1 Iyaw anghil ni ĀPO,* 2:1 Eks. 14:19; 23:20 ki nangay do Bokim a yapo do Gilgal. Nachisisirin dyirad Israelita saw a kāna, “Inihtot koynyo do Egipto, kan indaōlwan koynyo do tanaw a insapata ko a itoroh dyirad kapoonan nyo saw. Binata ko dyira a kon ko, ‘Polos a dyi ko a rārayawen tōlag ko dyinyo, 2 as kan inyo, machitōlag kamo aba dyirad omyan do tanaya. Basbāli a rakraken nyo saw altar da.’† 2:2 Eks. 34:10-14; Deot. 7:2-5 Ki tinongpal nyo abaw bilin ko. Aysa, āngo ta komwan pinarin nyo? 3 Dawa, ibahey ko na dyinyo a paksyaten ko sabanchiw Kananeo do salapen nyo. Mayparin sanchi a riribok dyinyo. As siraw dyos daw, ki mayparin sanchi a akmay asdok dyinyo.” 4 Do nakatayokaw a nangibahey no anghilaw ni ĀPO so nyaya dyirad tabo a Israelita, ki nakalyak sa a tomnanyis. 5 Dawa, pinangaranan daw nawri a logar so Bokim,‡ 2:5 No chakey na batahen do Hebreo, ki “siraw tomanyis”. kan do dawri a yanan nangidāton sa di ĀPO.

6 Do nakapayamaw ni Joswe siras tawotawowaw a Israelita, nangay kāda trībo a mangsākop so bōkod na a pinakabinglay a tana.§ 2:6 Jos. 24:28 7 Nagsīrbi saw tawotawowaw di ĀPO do ōnos no kabyay ni Joswe. Aran do nakadiman naw, tinongtong daw magsīrbi di ĀPO do kasibibyay da paw no panglakayen saw a nakaboya so tabo saw mabīleg a pinarin ni ĀPO a para dyirad tawotawo no Israel.* 2:7 Jos. 24:31

8 Iyaw pachirawatanaw ni ĀPO a si Joswe a pōtot ni Non, ki nadiman do nakapagtawen na so asa gasot kan asa a poho. 9 Intābon da si Joswe do pinakabinglay naw a tana do idi a Timnat-sera do katokotokonan no Epraim a ammyānan no Tokon a Gaas.† 2:9 Jos. 24:29-30

10 Sinpanan na, nadiman paw tābo tawotawo do dāwri a kapotōtan ni Joswe. As iyaw somnaronwaw a kapotōtan, ki chinapatak daba si ĀPO, as kan pinarin naw dyirad Israelita.

11 Siraw Israelita, naygatos sa do salapen ni ĀPO do kapagsīrbi da dyirad dyos a Baal. 12 Tinadyichokodan da si ĀPO a Dyos no kapoonan da saw a nangihtot dyira yapo do Egipto. Inononotan kan dinaydāyaw da saw dyos dan tawotawo saw do omdibon daw, as pinasoli da si ĀPO. 13 On, tinadyichokodan da si ĀPO, kan nagsīrbi sa dyirad dyos saw a Baal kan Astarot‡ 2:13 Sa Baal, ki dyos sa a mahahakay, kan dyos no chimoy kan magla a mohamoha. Sa Astarot, ki rārayay da sa a dyos a mababakes a kangronaan a dyos do idi a Sidon. 1 Sam. 2:13, 12:10; 1 Āri. 11:5; 2 Āri 23:13 do matatarek a logar. 14 Dawa, do oltimwaw a kasoli ni ĀPO dyirad Israelitaw, inparawat na sa dyirad kabōsor daw a nangsamsam so warawara da. Inpaitoray na sa dyirad kabōsor da saw do omdibon daw, kan nakapaytēnek pa sabaw no Israelitaw. 15 Kāda nangayan da a nachigobat, inpaābak sa ni ĀPO a akmas insapata naw dyira. Taywara nariribokan sa.

16 Do dāwri, pinatnek sa ni ĀPO okom saw§ 2:16 Mana “pangpangōlo” . a mangisalākan siras Israelitaw do toray dan nangsamsamaw sira. 17 Ki inkaskāso daba no Israelitaw okom da saw. Basbāli a chinalakam da dinaydāyaw matatarek saw a dyos. In-godes daw tomnadyichokod do kapanganohed dan aāmang da saw a nagtongtongpal siras bilbilinaw ni ĀPO. 18 Kāda mapatnek si ĀPO so asa a okom a para dyirad Israelitaw, sinidongan naw nawri a okom. On, insalākan na sa do kabōsor da saw do kayan a sibibyay no nawri a okom, ta chināsi na sa ni ĀPO do nakapagas-āsog da do kalidyat kan kaidadanesan da. 19 Ki an madiman okom daw, maybidi saw tawotawowaw do sīgod a dadakay da, kan mangamangay pa sa kan kapoonan da saw. Nagsīrbi kan nagdāyaw sa dyirad matatarek a dyos. Nāw da nagsōkir a nangtongtong so marahet a kaparin da.

20 Dawa, taywara a nakasoli si ĀPO dyirad Israelita, kan binata na a kāna, “Siraw nya Israelita, rinārayaw daw tōlagaw a intōlag ko dyirad kapoonan da, kan inanohdan daba yaken. 21 Dawa, paksyaten ko paba do salapen daw aran sino dyirad nasyon saw a natokos do tanaw a kinarwan ni Joswe do nakadiman naw. 22 Parinen ko nya a pangsoōt so Israel tan chiban ko an monot sa do kabibyay a chakey ko a akmas kapoonan da saw mana engga.” 23 Dawa, inpalōbos ni ĀPO nasyon saw a nabidin. Taros na saba a pinaksyat mana inparawat a sakōpen ni Joswe.