1 Do chatatdo naw a katawen no kapagāri no āri no Israel a si Hosea a pōtot ni Ela, nayparin a āri no Joda si Hesekyas a pōtot ni Ahas. 2 Nagtawen so dadwa poho kan dadima do nakapagāri na. Nagāri so dadwa poho kan sasyam a katawen do Jerosalem. No ngaran ni ānang na, ki si Abi* 18:2 Abi mana Abihas. 2 Kron. 29:1 a pōtot a mabakes ni Sakaryas. 3 Pinarin naw kosto do kapanyideb ni ĀPO a akmas pinarin ni Dabid a popoon na. 4 Pinakaro na saw pagdaydayāwanaw, hinomek naw posti saw a bato, kan tinongeh na saw postyaw ni Asera. Inapsapsa na paw sinan bodayaw a tombāga a pinarin ni Moyses, ta manda do dāwri a chimpo, maysosoh pa saw Israelita so insinso dya. No sinan bodayaw, ki napangaranan so Nehostan.

5 Nagtalek si Hesekyas di ĀPO a Dyos no Israel. Abaw akma dya dyirad tabo ar-āri no Joda a aran siraw nanmanma paw kan iya mana somnarono dya. 6 Nāw na di ĀPO, kan tinadyichokod nabaw nakawnot na sya. Tinongpal na saw bilbilin a intoroh ni ĀPO di Moyses. 7 As si ĀPO, ki myan dya. Nagballīgi si Hesekyas do aran āngo a pinarin na. Nagribīldi so maikontra do āryaw no Assirya, kan nagsīrbi aba dya. 8 Inābak na saw Pilisteo a tawotawo a manda do Gasa a yapo do pagwanawananaw a kominwan do naahadanaw a syodad.

9 Do chapat naw a katawen ni Āri Hesekyas a nawriw chapapito a katawen no āryaw no Israel a si Hosea a pōtot ni Ela, romnaot si Salmaneser a āri no Assirya so maikontra do Samarya kan linakob na pa. 10 Do nakatayoka no tatdo a katawen, sinākop naw Samarya. Naparin nya, ki do chaanem a katawen no kapagāri ni Hesekyas, kan do chasasayam naw a katawen no kapagāri ni Hosea a āri no Israel.† 18:10-112 Ār. 17:5-6 11 No āryaw no Assirya, ki inkaro na saw tawotawo a Israel a sibabahod a naiyangay do Assirya. Pinachiyan na sa do syodad a Hala, do Gosan a masngen do Oksong a Habor, as kan do idiidi saw no taga Medya. 12 Naparin saw nyaya maynamot ta inadngey daba si ĀPO a Dyos da, kan rinārayaw daw kapachitōlag na dyira. Ta tinongpal daba tabo inpaibilin naw di Moyses a pachirawatan ni ĀPO.

13 Do chaasa poho naw kan apat a katawen no kapagāri ni Hesekyas, rinaot ni Sennakerib a āri no Assiryaw tabo naahadan saw a syodad no Joda kan sinākop na sa.‡ 18:13-37 2 Kron. 1-19; Isa. 36:1-22 14 Dawa, nangipaiyangay si Hesekyas a āri no Joda so nya minsāhi do āryaw no Assirya do Lachis a kāna, “Pinarin ko madi. An komaro ka na dyaken, magbāyad ako so aran āngo a akdawen mo dyaken.” Inpabāyad no āryaw no Assirya di Hesekyas a āri no Joda iyaw asa poho a katonilāda no pirak kan asa a katonilāda a balitok. 15 Dawa, intoroh dya ni Hesekyas iyaw tabo pirak a myan do timplo ni ĀPO kan do pangapyan saw do palasyo naw ni āri.

16 Do dāwri a chimpo, hinathat ni Hesekyas a āri no Joda iyaw balitokaw a pinakalopkop na dyirad aneb saw kan mondora no timplo ni ĀPO, kan intoroh na do āryaw no Assirya.

17 Sinpangan na, tinoboy no āryaw no Assirya iyaw hiniral, tinyinti, kan komander na kontodo matokpoh a bōyot yapo do Lachis a mangay di Āri Hesekyas do Jerosalem. Somnonget sa a nakarapit do Jerosalem. Nangay sa nagpwisto sa do payis no kanalaw no mamanyito a līnaw, do rarahan a komwan do bengkagaw a paybasabasan da so lamit. 18 Pinatawag da si Āri Hesekyas, ki basbāli a tinoboy na sa Elyakim a pōtot ni Hilkyas a iyaw manyidechidebaw so palasyo, si Sebna a sikritaryo, kan si Joa a pōtot ni Asap a taga-tolas.

