1 Si Jepta a taga Gilead a mabīleg a taga-gobat, ki anak no mabakesaw a maglaklāko so asi na. Āmang na si Gilead. 2 Nakaiyanak pa si baket ni Gilead so mahahakay. Do nakapaypararakoh daranaw, pinaksyat da si Jepta. Inbahey da dya a kon da, “Makapagtāwid kabanchi so aran āngo di āmang ta, ta anak naymo do matarek a mabakes.” 3 Nayyayo si Jepta a komnaro dyirad kakakteh naw a mahahakay kan minyan do tana a Tob. Dawri, nachikpeh sa dyaw balyōdong saw a mahahakay kan minonot sa dya.

4 Homnabas saw araw, nangay sa nachigobat Ammonitaw dyirad Israelitaw. 5 Do naparinaw nya, siraw panglakayen daw no Israelita do Gilead, yangay da insabat si Jepta a yapo do tana a Tob. 6 Binata da dya a kon da, “Ngay, ipangōlwan mo yamen, ta machigobat ta dyirad Ammonita saw.”

7 Ki inatbay sa ni Jepta a kāna, “Inipsok nyo abawri yaken, kan pinayyayo nyo yaken do bahay ni āmang ko? Āngo ta mangay kamo dyaken sichangori do kalidyat nyowaya?”

8 Ki binata dan panglakayenaw no Gilead di Jepta a kon da, “As dawa, nangay kami dyimo sichangori, ta chakey namen a machangay ka dyamen a manggobat siras Ammonita saw, kan mayparin kanchi a pangōlo namen a tabo a omyan do Gilead.”

9 Initbay ni Jepta dyira a kāna, “An isabat nyo yaken a machigobat dyirad Ammonitaw, as pagballīgyen na yaken ni ĀPO, yaken anchiw mayparin a pangōlo nyo.”

10 Tinbay dan panglayakenaw no Gilead a kon da, “Naon! Si ĀPO, sistīgo namen. Sigorādo a tongpalen namen ibahey mwaya dyamen.” 11 Dawa, nachangay si Jepta dyirad panglakayenaw no Gilead, as kan pinayparin dan tawotawo saw si Jepta a pangōlo kan komander da. Do Mispa, pinirwa a inbahey ni Jepta tabo binata naw dyirad panglakayen do salapen ni ĀPO.

12 Sinpangan na, nanoboy si Jepta siras tobotoboyen do āryaw no Ammonita a mangay a mangiyahes a kon da, “Āngo ipsok mo dyamen ta dawa, gobaten mo yamen do tana namen?”

13 Tinbay no āryaw no Ammon tinoboy saw ni Jepta a kāna, “Do nakahtot daw no Israelita a yapo do Egipto, ināgaw daw tana namenaw a yapo do Oksong a Arnon a mandad Oksong a Jabbok kan manda do Oksong a Jordan. Changori, machita nyo a pabidyen a sitatalna.”

14 Pinaybidi sa ni Jepta siraw tobotoboyenaw di āri no Ammon, 15 kan inpaibahey na dyira a kāna, “Nya batahen ni Jepta: Ināgaw daba no Israelitaw tanaw no Moab mana tana dan Ammonita. 16 Do nakakaro daw no Israelita a yapo do Egipto, kinelsat daw let-angaw a mangay do Mabaya a Tāw, as nangay sa do Kadesh. 17 Do dāwri, tinoboy daw toboboyen da saw di āri no Edom a mangdaw so pamalōbos a magkelsat do tana naw. Ki inadngey na saba no āryaw no Edom. Komwan pa a nangdaw sa di āri no Moab, ki naskeh. Dawa, siraw Israelitaw, dinitā da do Kadesh.* 11:17 Nom. 20:14-21 18 Somnarono, kinelsat daw let-angaw a nagrikos do tanaw no Edom kan tanaw no Moab a mandad nakapakarapit da do dayāenaw no tana no Moab do bīt no Oksong a Arnon. Dawriw, nagkampwan da, ki somindep saba do tanaw no Moab, ta iyaw Oksong Arnon, ki pachipandan no Moab. 19 Somarono, nanoboy siraw Israelita siras tobotoboyen di Sihon a āri dan Amoreo† 11:19 Siraw Amoreo a tawotawo, ki matarek dyirad Ammonita a tawotawo. a mangitoray yapo do Hesbon, as nangdaw sa so pamalōbos a magkelsat do tana daw a komwan do tana namen.‡ 11:19 Nom. 21:21-24 20 Ki nagtalek aba si Sihon dyirad Israelitaw a magkelsat do tana daw. Basbāli a chinpeh na sa tabo tawotawo naw, as nagkampo sa do Jahas, kan ginobat na saw Israelitaw.

