1 Dawa, nangay si āri kan si Haman a nachakan di Rēyna Ester. 2 Do kadama daw a minom so palek do somaronwaya nakangay da, inyahes dana mirwa ni āri di Rēyna Ester a kāna, “Changori mo Rēyna Ester, āngo chakey mo a akdawen? Aran manda pad kagodwan pagāryan kwaya, maitoroh anchi dyimo.”

3 Ki tinbay ni Rēyna Ester a kāna, “Mo āpo āri, an makahwahok dyimo, palobōsan mo pa yaken a mabyay kan siraw kapayngay kwaya a tawotawo. Nyaw pangdakdaw ko dyimo. 4 Ta nailāko kami naya kan siraw kapayngay ko saya tawotawo a marārayaw, madiman, kan mabo. Amnan tod kami sawen lang a nailāko a para adīpen a mahahakay kan mababakes, maylilyak ako paba, ta manawob abaw nya kaidadanesan namen a pangistorbo ko dyimo.”

5 Ki inyahes ni Āri Ekserses di Rēyna Ester a kāna, “Sino nawri a tawo a matored a namarin so komwan? Dino yanan na?”

6 Tinbay ni Ester a kāna, “Abaw matarek a mangidadanes kan kabōsor namen an dya iyaw nya marahet a tawo a si Haman.”

Do dāwri, oltimo nakāmo ni Haman do salapen ni āri kan rēyna. 7 Naychakatkat si āri a makasokasoli a minohtot do pagpaskenanaw, as nakangay nad minoyonganaw no palasyo. Ki si Haman, ki natokos a nangikakaāsi so byay na di Rēyna Ester, ta madlaw narana a nakadisisyon āryaw a mangdōsa sya.

8 Do nakapaybidyaw ni āri a yapo do minoyonganaw no palasyo a komwan do pagpaskenanaw, kosto a rinokoban ni Haman paypoktadanaw a yanan ni Ester a machikakaāsi.

Nakaboyaw syan āri, inyagay na a kāna, “Hoy! Aran si rēyna, chakey nawri no nya tawo a oknoden do salapen ko do mismo a palasyo ko?”

Nakaichirinaw sya ni āri, pinongosan das oho si Haman no yonoko saw. 9 Sinpangan na, binata ni Harbona a asa dyirad yonoko saw a magsirsīrbi di āri a kāna, “Aryaw pinatnek ni Haman do bahay na a dadwa poho kan dadima kamitros so katohos a pangbitāyan nas Mordokeo a nangisalākan so byay mo do inbahey naw, mo āpo āri.”

Inmandar ni āri a kāna, “Bitāyen nyo daw si Haman!” 10 Dawa, binītay da si Haman do pinarinaw a pangbitāyan di Mordokeo. Do dāwri, nabawan solyaw ni āri.