19 Binata no komanderaw dyira a kāna, “Ibahey nyo nya di Hesekyas: ‘Nyayaw bata no mabīleg a āri no Assirya: Āngo pakayapwan pagtaltalkan mo? 20 Bata mori a pamagbaga, ki tādi no pamosposan kan kayit do gobat? Pi! Chirichirin a abos sinpaspangan. Sino pachinarngan mo tan magribīldi ka so maikontra dyaken? 21 Chiban mo, magtalek ka do sobaybay dan taga Egipto. No Egipto, ki akmay naparpar a byawo a mangtodok so kakamay no aran sino machinareng a magsarokod dya! Komwan si Paraon do tabo magtalek dya. 22 Ki sigoro ibahey monchi dyaken a kon mo, “Magtalek kami di ĀPO a Dyos namen.” Iyabawriw akin dyira so pagdaydayāwan kan siraw altar a pinakaro ni Hesekyas do nakaibahey na dyirad tawotawo do Joda kan Jerosalem a kāna, “Machita a magdaydāyaw kamo do salapen nyaya altar do Jerosalem”?

23 “ ‘Ngay na, machitōlag ka do āmo ko a āri no Assirya: Manoroh akonchi dyimo so dadwa rībo a kabalyo, an makapakasakay ka so komakabalyo dyira! 24 Na, maparin kawri a mangkārit so aran asa dyirad kabobodisan so saad a opisyalis no āmo ko a aran magtalek ka do Egipto para do logan sa a pachigobat kan dyirad komakabalyo? Polos! 25 Machirohno pa, mangay akori a mangraot kan mangrārayaw so nyaya logar an abo chirin a yapo di ĀPO? Si ĀPO mismo nangibahey dyaken a romaot do dyaya tana, kan rārayawen ko!’ ”

26 Do dāwri, binata da Elyakim a pōtot ni Hilkyas, Sebna, kan Joa do komanderaw a kon da, “Mo sir, maychirin ka pa dyamen a tobotoboyen mo do kapaychirin a Aramaik, ta maawātan namen. Maychirin kaba dyamen so Hebreo a kapaychirin dan taga Joda a madngey dan magboybōyaya a yapo do ahad no syodad.”§ 18:26 No kapaychirin a Aramaik, ki masngen do Hebreo a kapaychirin dan taga Joda. Aramaik, ki inosar no pinakainawan no asa nasyon an myan ibahey na do matarek a nasyon.

27 Ki tominbay komanderaw a kāna, “Taywaran inyo lang kan do āmo nyowayaw nanoboyan āmo ko a pangibaheyan siras nyaya, an dya dyi pa siraw maychadisdisnaya do ahad? Ta akma sanchi dyinyo a machita koman so bōkod da a tachi kan minom so bōkod da a pēteg.”

28 Sinpangan na, naytēnek komanderaw a nakalyak do kapaychirin a Hebreo a kāna, “Adngeyen nyo chirinaya no mabīleg a āri a āri no Assirya! 29 Nyayaw bata no āri: ‘Ipalōbos nyo aba allilāwen naynyo ni Hesekyas. Maisalākan naba inyo do kakamay ko. 30 Palobōsan nyo aba si Hesekyas a mapasarasaray dyinyo a magtalek di ĀPO do kabata na sya a kāna, “Syirto a isalākan nanchi yaten ni ĀPO. Nyaya syodad, ki maitoroh abanchi do kakamay no āri no Assirya.” ’

31 “Adngeyen nyo aba si Hesekyas. On, ta nyaw bata no āri do Assirya: ‘Machikapya kamo dyaken, kan mohtot kamo a mangay dyaken. Dāwrinchi, kāda asa dyinyo, ki kanen nanchiw asi a yapo do bōkod nyo a kaobasan kan kaigosan nyo, as kan inomen nyonchiw ranom do bōkod nyo a bobon. 32 Komwan anchiw parinen nyo mandan mangay ako kan manghap dyinyo do tana a akmas dyira nyowaya. On, hapen konchi inyo do tana no irek a para tināpay kan obas a para palek, tana no olibo a kayokayo a para lana, kan myan tagapolot no yokan. Dāwrinchi, mabyay kamo a dya madiman! Adngeyen nyo aba si Hesekyas, ta allilāwen naynyo do kabata na sya a “Isalākan nanchi yaten ni ĀPO.” 33 Aryoriw dyos no aran sino a nasyon a nakaisalākan so tana na a yapo do kakamay no āri no Assirya? 34 Asyo, dino danaw yanan dan dyos saw no Hamat kan Arpad mana dyos saw no Separbaim, Hena kan Ibbah? Naisalākan dawriw Samarya do kakamay ko? 35 Sino dyirad tabo dyos saya no nyaya saya nasnasyon nakaisalākan so tana na a yapo dyaken? Taywaran maisalākan ni ĀPO iyaw Jerosalem a yapo do kakamay ko? Pi!’ ”

36 Ki nāw da dya naychalilyak no tawotawo saw, kan inatbay daba a aran asa chirin, ta inbilin ni Āri Hesekyas a kāna, “Atbayen nyo aba.”

37 Sinpangan na, sa Elyakim a pōtot ni Hilkyas a iyaw manyidechidebaw so palasyo, si Sebna a sikritaryo, kan Joa a pōtot ni Asap a taga-tolas, ki naybidi sa di Hesekyas a napiripirit so laylay, kan inpadāmag da dyaw binataw no komanderaw.