No Manōma A Tolas Ni Apostol Pablo Dyirad Tawotawo Do Korinto
No Pakatonngan so Paytābwan no Nya Tolas
Iyaw nya Korinto do kachimpo ni Pablo, ki asa rakoh a syodad do probinsya a Akaya a asa a probinsya do pagtorayan Roma do kaychowa. Iyaw nyaya, ki sīgod a tana da no Griego saw a tawotawo a sinakop dan taga Roma. Myan paw rakoh a pagpondwan da kan āro saw magnignigosyo daw. Nyaw naynamotan na a siraw tawotawo saw a yapo do matatarek a tana, ki pirmi sa mawara daw, kan myan dyiraw yononot da didyosen da a matatarek.
Oyod a nagdindināmag syodadaya do kāron marahet a kaparin kan makabābaba saw a dadakay da. Mapapangas paw tawotawo daw, kan nawri lang chabalay daw bōkod daw a kinaragsak. Myan pa do dawriw āro a kakpekpehan da a pagdaydayāwan da so matatarek saw a didyosen da. Nyaw paynamotan no kāron pasken da a pangsilibrar da so didyosen da saw. No gagāngay a pinariparin da do paspasken dāya, ki michan sa so karni dan pinarti daw a binyay a indāton dad didyosen da.
Do nakapagbyahyaw ni Pablo a nangay a nangiwaras so Maganay a Dāmag do matatarek a tana, narapit naw nyaya syodad a Korinto. Nakaasa a katawen kan godwa do dya yanan (Ara. 18:1-18). Maynamot do innanawo naw do kayan naw do Korinto, āro saw nanganohed di Jeso-Kristo, naten dana siraw dyaw a Jodyo.
Do nakakarwaw ni Pablo dyira a nangay do Epeso, myan saw matatarek a nangay a nangnanawo dyira. No asa dyira, ki si Apolos, asa manganohed a yapo do Egipto. Iyaw nyaya a Apolos, ki asa masīrib a tawo a mayit so kapanganohed. Midyo a nahay si Apolos do dawri a nangnanawo dyira a maynamot do chirin Āpo Dyos (Ara. 18:26-28; 1 Kor. 3:4, 16:12; Tito 3:13).
Do kayanaw ni Pablo do Epeso, myan saw tawo a yapo do Korinto a nangay dya (16:17-18), kan myan pinanaybi da a tolas dan nanganohed saw do Korinto. Do nakarawataw ni Pablo so nawri a tolas da, ki tinbay na sa, kan iya danaw nyayaw Manomaya Korinto a tolas na dyira.
An basāen taw tolas naya, maboya ta āro chinaskeh ni Pablo a maynamot dyira. Natonngan ni Pablo a pinachimadēkeyan daw toray na a asa apostol, kan pinayparin daw inawan da a akmay kasisītaan (4:8). Chakey da pagparangen a siraw kosto so sīrib mana kapakaāwat. Binata dan kadwan dyira a siraw no oyod a pawnonoten no Ispirito Santo, ki si Pablo, ki engga (9:2). No kaoyodan na, ki akmay adekey paw kapakaāwat da so naispiritwan a byay (11:22). Kayarig da paw tagibi a maysepsep so gātas (3:2).
Do nyaya a tolas, ki nyaw gondāway ni Pablo a nanginanawo dyira so maynamot do kapagornos da an maychipeh sa a magdaydāyaw do Dyos. Pinaydabdab na sa a maynamot do kapaydidiman daw (1:10-13) kan maynamot do kasaraw daw an magkomonyon sa (11:18-34).
Innanawo na pa dyiraw maynamot do kapaybidyaw ni Āpo Jesos do lōbongaya. Sigon do inpaltiing no Ispirito di Pablo, intolas na paw maynamot do inawan ta a nahta an maitābon, ki anchan magōngar dana, syimpri, mahta paba kan polos dana dya madiman (15:42). Nyaw taywaras mapakaskasdāaw a maparin anchi dyirad manganohedaw di Āpo Jesos.
