1 Do chaasa poho naw kan tatdo a karaw, do chaasa poho naw kan dadwa a bohan no mayngaran so Adar, iyaw nyaw arawaw a kaipatongpal no bilinaw ni āri. Do dāwri a araw, hahawen dan kabōsor saw no Jodyo a rārayawen da sa. Ki basbāli a naybadichid naparin, ta siraw Jodyowaw, nangābak siras mangipsokaw dyira. 2 Do kāda syodad do tabo probinsya do intīro pagāryan ni Āri Ekserses a yanan dan Jodyo saw, ki naychichipeh sa a mangdarop so aran sino a manghawahaway a mangrārayaw sira. Abaw nakaitored a machilāban dyira, ta chinamo sa no tabo tawotawo saw. 3 As siraw tabo magtotoray do kāda probinsya, opisyalis, gobirnador, kan pinakainawan saw ni āri, sinidongan da saw Jodyowaw maynamot ta chamo das Mordokeo. 4 Magdindināmag dana do tabo probinsya a nayparin dana mabīleg a tawo si Mordokeo do palasyo kan maypaypabīleg pa. 5 Maynamot ta komwan, pinarin dan Jodyo saw no chinakakey da dyirad kabōsor da saw. Diniman da sa a tabo so ispāda kan sinapasapad da sa.

6 Do syodad a Sosa a sintro no gobyirno, ki dadima gasot a tawotawo diniman da. 7 Diniman da sa pa, sa Parsandata, Dalpon, Aspata, 8 Porata, Adalya, Aridata, 9 Parmasta, Arisay, Ariday, kan Baysata. 10 Siraw nyaw asa pohwaw a mahahakay a pōtot ni Haman a potōt ni Hammedata a kabōsor dan Jodyo saw. Aran komwan, nagsamsam sabaw Jodyowaw.

11 Do dāwri pa araw, iyaw bidang dan diniman da saw do Sosa a sintro no gobyirno, ki naipakatoneng do āryaw. 12 Ki binata ni āri di Rēyna Ester a kāna, “Do syodadaya lang no Sosa, ki myan dadima gasot a diniman dan Jodyo saw kontodo asa poho saw a pōtot ni Haman. Aysa! An komwan, maparin a mangamangay paw pinarin dad kadwan saya probinsya. Changori, āngo chakey mo a akdawen? Maitoroh anchi dyimo. Āngo paw yahes mo? Matongpal panchi.”

13 Ki tominbay si Rēyna Ester a kāna, “An makahwahok dyimo mo āri, palobōsan mo pakono saw Jodyo saya do dya Sosa a mamarin dananchi anchan delak so pinarin daya changori a araw. Akdawen ko pa dyimo a ipalōdyit mo pakono saw bangkay daw no asa poho saw a pōtot ni Haman do pangbitāyan.”

14 Dawa, inmandar ni āri a maparin nyaya. Naipakatoneng iyaw bilin do Sosa, kan naipalōdyit bangkay da saw no pōtot ni Haman. 15 Do chaasa poho naw kan apat a karaw do bohan no Adar, naychichipeh dana saw Jodyowaw, kan nangdiman dana sa so tatdo a gasot a mahahakay do syodadaw no Sosa. Ki aran do dāwri, ki nagsamsam saba.

16 Masaw a siraw Jodyowaw do probinsya saw, naychichipeh pa sa a nangitēnek so byay da. Nakalmonaw sa do kabōsor da saw do nakadiman daw so papito a poho kan dadima ribo, ki nagsamsam saba. 17 Naparin nyaya do chaasa poho naw kan tatdo a karaw do bohan no Adar. As do chaasa poho naw kan apat a karaw, ki naynahah sa, as kan pinarin da a araw no kapagpista kan kapagragragsak. 18 Siraw Jodyo saw do Sosa, ki naychichipeh sa do chaasa poho naw kan tatdo kan chaasa poho naw kan apat a karaw. As do chaasa poho naw kan dadima karaw, ki naynahah sa, as kan iyaw nyaw pinarin da a araw no kapagpista kan kapagragragsak. 19 Nyaw naynamotan na a siraw Jodyo saw a omyan do dēdekey saw a idi, magragragsak sa a mangsilibrar kan magpista do chaasa poho naya kan apat a karaw do bohan no Adar. Pistaen daw nya araw, kan maysinririgālo sa do katakatayisa dyira.

