49
Nan Angunuh an Hinapit Jacob
(Deut. 33:1-29)
1 Hi Jacob ya impa'ayagna an amin nan imbabaluyna ta ibaganay ma'at ay didah udum hi algaw. 2 Ya unat goh na'amungda ya inalin Jacob ay diday,
“Da'yun imbabaluy'u,
donglonyuy ibaga' an hi amayun hi Israel!
Hi Reuben
3 He"a, Reuben an pangpangngullu,
he"ay nahhun hi nalmuh din amabi'ah'u,
ya he"ay nabagbagtuy haadna,
ya ongol di abalinanan da'yun hina"agi.
4 Mu adi'a matugun an umat hinan humibun luwag di danum,
at adi minaynayun di anabagtum ti enelo'muy ohah nan ahawa' ta binaina'.* Gen. 35:22.
Da Simeon ay Levi
5 Ya da'yu, Simeon ay Levi, ya numpaddung di aatyu
ti da'yu ya impa'enghayun un hay matadom di o'odnanyun un ayu dumaladalat.
6 At ha"in an hi amayu ya adi' ahan iyunnud hinan ato'atonyun dumalat hinan amabmabbungotyu,
ya pimmatoy ayu,
ya ta"on un nan bakan ma'usal hi bangkag an mun'aladu ya pinilayyu.† Gen. 34:25-31.
7 At da'yu ya ma'idutan ayun dumalat nan bungotyun atata'ot ti mi'id homo'yu!
At iwa'at'u nan holagyuh nan lutan di Israel ta miwa'at ayun himpangapu.
Hi Judah
8 He"a, Judah,‡ Hay pohdon ten ngadan an ibaga ya mipabagtu (Gen. 29:35), at mattig an impa"el Jacob. ya nan a'agim ya ipabagtu da'a ta he"ay e'gonanda,
ya abakom an amin nan binuhulmu,
ya munhippi nan a'agim ay he"a.
9 Ya umat'ah nan ma'abbi'ah an layon an abakom nan binuhulmu,
ya malenggop'an umat hinan layon an nalpah ay an pinatoyna nan binuhulna
ya numbangngad an malenggop hinan ipo"oyana.
Ya umanina'inat ya un mali'uh ya tuma'otdan mamangon ay hiya.
10 At he"a, Judah, ya nan holagmuy munnononnong an mun'alih
engganah umali nan Ap'apu§ Nan Alin Pento' Apo Dios an hi Jesus. ta Hiyay unudon di atagutagu.
11 Ya ta"on unmu eg'od nan dongkim hinan ma"ap'aphod an wa'al nan greyp
ta pun'a'anay udumna ya do'do"ol damdamay greyp hi ononyu,
ya ta"on unmu pumba'ba'an di danum di greyp ya do'do"ol damdamay greyp hi inumonyu.
12 Ya nan matam ya bubumlah hi ado'ol di inumom an bayah,
ya nan babam ya pumahapaha' an dumalat nan ado'ol di inumom an gatas.
Hi Zebulun
13 He"a, Zebulun, ya munhitu'ah nan pingit di baybay ta da'yuy ad lutah
nan way duma'alan di pupul an hay igad ya engganah dih ad Sidon.
Hi Issachar
14 Ya he"a, Issachar, ya umat'ah nan mabi'bi'ah hi dongkin mali'uh hinan gagwan di pungkalgaan
15 ti he"a ya malia"a an wa ay ta tigom ta malumong nan luta ya maphod hi pun'eblayan,
ya intutulidmun muntamu,
ya na'na'unnud'a ti penhodmuy mid al'ali.
Hi Dan
16 Ya he"a, Dan,* Hay pohdon ten ngadan an ibaga ya hiyay mumpanuh ta mipattig di pumhodanda (Gen. 30:6), at mattig an impa"el Jacob. ya he"ay mumpanuh ay da'yun himpangapun
umat hinan udum an holag Israel ta mipattig hi un way amaphodanda unu bo'on.
17 Ya umat'ah nan atata'ot an ulog hinan pingit di owon
an wa adyay maluh an kabayu ya himbumagga ya inalatnay hu'ina ta magah nan nitakay.”
18 Ya inalin Jacob di, “Apo Dios, hohoddo' di pannagam hinan bumaliw!”† Gapu ta impa"el Jacob an hi Dan ya umat hinan ulog an umalat at kulugon nan udum an hi AntiKristu (unu nan Mi'bohhol ay Jesu Kristu) ya ohan holag Dan, at hiyaat unna inaliy, “Hohoddo' di pannagam hinan bumaliw!” (bahaom nan footnote di Rev. 7:8). Mu mid mapto' hi un makulug.