No Naychakarwan no Nya Tolas
Pakatoneng 1:1-9
No kapaydidiman da do kakpekpehan 1:10-4:21
No maynamot dyirad nakagatosaw 5:1-5:13
No kapangidarom so kakakteh a manganohed 6:1-6:11
No kapangnanawo a maynamot do inawan tawo 6:12-6:20
No kapanahes a maynamot do Kapachikabahay 7:1-7:40
Siraw kanen a naidāton do didyosen 8:1-11:1
No kapagdalongdong do chinban 11:2-16
No komonyon 11:17-34
No sāgot saw a itoroh no Ispirito Santo 12:1-14:40
No kapagōngar 15:1-58
Iyaw sidong dyirad kakakteh do kapanganohed 16:1-4
Siraw plano ni Pablo 16:5-12
No kapanawdyan a kapangdaw kan pakatoneng 16:13-24
1 Korinto
1
Pakatoneng
1 Yaken si Pablo a nakayapwan nyaya tolas, kan yapo pa di Sostenes a kakteh ta do kapanganohed. An yaken, ki maynamot do pangeddeng ni Āpo Dyos, ki tinongdo na yaken a mayparin a asa a apostol ni Kristo Jesos. 2 Itolas namen nyaya dyinyo a manganohed do Dyos a myan do syodad a Korinto, inyo a tabo a pinayparin no Dyos a masantwan a tawotawo na a maynamot do kapachichasa nyo di Kristo Jesos kontodo dyirad tabo saw a tawotawo do aran dino a magdaydāyaw di Jeso-Kristo a Āpo ta a tabo.
3 Myan pakono dyinyo parābor kan kaydamnayan no kapangtokto a yapo di Āpo Dyos a Āmang ta kan yapo di Āpo Jeso-Kristo.
No Kapagyāman ni Pablo a Maynamot do Parabor no Dyos
4 Pirmi ako a magyamyāman do Dyos a maynamot do paraboraya a intoroh na dyinyo a maynamot do nakapachasa nyo na di Jeso-Kristo. On, ibhes kwabaw magyāman do Dyos a maynamot dyinyo. 5 Ta maynamot do kapachasa nyowaya di Jeso-Kristo, ki binindisyonan naynyo no Dyos so rakoh kan marahem a kapakaāwat a maynamot do oyod, as kan pinarakoh naw sīrib nyo a mangichirin so maynamot dya. 6 On, siraw nyaya bindisyon ni Āpo Dyos dyinyo, ki siraw mangpaneknek a minyamot dana dyinyo kapangasaba namenaw dyinyo do kachwaw a maynamot di Kristo 7 tan abo pagkorāngan nyo do naispiritwan saya a sāgot do kayan nyowaya a matodyo a mangnanaya so kawaraw anchi ni Āpo ta a si Jeso-Kristo. 8 On, nāw nanchi ni Āpo Dyos a mapayit so kapanganohed nyo tan abonchiw pakapilāwan nyo do dawri a araw a kangay anchi ni Jeso-Kristo a Āpo ta, 9 ta mapagtalkan si Āpo Dyos a nanawag dyinyo a nachichasa do Anak naya a si Āpo ta a si Jeso-Kristo.
Iyaw Dyaw a Kapagtotōnos no Iglisya
10 Sichangori, kakakteh, maynamot do kalintegan a myan do ngaran ni Āpo Jeso-Kristo, machichāsi ako dyinyo a magtotōnos kamo a tabo. On, masisīta a abo pakono kapaydidiman dyinyo, basbāli a magkakaawātan kamo pakono a tabo tan sakangwan māsa kamo do kapangtokto kan panggep nyo. 11 Inbilin ko nyaya dyinyo a maynamot ta nadāmag kwaw do kadwan saw do pamilya ni Kloe a ari kono kapaydidiman dyinyo a kakakteh. 12 No batan kwaya sya, ki maynamot ta matatarek kamo kono do kapakaāwat, ta batahen kono no kadwan a, “Rarayay na yaken Pablo.” As batahen kono no kadwan dyinyo a, “Rarayay na yaken Apolos,” as siraw kadwan saw, “Rarayayaw yaken Pedro,” As siraw kadwanaw, batahen da kono a rārayay das Kristo. 13 Pakawanen kamo a kakakteh! Kāro pan napaychakarwan nyos Kristo? Yaken a si Pablo, ki nadiman akori do kros a maynamot dyinyo, mana nabawtisaran kamori tan nayparin kamo a nanawhen ko? Polos!
14 Magyāman ako di Āpo Dyos, ata, abaw binawtisaran ko dyinyo, malaksid da Krispo kan Gayo.* 1:14 Si Krispo, ki iyaw pangōlo dan manganohed saw do Korinto (Ara. 18:8). As si Gayo, ki pinadagos nas Pablo do kayan naw do Korinto (Roma 16:23). 15 On, abaw matarek a binawtisaran ko, ta angwan batahen kadwan dyinyo a nabawtisaran kamo do ngaran ko. 16 Ay on sawen, binawtisaran ko pa si Estepanas kan pamilya naw. Manakem ko pabaya an ara paw matarek a binawtisaran ko. 17 Ta tinoboy aba yaken Āpo Jeso-Kristo tan mangay ako a mangbawtisar, an dya mangay a mangikasaba so Maganay a Dāmag. Asa pa, inosar kwabaw nainlobōngan a sīrib do kapaychirin kwaya tan dyi kwa payparinen a abos sinpaspangan nakadimanaya ni Kristo do kros.
