1 Do nakatayokaw no nakadiman ni Moyses a pachirawatan ni ĀPO, naychirin si ĀPO do kasidongaw ni Moyses a si Joswe a pōtot ni Non. 2 Binata na a kāna, “Sichangori a nadiman dana si Moyses a pachirawatan ko, magrobwat ka kontodo saw tawotawo saya no Israel, kan mamtang kamo do Oksong Jordan a somdep do tanaw a itoroh ko dyinyo. 3 Do tābo a loglogar a matokapan nyo, dyira nyo na. Naitoroh ko na dyinyo a akmas inbahey ko di Moyses. 4 Yapo do let-ang do abagātan a manda do tokotokon saw do ammyānan do Lebanon, kan yapo do rakoh a oksong a Oprates do dāya a komwan do tābo tana dan Heteo a manda do Mediterranean a Tāw do lāod, ki tana nyo nanchi. 5 Abanchiw makaparin a makaābak dyimo do ōnos no kabyay mo. Ta akmas nakayan ko di Moyses, komwan kayan ko dyimo. Polos a dyi konchimo a nonolay mana karwan. 6 Payiten kan patoreden mo aktokto mo, ta imonchiw mangidaōlo siras nya saya tawotawo do kadyira danchis tanaw a insapata ko a itoroh dyirad kapoonan da saw. 7 On, payiten kan patoreden mo aktokto mo, as kan kapyahen mo a sigorādohen a tongpalen a tābo Linteg a inbilin ni Moyses a pachirawatan ko dyinyo. Somiwal kaba do kawanan mana do kaholi. Tan komwan, myan ballīgi mo do aran dino a kwanan mo. 8 Nya libro no Linteg, ki aryan mo aba a basbasāen. Amirīsen mo māraw kan mahep, kan ihawa mo a tongpalen tabo naitolasaw do dyaya libro. Tan komwan, maasinso kan maballīgi ka. 9 Kanakmen mo a inbilin ko dyimo a payiten kan patoreden mo aktokto mo. Mamo mana maōpay kaba, ta yaken a si ĀPO a Dyos mo, ki nāw ko a myan dyimo do aran dino a kokwanan mo.”

10 Sinpangan na, minandaran sa ni Joswe siraw opisyalis daw no tawotawo a kāna, 11 “May kamo do kampo a yanan tawotawo kan ibahey nyo dyira, ‘Mangisagāna kamo so bahon nyo. Ta anchan makahabas tatdo a karaw, mamtang kamonchi do Oksong Jordan kan sakōpen nyonchiw tanaw a itoroh dyinyo ni ĀPO a Dyos nyo.’ ”

12 Ki dyirad trībo saw no Ruben, Gad, kan Mamandāya a Manasses, binata ni Joswe a kāna, 13 “Naknakmen nyo bilinaw a intoroh na dyinyo ni Moyses a pachirawatan ni ĀPO a kāna, ‘Si ĀPO a Dyos nyo, ki itoroh naw nyaya tana dyinyo a paynahahan nyo.’ 14 Siraw babbaket nyo, siraw adedekey nyo, kan siraw animal nyo, ki mabidin pa do dya tana do dayāenaya no Oksong Jordan a naitongdo ni Moyses a para dyinyo. Ki tabo saw mahahakayaw a para gobat a nakaarmas, ki machita panman da saw kadwanaw a Israelita a mamtang tan sidongan da sa 15 a mandad kaitoroh dyira ni ĀPO so inahah a akmas pinarin naw dyinyo, kan manda do kaaran sira madyira daranaw tanaw a intoroh dyira ni ĀPO. Tayokaw nawri, maybidi kamo na, kan akoparen nyo naw tana nyowaw a mismo a intoroh dyinyo ni Moyses a pachirawatan ĀPO do dayāen no Oksong Jordan.”

16 Tinbay da si Joswe a kon da, “Parinen namen aran āngo imandar mo dyamen, kan aran dino toboyan mo dyamen, ki mangay kami. 17 Akmas katongtongpal namen so tābo naimandar ni Moyses, komwan katongpal namen dyimo. Myan pakono dyimo si ĀPO a Dyos mo a akmas kayan na di Moyses. 18 Aran sino a machiribīldi do imandar mo kan dya mangtongpal do aran āngo a ichirin mo, machita maipadiman. Basta payiten kan patoreden mo aktokto mo!”