3
Waday Gutud an Amin di Logom
1 Hay kulugo' ya waday gutud hi a'atan an ami'amin di ma'ma'at hitun luta, ya ma'atdah nan gutud di pangiyabulutan Apo Dios:
2 Waday itungawan ya atayan,
ya waday puntamman ya pamo"an.
3 Waday pumatayan ya umadaogan,
ya waday pama"ian ya pangiyamman.
4 Waday kumilaan ya umabatlan,
ya waday lumungdayaan ya panayawan.
5 Waday pangiwa'atan ya pangamungan hinan batu,
ya waday pun'a'agwalan ya punhihiyanan.
6 Waday panganapan ya pangutawan,
ya waday pangipo"oyan ya pangitapalan.
7 Waday panekhekan ya pangugutan,
ya waday dumidinngan ya humapitan.
8 Waday pamhod ya bohol,
ya waday gubat ya lenggop.
9 Umat ay hinay nitaguan ya hay ma'angang hinan tagun mangilapot an tumamutamu? 10 At ha"in ya nonomnomo' di ngadan di penhod Apo Dios hi pumbalinan di nitaguan. 11 Ipa'annung Apo Dios an amin nan ninomnomnan ma'at hinan nepto' an pangatana, ya indatnay punnomnom di tagu ta way atonan manginnilah nan adi apogpogan di lennawana. Mu adi tu'u pa"innilah nan gunna aton an ta"on hidin hopapna ta engganah tun angunuhna. 12 At hay inila' hi ma"aphod hi aton tu'u ya un tu'uat mun'am'amlong eten atagu tu'u! 13 Ya inila' goh an hi Apo Dios di nangiyabulut an mangan an amin di tagu ya uminum ta tamtamanday nunligatandah intamuanda, ti an amin hana ya adaw an nalpun Apo Dios. 14 Ya an amin nan inat Apo Dios ya munnononnong an adi ma'udman ya ma'aanan. Ya manu ay aton Apo Dios di umat hina ya ta way aton nan tatagun mange'gon ay Hiya.
15 An amin nan ma'at ad ugwan ya umat hinay na'at goh hidin penghana,
ya ta"on nan ma'at goh hi awni.
Ti un pumbinangngadon Apo Dios nan gun ma'at!
Hay Ami'idan di Nahamad an Panumalyah tun Luta
16 Ya tinnig'u goh an hitun luta
ya waday adi maphod hi aton nan mumpanuh
ti wadada damdamay mangat hi nappuhih niddum.
17 Ya ninomnom'un alyo' di,
“Ta"on hi un umat hina mu udum di algaw at humalyaon Apo Dios
an amin nan nangat hi maphod ya nappuhi!”
Hay Aid di Nun'abhiwan di Tagu ya Animal
18 Ya ninomnom'u goh an manu ay waday iyabulut Apo Dios hi punligatan ya ta ipa'innilanan mi'id di nun'abhiwan nan taguh nan animal. 19 Ti nan tagu ya animal ya numpaddung di apogpoganda ti matoyda. At undan way niyoy'onaynaan di taguh nan animal an mi'id hulbin di nitaguandan duwa. 20 Ya nan hupu' an nalpuwanda ya hiya goh di pumbangngadandah unda matoy. 21 Mu undan way nanginnilah un nan lennawan di tagu ya umuy ad daya, ya nan lennawan di animal ya umuy ad dolom!
22 At hay ninomnom'uh maphod hi aton tu'u ya un tu'uat tuwali umamlong ta tamtaman tu'uy nanablayan tu'u. Ti undan way nanginnilah ma'at hi alpahan di atayan tu'u!