No Sīrib no Tawo, ki Sīrib Aba do Pangrokodan no Dyos
18 Ta siraw tawo saw a īto danaw kangay dad abos pandan a dōsa a maynamot do kabon kapanganohed da do nakadimanaw ni Kristo do kros, ki tod da dyābat kan batahen da a sinsinan nawri a nanawo. Ki yaten a maisalsalākan, ki mailāsin ta a maynamot do nakadimanaw ni Kristo do kros, ki inpaboya ni Āpo Dyos panakabalin na a mangisalākan. 19 Akmas inpatolasaw no Dyos do Masantwan a Tolas a kāna,
“Rārayawen konchiw sīrib da no mamasīrib,
kan ibidang konchi a abos sinpaspangan
no kapakaāwat dan nakaadal saya so āro.”† 1:19 Isa. 29:14
20 An komwan, aryoriw sīrbi no sīrib da no mamasīrib saw kan siraw mangnanawowaw so linteg mana siraw maganay saw a magdidibati. Aba, ta inpaboya ni Āpo Dyos a abos sinpaspangan sīribaya do lōbongaya.
21 Ta sigon do kasīribaya no Dyos, maparin aba no tawo a tokoden si Āpo Dyos do bōkod na pangtoktwan, basbāli a pinanggep na a isalākan nanchiw tawotawo saw a manganohed do Maganayaya a Dāmag a iyaw ikaskasaba namenaya a batan kadwan a abos sinpaspangan. 22 Ta siraw Jodyo saya, ki chakey daw milagro a pamaneknek sakbay a anohdan da. As siraw Dya-Jodyo, ki kinasīrib chakey da. 23 Ki an yamen, ikasaba namen nakadimanaw ni Kristo do kros, iyaw minsahyaya a pakachichadan dan Jodyo kan maibidang a abos sinpaspangan dyirad dyi saw a Jodyo. 24 Ki yaten a tinawagan ni Āpo Dyos a nayparin a tawotawo na, aran Jodyo ta mana Dya-Jodyo, ki chapatak ta a si Kristo danaw pakaboyan so kabīleg kan kasīrib ni Āpo Dyos. 25 Ta no hahawen tawo a sinsinan do kapangtokto no Dyos, ki masirsīrib paw nawri kan katotohosan a sīrib no tawo. Masaw dyirad hahawen da saya akmay kakapsotan no Dyos, ki matodatodah aba polos a rawahen ayit no tawo.
26 Nakmen nyo a kakakteh, an maypāngo kayayan nyo do nakatawagaw dyinyo no Dyos. Sigon do panirigan tawo, papere lang dyinyo masīrib a yapo do sīrib no tawo mana manakabalin mana malatak do salapen tawo. Oyod abawri? 27 Ta siraw bataw no tawotawo do lōbongaya a abos sinpaspangan, ki siraw pinidi no Dyos a pangasnesnek siras mamasīrib saw do lōbongaya. As siraw bataw no tawotawo a makapsot, ki siraw pinidi ni Āpo Dyos tan asnesnekan na saw bataw no lōbong a mayit. 28 Masaw, siraw inbidang no tawotawo a sinsinan mana maoy-oyaw mana abos sinpaspangan do lōbongaya, ki pinidi sa ni Āpo Dyos. On, pinidi no Dyos siraw nyaya sinsinan a tawo tan ipaboya na a abwa polos sīrbin ibidang no tawo do lōbongaya a masisīta dyira. 29 On, pinarin naw nyaya tan abaw maparin a pagpangas no tawo do salapen no Dyos. 30 Ki aran komwan, inhap na yaten a pinachasa no Dyos di Jeso-Kristo. Pinayparin ni Āpo Dyos a iyaw pakayapwan kasīrib ta. Maynamot di Kristo, napalinteg ta na do salapen no Dyos, as kan nayparin ta a masantwan a tawotawo na. On, maynamot lang di Jesos, maisalākan ta na do abwayas pandan a dōsa. 31 As dawa, parinen ta pakono a akmas naitolasaw do Masantwan a Tolas a kāna, “No makey a magpangas, ayket, machita nawri pakono ipangas naw pinarinaw no Dyos ah.”‡ 1:31 Jer. 9:24; 2 Kor. 10:17