiaga hearu Yuda ti baba wai bule ibira layago hale hene. Hale howa Yuda tigua be abalu tinaga haguaneni dugu wini. Ani buwa tigua Anduane Homogo ibu Yuda wali agali ti ibuninagaore haabo helo dababagi ho helene howa bibahendengi biamogo hongo howa biaabo hagabi kagohondo bi lalu hene.✡ 1 Mag 7.27-28 16 Ani bialu tinaga agali haguane Yudasahanda bidaba layadagua bialu abale heyalu puwa tinaga waitigi dindi emene mbira mini Adasa wiagoria ngola hole pene. 17 Ani bialu ai Saimono ibu Yudasa hamene howa ibugua Niganola wai bini. Ani bialu heagola waitigi biarume abale ibalu wai biyagola ti emene bope hene. 18 Ai Nigano ibu hale halu hearia Yudasa halu ibunaga agali bu hearu ti gi nahe elaheore howa tinaga dindinaga wai hongo howa biaga ka layago hale howa Nigano ibu wai bulene hame nale hene. Ani howa tigua wai wahalu bi lalu mo palia hole hame lene. 19 Ani manda bialu ibugua agali maru bi lo tiga bilo Posidoniusubi Teododusubi Madadaiasabi dabalu, Yuda wali agali baba bi lo tiga bule pudaba, lene.

20 Ani laya handala puwa agali haguane kirabaliha howa ibalu bi lo tiga bule luore lalu hene. Ani lalu howa mani agali haguane mbirame ibunaga ami agali hearuhondo lalu, Ayu iname bi lalu inanaga waitigi bu karu baba mandagi mini mo mbiraore ho hami̱yanaga bi lole mo ngoai ho kemagonida, lene. 21 Ani lalu agali haguane biaru tigua mitini lone lole horo pongo wini. Agali haguane kirabaliha howa wai biagane garo ale mini karisi nogo hosime gili laga mbira mbira lowa biragane dagia kirawi yalu ibini. 22 Ani bialu ha howa dege Yudasahanda ibunaga ami agali dindi bibahendeha waitigime ohowa wai biyagua biadai bule manda manda bu hai helene. Ani heagola agali haguane kirabaliha howa bi bayale dege lai hene. 23 Ani lalu Nigano ibu luore Yarusalemeni biruwa ibugua mbirale mbira biako nahe bayale hene. Ani bialu agali tara tara Nigano heba íbu hene bu hearu tihondo lalu, Wahalu tíni dalu pugu pugu bidaba, lene. 24 Ai Nigano ibu Yudasa gubalini timbuni ho howa ibu Yudasala mandagi haabo hene. 25 Ani howa Niganohanda Yudasahondo bi bayale lamialu, Ai Yudasa wali dau bialu waneigini hono wulene nga, lalu lamigi bini. Ani layago hale howa Yudasa ibu wali dau bialu waneiginiru hono wialu agali maru bu hearubi dege hene.

26 Agali loma binigo mo miaga haguane timbuni Alagimusu ibugua handalu hearia agali kirali Nigano Yudasala mo nenegeho heago hondowa ibugua libunaga habo nalolene bi lo wibigo mo yalu Demidiriasa hearia puwa ibugua kini berearia puwa lamialu lalu, Nigano ibugua gabumane mo guya hole hariga taya bialu ka. Ani bialu ibugua agali waitigi gibiore heago Kininaga Nenege dabo heleda, lalu kini lamini. 27 Bi ke̱ howa mege bialu layadagome kini mo tandaga timbuniore hayagola ibugua Niganonaga beba mbira gilibu wia hene. Ibugua lo wia halu lalu, Habo nalolene bi Yudasala lo wiriyago turu naheore ko. Ai agali Yudasa Magabeusu ogoni minu garabaya bu yalu Andiogo ibabe, lene.

28 Ai beba gilibu wia hayago Nigano hearia anda piyagola Nigano mogolo hendenego irane ibugua agali ko mbira nabi kego baba habo nalolene bi lo wiyago mo habo lolene hame nale hene. 29 Ani howa ainde ibugua kininaga bi ledago mo waholene nawigo manda buwa ainde Yudasa mo ohowa mini ede hole hariga taya bialu hene. 30 Ani bialu heago Yudasa ibu de hondowa ainde Niganohanda Yudasa ibu baba mini mbiraore nahebi ibu baba nenegeme bi lo hagadagua nahebi heago de hondo hene. Ani hondo howa ainde agali ogonime ibu mo ko hole kagonida lo manda bu hene. Anidagua bule heagola Yudasahanda ibunaga ami agali dewaore haru halu mbirahayagi hado hole pene.