20 Intolas ni Mordokeo iyaw naparin saya, as kan nagpaw-it so tolas dyirad tabo Jodyo saw a masngen kan mateng do tābo probinsya saw no pagāryan ni Āri Ekserses. 21 Inbilin na dyira a pistaen daw chaasa poho naya kan apat kan chaasa poho naya kan dadima araw do bohan no Adar do kāda tawen. 22 Siraw nya araw, nakapakalmonaw dan Jodyo do kabōsor da saw. As nya bohan, nakapaybadichid no liday daw a nayparin a kasoyotan, kan nakapaybadichid no kapagdongdong-aw daw a nayparin a kapagragragsak. Intolas na dyira a siraw nya araw, ki pistaen da, magragragsak sa, maysinririgālo sa so makākan, as kan rigālowan da saw mapobri saw. 23 Tinongpal da san Jodyo saw nya a bilin ni Mordokeo, kan pinayparin daw nya a pista a silsilibraren da do kāda tawen.

24 Si Haman a pōtot ni Hammedata a yapo do kapotōtan ni Agag a kabōsor no tabo Jodyo, inpangta naw kaipadiman na siras Jodyo. Iyaw nagpabōnot so mapangarananaya so Porim a nangikeddeng so araw a karārayaw kan kapatawos da siras Jodyo saw. 25 Ki do nakapakarapit naw di āri no nya pangta, nangikeddeng si āri so naitolas sa a bilin a iyaw nya marahet a pinanggep ni Haman a maikontra dyirad Jodyo saw, ki naybidi do mismo na inawan. As iya kontodo pōtot na saw, ki nabītay do pangbitāyan. 26 As dawa, Porim naipangaran do dya saya araw a yapo do chirin a “por”.* 9:26 Est. 3:7 Maynamot do tabo a naitolas do tolasaw ni Mordokeo kan napariparin saw dyirad Jodyo saw, 27 pinayparin daw nya dadakay da para dyira kan dyirad kapotōtan da kan aran siraw machirapaw anchi dyira.† 9:27 Est. 8:17 As dyi da polos a hātan a silsilibraren nya dadwa karaw do kāda tawen do naikeddeng a chimpo kan akmas nakaitolas naw. 28 Siraw nya araw, ki machita nakmen kan ngilīnen no kāda kapotōtan do kāda pamilya kan do kāda probinsya kan do kāda syodad. As siraw nya araw no Porim, ki machita polos a dya katngan a silibraren no Jodyo mana wayaken maypānam pa dyirad kapotōtan da.

29 Katayoka na, aran si Rēyna Ester a pōtot ni Abihail kontodo si Mordokeo a Jodyo, ki namarin so tolas a mangipaboya so toray a pangpaneknek na so dāmwaw a tolas ni Mordokeo maynamot do Porim. 30 Siraw kopya saw no tolas, ki naipaw-it sa do tabo a Jodyo do asa gasot dadwa poho kan papito a probinsya do intīro a pagāryan ni Āri Ekserses. Naitolas a myan pakono kaydamnayan no kapangtokto kan kaoyodan. 31 Naitolas pa a magpista sa kan siraw kapotōtan da do araw saw no Porim do kosto a chimpo akmas pariparinen daw a kapangdāg so kapagayonar kan chimpo no kapagdongdong-aw. Inbilin daw nya da Mordokeo a Jodyo kan Rēyna Ester. 32 Iyaw nya bilin ni Ester nangipaneknek siras pariparinen maynamot do kasilibrar so Porim, as kan naitolas nyaya do librowaw a pakaitolasan mapariparin do pagāryan.