21 “Ki si ĀPO a Dyos no Israel, inparawat na si Sihon kan siraw bōyot naw dyirad Israelitaw kan inābak da sa. Dawa, inhap dan Israelitaw a dyira daw tābo tana daw no Amoreo a omyan do dawri a tana. 22 Iyaw tābo a tana dan Amoreo a inhap da, ki yapo do Oksong a Arnon a manda do Oksong a Jabbok kan yapo do let-ang a manda do Oksong a Jordan.

23 “As dawa, si ĀPO a Dyos no Israel, pinaksyat na saw Amoreo do salapen dan tawotawo na a Israel. Hapen mori a mirwa ah? 24 Dyira nyo abawriw aran āngo a intoroh no dyos nyo a Chemos? Dawa, aran āngo a intoroh ni ĀPO a Dyos namen, ki dyamen dana. 25 Namna, maganayganay kawri kan si Balak a pōtot ni Sippor a āri no Moab? Kinārit nawriw Israel mana ginobat na? 26 Minyan saw Israelita do Hesbon, Aroer, siraw omdibon a dedēkeyaw a idiidi, kan tabo idiidi do payis no Oksong a Arnon, tatdo a gasot a katawen. Āngo ta dyi mo a ināgaw do dāwri pa a chimpo? 27 Yaken abaw naygatos dyimo, an dya imo mamarin so madi dyaken do kapachigobat mwaya dyaken. Si ĀPO a iyaw okom, mangikeddeng sichangori an sino kosto, siraw Israelita mana siraw Ammonita.” 28 Ki inkaskāso naba no āryaw no Ammon minsāhyaw a inpaw-it ni Jepta.

29 Sinpangan na, pinabīleg no Ispirito ni ĀPO si Jepta, kan kinelsat naw tana a Gilead kan Manasses. Naybidi do Mispa do Gilead, as nakatongtong nas nangay dyirad Ammonitaw. 30 Insapata ni Jepta di ĀPO a kāna, “An iparawat mo saw Ammonitaw dyaken, 31 aran sino a manma a mohtot do bahay ko a machibayat dyaken do kapaybidi ko a nangābak siras Ammonitaw, dyira monchi mo ĀPO, as sosohan konchi a idāton.”

32 Dawa, namtang sa Jepta a machigobat dyirad Ammonitaw, kan inparawat sa dya ni ĀPO. 33 Inābak da saw dadwaw a poho a idiidi a yapo do Aroer a manda do omdibonaw no Minnit kan manda do kabawaw no Abel-keramim. Dawa, naābak saw Ammonitaw dyirad Israelita.

34 Do nakasabataw ni Jepta do Mispa, minohtot pōtot naw a mabakes a minbayat sya a tomatāda kan magtoktokar so tamborin. Iya, ki moyboh a pōtot na. Malaksid dya, aba polos matarek a pōtot na a mahakay mana mabakes. 35 Do nakaboya naw sya, pinirit naw laylay naw do oltimo a kaliday na, kan binata na a kāna, “Ayya! Balāsang ko! Paglidayen mwaya yaken a palālo. Imo sawen nakayapwan karārayawan ko, ta myan insapata ko di ĀPO, kan polos a dyi ko a maibabāwi!” § 11:35 Nom. 30:2

36 Ki tinbay na a kāna, “Mo Āmang, nagsapata ka na di ĀPO. Basta parinen mo dyaken akmas insapata mwaw maynamot ta intoroh narana dyimo ni ĀPO kapamahes dyirad kabōsor mo a siraw Ammonita.” 37 Ki inyahes na di āmang na a kāna, “Ki nya lang akdawen ko dyimo a nonolay mo yaken so dadwa a kabohan tan midibidi ako kan siraw rārayay kwaw do katokotokonan, as kadong-aw kos kanāw ko a birhin.”

38 Tinbay ni āmang na a kāna, “May ka, anak ko.” Pinalōbosan na iya a komaro so dadwa kabohan. Do dāwri, somnonget sa kan rārayay na saw a mababakes do katokotokonanaw, as kan dinongdong-awan naw kabirhin naw a dya nangabahay kan abos anak. 39 Nakahabas dadwa a kabohan, naybidi di āmang na. Tinongpal ni āmang naw insapata naw di ĀPO. As iyaw balāsang naw, ki nadiman a nāw na birhin.

Nyaw siniknanan no dadakayaw do Israel 40 a kāda tawen, siraw babbalāsangaw do Israel, komaro sa so apat a karaw a mangay a magdong-aw a pakanaknakman da so balāsangaw ni Jepta a taga Gilead.