31 Ai Nigano ibu handalu hearia Yudasahanda ibu mo hondo heneya handala ibu heyalu abale Anduane Homogo andaga agali loma binigo mo miaga hearu tigua lomabu mialu hearia anda pene. Anda puwa ibugua agali urunihondo lamialu, Yudasa abaleore ibu minu ngilimu, lalu lamini.✡ 1 Mag 7.29-30 32 Ani layagola agali uruni tigua ladai bialu, Heneneore Yudasa ibu agoha ha do kabe ina manda nabidama, lene. 33 Ai Niganohanda Anduane Homogonaga anda heago ibunaga gi tigame gi dola amu halu ibugua mbira buleore lowa hongo howa lalu, Tígua Yudasa minu yalu ibuwa i̱naga giha ya naharimiyagua i̱na anda o kago bo gialo wahai halu ibu kagoria mbirale mbira nawi dindi hangu wulebira. Tínaga lomabu delaga dabu bu heledemigo i̱na bo gialo wahalu inanaga bi pupu wiaga bigiya tara mbira mini Dionisusu ngagonaga anda baya tara mbira bu aribia ho helolebero, lene. 34 Ibugua bi ogoni lai halu ibuni andaga dai bini. Anidagua lalu piyagola agali loma binigo mo miaga hearume tinaga gi dahuliya andagaha dogoladaga howa Ngode Datagaliwabe ibu tinaga dindi ngago baya hanguore haru howa handaya ho haabo haga kagohondo bi lalu hene. Tigua lalu, 35 Anduane Homogo í̠ha mbirale mbira tubagi nahaga ke. Anigo í̠ni ina baba mandagiore holenaga í̠naga anda mbira í̠ni dalu ngagoria bu helari. 36 Anduane Homogo í̠ hangu baya tigabiore ke. Ainde í̠na anda ogo ayuore dege iname í̠na deni dodo nahe helonaga mo loma bia ho helarimago baya hangu handaya ho habe, lalu Anduane Homogohondo bi lene.

37 Agali mbira mini Lasisi ibu ganisolo Yarusalemeha henegonaga te ogo. Tigua ibu Nigano deni íbu helowa godi hale hene. Lasisi ibu agali bayale tigabiore mbira howa ibugua mana tara tara biyagome ibunaga wali agali baya hangu biamogo bialu haga heagola tigua ibunaga mini yaraga halu ibu Yuda wali agali aba ka laga hene. 38 Yuda ti baba wai nabi heaore dege Lasisi homenego irane ibugua Yuda wali agalinaga lotu mana wiadagua baya hangu taluwa bialu hearia homene. Ibugua homolene gi nahe howa lotunaga mana baya hanguore talialu bule kaware haabo hene. 39 Nigano ibugua ibu Yuda wali agali baba waitigiore ko lalu biyagome walia haga bini. Ani bialu howa ibugua ami agali dewaoreme Lasisi minu pelo pelene. Ami agali dewaore handari duria (500) agima bolangua howa pene. 40 Nigano ibu lo manda bu handalu hearia ibugua, Agali hongohe Lasisi ale bu karu minu garabaya biruyagua Yuda wali agali bibahendeme gi hai holebira, lo manda buwa ani bini. 41 Ai ami agali biarume puwa wai pabeanda hongohe heagoha Lasisi ha do heagola tigua wai hongo howa bialu hene. Ani bialu howa tigua wai pabe hongohe heago gialolenaga ira hedo yalu ibidaba lowa hongo howa olalu hene. Ainde Lasisi ibugua handalu hearia ami agali biarume ibu talialu ho mabu biai hearia hondowa ibunaga wai biaga ayu tibu yiagome ibuni homolenaga nogoba hene. 42 Ibugua mitangi bialu ami agali Anduane Homogo mitangi nahaga bu karume ibu mo taga holigo ai ibunaga mini bayale mini yaraga hene ngago ngaore homarayagua karulapeda lo manda bialu anidagua bini.

43 Anidagua bialu hearia ibugua abale ala bigi bialu hearia ibuni dibayadagoha diba puda hearia homa nabini. Ani howa handalu hearia ami agali biaru wai pabe panga dugualu abale anda ibai hayago handalu Lasisi ibu dai lalu wai pabe nene wiagoria pole pene. Puwa unu dindiha wali agali bu heagoha porabupe hene. Ani bulene gi naheore howa pora bini. 44 Ani pora biyagola wali agali ti hamigi migi biyagola henge wiagoria ibira hene. 45 Ani biyagola ibu homa tongolo mia nabi dege buhe̱ wiaabo howa ai lone heyalu darama timbu dibini wiagoha piago pialu helowa gerai lalu wali agali bu heagoha pene. 46 Ani puwa ege to̱le̱ timbuni mbira wiagoria porabu paga hene. Ani biyagola nde ibunaga darama pu dege bialu pu maro bini. Ani biyagola ibuni gi kirabalime hongo howa ibuninaga tini tombene bibahende minu duguai howa wali agali heagoha ba pelene. Ani bialu ibugua Anduane Homogo buhe̱ lolenebi holenebi miaga kagohondo olowa lalu, I̱naga buhe̱ lolenebi holenebi lone ngiadai bibe, lalu bi lene. Ainde agali bayale Lasisi ibu ogodagua homene lalu te ogoni hangu.