1 Do chimpwaw a kapagāri ni Jehoyakim, rinaot ni Nebokadnessar a āri no Babilonya iyaw tana no Joda, kan nayparin a intorayan na si Jehoyakim so tatdo a katawen. Sinpangan na, nagribīldi si Jehoyakim so kontra di Nebokadnessar.* 24:1 Jer. 25:1-38; Dan. 1:1-2 2 Do dawri, tinoboy sa ni ĀPO bonggoy daw no mangraot a taga Babilonya, siraw Arameo, Moabita, kan Ammonita a maikontra di Jehoyakim, tan mangrārayaw so Joda. Nya, ki sigon do chirin naw ni ĀPO a inpaibahey na dyirad pachirawatan na saw a propīta. 3 Syirto a siraw nyayaw naparin do Joda, ki sigon do bilin naw ni ĀPO, tan pakarohen na sa do salapen na maynamot dyirad gatogatos ni Manasses, tabo pinariparin na, 4 kan magrāman nakapamawyog na so raya dan abos gatos. On, ta inapno naw Jerosalem do raya dan abos gatos, kan mapakawan aba ni ĀPO nyaya.

5 Siraw kadwan saw a napariparin do nakapagāri ni Jehoyakim kan tabo a pinaripinarin na, ki naitolas sabawri do librowaw no pakasaritāan dan ar-āri no Joda? 6 Nachipaynahah si Jehoyakim dyirad popoon na. Si Jehoyachin a pōtot na, ki nachitādi dya a āri.

7 Minohtot pabaw āryaw no Egipto a minirwa do tana naw a machigobat, ta inhap dana no āryaw no Babilonyaw tabo a sākop a dyinira no Egipto a makayapo do Dēkey a Oksong no Egipto a manda do Oksong a Oprates.

8 Nagtawen si Jehoyachin so asa poho kan wawaho do nakapagāri na, kan nagāri do Jerosalem so tatdo a kabohan. No ngaran ānang na, ki si Nehosta a pōtot a mabakes ni Elnatan a taga Jerosalem. 9 Pinarin naw marahet do kapanyideb ni ĀPO a akmas pinarin naw ni āmang na.

10 Do dāwri a chimpo no kapagāri ni Jehoyachin, siraw opisyalis ni Nebokadnessar a āri no Babilonya kontodo bōyot da, ki somnonget sa do Jerosalem kan linakob da. 11 Nawara si Nebokadnessar, kan somnonget a mismo do syodadaw a madama da a laklakoben opisyalis na saw. 12 Sinpangan na, minohtot sa Jehoyachin a āri no Joda, si ānang na, siraw pachirawatan naw, siraw bigbigbigen na saw, kan siraw opisyalis na saw a somnōko sa tabo do āryaw no Babilonya.

Do chawawaho naw a katawen no kapagāri no āryaw no Babilonya, ki tiniliw na si Jehoyachin a sibabahod. 13 Akmas binataw ni ĀPO, pinahtot ni Nebokadnessar a inkaro tabo kinabaknang a myan do timplowaw ni ĀPO kan do palsyowaw no āryaw. Inpaktekteb na saw tabo balitokaw a warawara a inpaparin ni Solomon a āri no Israel para do timplo ni ĀPO. 14 Inkaro na saw tawotawowaw a sibabahod a yapo do Jerosalem, tabo opisyalis, tabo taga-gobat, tabo sanay a trabahador a mangar-arti kan siraw manyichipwaw. No tābo, ki asa poho a rībo. Sira dana lang kapopobryanaw, nabidin do dawri a tana a Joda.

15 Inhap ni Nebokadnessar si Jehoyachin a sibabahod do Babilonya kontodo ānang naw, siraw babaket naw, siraw opisyalis naw, kan siraw mabigbigbig saw do dawri a tana a Joda. 16 Naakaw sa pa a inkaro no āryaw no Babilonya siraw tabo mayiyitaw kan makabael do gobat a papito a poho a taga-gobat, kan asa rībo a sanay a mangar-arti kan manyichipo. 17 Pinayparin ni Nebokadnessar si Matanyas a marāan ni Jehoyachin a nachitādi di Jehoyachin a āri no Joda, kan tinādyan ni Nebokadnessar ngaran ni Matanyas so Sedekyas.

18 Nagtawen si Sedekyas so dadwa poho kan asa do nakapagāri na, kan nagāri do Jerosalem so asa poho kan asa a katawen. No ngaran ānang na, ki si Hamotal a pōtot a mabakes ni Jeremyas a taga Libna.† 24:18 Si Sedekyas, ki kakteh ni Jehoahas. 2 Ār. 23:31 19 Pinarin naw marahet do kapanyideb ni ĀPO a akmas pinarin naw ni Jehoyakim. 20 Maynamot do taywara a kasoli ni ĀPO dyirad tawotawo do Jerosalem kan do Joda, do panawdyan na, pinaksyat sa ni ĀPO do salapen na.

Sinpangan na, nagribīldi si Sedekyas do āryaw no Babilonya.