2
No Nakarārayaw no Syodad a Ninebeh
1 Inyo a taga Ninebeh, mawara danaw mangraot dyinyo.
Bantayan nyo kōta nyo, sipotan nyo rarahan,
as kan isagāna nyo inawan nyo a machigobat.
2 (Ta īto kapabidi ni ĀPO dyirad kapotōtan ni Jakob so dāyaw da.
On, pabidyen ni ĀPO iyaw katan-ok no Israel a akmas katan-ok daw
do sakbay paw a kapangraot da no kabōsor da saw
a nayrārayaw so kaobāsan da.)
3 Siraw sarāpa dan soldādo no kabōsor nyo, ki mabaya,
as kan maylaylay pa sa so mabaya.
Nakasāgana dana sa a mangdarop dyinyo.
Gomilgilap akmay apoy logan da saw a pachigobat,
as kan nakalāyat danaw chibot da.* 2:3Mana “makey dana saw kabalyo da a domoklos”.
4 Siraw nya logan da, ki makmakmah sa do kalkalsāda
a midibidi dyirad plasa a kararahawan saw a logar.
Akma say somdesdeb a paysohwan,
kan gomilgilap sa akmay kimat.
5 Iyaw komander daw, ki ngēngeyan na saw opisyal naw,
ki madwadodog sa do katataray da.
Makalyalisto sa komwan do ahadaw no syodad,
kan mapatnek sa so pagsarāpa da.† 2:5 Osaren daw rakohaw a toroso a pangdongpar so rowangan no syodad. Ki siraw soldādwaw a maysabhay so toroso, machita daw sarāpa da.
6 Maiwangan dana saw rowanganaw a yapo do oksong,‡ 2:6 Iyaw syodad a Ninebeh, ki napatnek do mamandāya no oksong a Tigris.
as kan somryam sa do palasyo do kananawā da.§ 2:6 Mana “nalasa danaw palasyo.” Do chirin Hebreo, ki “maronaw danaw palasyo”.
7 Maikeddeng dana a mabahod kan maakaw saw tawotawo do syodad.* 2:7 Mana “maakaw danaw rēyna da”.
Siraw adīpen na a mababakes, ki magas-āsog sa akmay boyit,
as kan togtogen daw barōkong da do kapagmamayo da.
8 Akmas kawyog no ranom a yapo do masawāngan a minanga,
komwan kapayyayo no tawotawo a yapo do syodadaw a Ninebeh.
Myan sa a mangagagay a kon da, “Magsardeng! Magsardeng kamo!”
ki polos a abaw maybidi a aran asa.
9 Siraw domaropaw, iyagagay da a kon da,
“Samsamen nyo pirak daw! Samsamen nyo balitok daw!”
Iyaw kinabaknang no syodadaw a Ninebeh, ki machipandaba.
Āro mababalor a warawara na!
10 Marārayaw, masamsaman, kan mainonolay danaw Ninebeh.
Siraw tawotawo na, ki maychakābot, apabaw tored da,
maychamirpirpir sa, as kan makasosohāw danaw kāda rōpa da.
No Kaiyarig no Ninebeh do Aschip Dan Lion
11 Dino paro yanan syodadaw a maiyarig do aschip dan lion
a yanan a pamakanan dan lion siras orbon da sa?
Dino paro nangayan dan lionaw kan no bākes naw,
kan siraw orbon daw a dya mariribok?
12 Iyaw lionaw, nangdiman so manawob para dyirad orbon naw,
kan namseh so para kanen no bākes naw.
Inapno naw aschip naw so diniman na.
Do bahay naw, inapno na so hinagahagay na saw a asi.
13 Bata ni ĀPO a Manakabalin do Tābo dyirad taga Ninebeh a kāna,
“Yaken, kabōsor nyo!
Sosohan ko sanchiw logan a pachigobat nyo.
Siraw soldādo nyo a akmay bomarito a lion, ki madiman sanchi do ispāda.
Makapanamsam kamo pabanchi do tanaya.
No tīmek dan minsahīro nyo, ki madngey nyo pabanchi.”
*2:3 2:3Mana “makey dana saw kabalyo da a domoklos”.
†2:5 2:5 Osaren daw rakohaw a toroso a pangdongpar so rowangan no syodad. Ki siraw soldādwaw a maysabhay so toroso, machita daw sarāpa da.
‡2:6 2:6 Iyaw syodad a Ninebeh, ki napatnek do mamandāya no oksong a Tigris.
§2:6 2:6 Mana “nalasa danaw palasyo.” Do chirin Hebreo, ki “maronaw danaw palasyo”.
*2:7 2:7 Mana “maakaw danaw rēyna da”.