Hi Gad
19 Ya intuluy Jacob an himmapit an inalinay,
“He"a, Gad,‡ Duway pohdon ten ngadan an ibaga: nan oha ya himmimo', ya hay miyadwa ya ohan battalion di tindalu (Gen. 30:11). Mattig an inusal Jacob nan miyadwan meaningnah tuh nan nangipa"ilana. ya mi'id di ta'otmuh nan ohan battalion di tindalu
ti wa adyay tumalupa ya numpudugmu dida.
Hi Asher
20 Ya he"a, Asher, ya malmuy do'ol hi mun'aphod an ma'an hinan ihabalmu
an mabalin hi onon di aliy udumna ti malumong nan lutayu.
Hi Naphtali
21 Ya he"a, Naphtali, ya umat'ah nan nibo'tan an ulhan nawaya,
ya mun'aphod di aat nan imbabaluyna.
Hi Joseph
22 Ya he"a, Joseph, ya umat'ah nan mamungan nitanom an manaphapang hinan way obob.
23 Ya ta"on un nunheglay pangat nan binuhulmun he"an pun'ipdugday panadan he"a
24 mu nala'la'eng'an mamanan dida ti ipabi'ah da'ah nan ongol di abalinanan Dios an dayawon Jacob,
ya hiyah ne Dios an manalimun hinan holag Israel,
25 ya nan mabi'ah an Dios din o'ommodmuy bumadang ya mungwagah ay he"ah wagah an malpud abuniyan,
ya nan bunol di lutan umat hi danum,
ya nan do'ol an binabain malpuh nan holagmu.
26 Ya hatun wagah'un he"an middum nan wagah nan o'ommod'u,
ya nahamhamad ya un nan maphod an malpuh nan aduntuduntug.
At pumhod'a, ya malmun amin di mahapulmu,
ya he"ay mawagahan hi umat hina an dumalat nan anabagtum hinan a'agim.
Hi Benjamin
27 Ya he"a, Benjamin, ya umat ah nan ahuh inalahan
an gahin ahan unna patayon nan pi'pattoyna,
ya nun'a'anah nan mahoyang,
ya ginogodwanah nan mapuyaw.”
28 Hiya hanay nunwagah Jacob ay didan himpulu ta duwan holagna an miyunnudan hi aatda.
Hay Natayan ya Nilubu'an Jacob
29 Ya hi Jacob ya inalina goh ay diday, “Magadyuh di umaya' an middum hinan o'ommod'u. At matoya' ay ya ilubu'a' hinan lubu' ama hinan lingab hidih nan lutan Ephron an holag Heth 30 hi ad Machpelah hi potto' di buhu'an di algaw hi ad Mamre hidid Canaan. Ya hete han luta ya hay lina'uan apun hi Abraham ay Ephron ta ilubu'andan hina"ama. 31 Ya hiyah de di nangilubu'andan Abraham ya din ahawanan hi Sarah, ya hiyah de goh di nangilubu'andan Isaac ya din ahawanan hi Rebekah, ya ta"on hi Leah ya hidi goh di nangilubu'a'. 32 At nan luta ya nan lubu' ya napla' ay Ephron an holag Heth.”
33 Ya unat goh nalpah hi Jacob an ni'hapit hinan imbabaluyna ya nundopag hinan nolo'ana, ya natoy.§ Mid mapto' ya na'at hidin 1859 B.C.
*49:4 Gen. 35:22.
†49:6 Gen. 34:25-31.
‡49:8 Hay pohdon ten ngadan an ibaga ya mipabagtu (Gen. 29:35), at mattig an impa"el Jacob.
§49:10 Nan Alin Pento' Apo Dios an hi Jesus.
*49:16 Hay pohdon ten ngadan an ibaga ya hiyay mumpanuh ta mipattig di pumhodanda (Gen. 30:6), at mattig an impa"el Jacob.
†49:18 Gapu ta impa"el Jacob an hi Dan ya umat hinan ulog an umalat at kulugon nan udum an hi AntiKristu (unu nan Mi'bohhol ay Jesu Kristu) ya ohan holag Dan, at hiyaat unna inaliy, “Hohoddo' di pannagam hinan bumaliw!” (bahaom nan footnote di Rev. 7:8). Mu mid mapto' hi un makulug.
‡49:19 Duway pohdon ten ngadan an ibaga: nan oha ya himmimo', ya hay miyadwa ya ohan battalion di tindalu (Gen. 30:11). Mattig an inusal Jacob nan miyadwan meaningnah tuh nan nangipa"ilana.
§49:33 Mid mapto' ya na'at hidin 1859 B.C.