4
Nan Inalin Apo Dios hi Bahol nan i'Israel
1 Ya inali' an hi Hosea di,
“Donglon tu'un holag Israel heten ipabahol Apo Dios ay ditu'u
an mi'id anuy denol nan tatagun ditu'u,
ya mi'id di pamhod tu'uh i'ibba tu'u,
ya din'ug tu'u anuh Apo Dios.
2 Ti un tu'uat goh mun'idut, ya kumuluk, ya pumatoy,
ya mangakaw, ya me'yelo' hi bo'on ahawa,
at paddungnay limmuwag nan adi maphod an ma'ma'at,
at hiyanan minaynayun di mipapatoy ay ditu'u.* Hidin nalpahan di natayan nan Alin hi Jeroboam II ad Israel hidin 753 B.C. ya waday namatoy hinan opat an a'alid Israel an (1) nan Alin hi Zechariah (an un onom di bulan hi nun'aliana ya un matoy; II Ki. 15:8-12), ya (2) nan Alin hi Shallum (an un oh'ohhay bulan hi nun'aliana ya un matoy; II Ki. 15:13-15), ya (3) nan Alin hi Pekahiah (an un duway tawon di nun'aliana ya un matoy; II Ki. 15:23-26), ya (4) nan Alin hi Pekah (II Ki. 15:27-31). Ya eden timpu ya waday ohan alin agguy napatoy an nan Alin hi Menahem, mu hiyay nangipapatoy hinan impapto'na, ya impabu'lina nan numpunhabi (II Ki. 15:16).
3 At hiyanan mumbalin hi mapulun tun babluy tu'u
ta mun'atoydan amin nan wah tu
an ta"on un nan animal, ya nan hamuti,
ya ta"on un nan wah nan baybay.”
Hay Namadanan Apo Dios hinan Papadi
4 Ya inalin goh Apo Dios di,
“Mu adi ayu mumpipinnabahol
ti hay pabaholo' ya da'yun papadi.† Mid mapto' ya waday udum an papadin namhod an mangidiklamuh nan tatagu ta alyonday hay tataguy dumalat hi pimmuhian nan nasyonda, mu hay inalin Apo Dios ya ta"on un dida goh.
5 Ti gun ayu bumahobahol hi abigabigat an da'yun amin hinan mumpunlayah an propeta,
at hiyanan pa"io' hinad Israel an nipaddung hi inayu.
6 Ubaho' nan tatagu' ti agguya' inunud ay dida,
mu da'yun papadi di pabaholo' ti adiyu pohdon an unudon di Uldin'u.
At hiyanan du'go' da'yu an ta"on un nan imbabaluyyu.
7 Ti alyon at goh ta dumo'ol ayun papadi
ya un at goh miyal'allay pumbahbaholanyu
ti impalloga' an Dios hinan inyammayun dayawonyu.
8 Ti pohpohdonyuh un bumahobahol nan tatagu'
ta dumo'ol di iyalidah e'nongdan dumalat di baholda
ya wan da'yuat di umadangyan.
9 At hiyanan moltao' nan tatagun dumalat nan baholda,
ya umat goh hinay ato' ay da'yun papadi.”
 
10 Ya inalin goh Apo Dios di,
“Ta"on goh hi unyu gun anon di dagwayun e'nong nan tatagu
mu mahinaangan ayu damdama.
Ya ta"on hi un ayu gun me'yelo' hinan binabain puta
mu adi ayu mahlag ta mi'id di atonyun dumo'ol
ti nginohoya' ay da'yu.”
Hay Nundayawan di i'Israel hi Udum an Ibilangdah Diosda
11 Ya inalin goh Apo Dios ay ditu'uy,
“Nen unyuat goh ilaputan an uminum hi bayah,
an ta"on un nan napgot ya iniddumyu ta mabutong ayu,
ya mid poto' di punnomnomyu.
12 Ya nan goh udot bubulul an ayiw di ayyu pummahmahan hi un waday pohdonyun innilaon,
ya usalonyuy pintung unu hul'ud an pumbuyun ta innilaonyuy aat di ma'at.
Ya pohpohdonyun umuy me'yel'elo' hinan binabain puta,
at hiyanay dimmalat hi nan'uganyun Ha"in an Dios.
13 Ya hidih nan tulid di duntug di ayyu pangidawatan hinan e'nongyu
ya panghoban hinan incense hinan puun di atata'nang an ayiw an manaphapang an maphod hi punliduman.
At mahawanan nan adi maphod an atonyu an ipabayad nan imbabaluyyuy odolda
ya ilugtapan nan inapuyuy ahawada.
 
14 Mu adi' moltaon nan binabain imbabaluyyu ya inapuyun nangat hi umat hina
ti da'yun linala'iy gun umuy hinan mangila'uh odoldah nan way pun'onngan,
ya innayunyun mun'onong hinan dayawonda.
Mu undan agguyyu inilan henen gunyu aton di dumalat hi a'ubahanyu?‡ Manu ay adi moltaon Apo Dios di pumbaholan nan binabai ti inilanan nan linala'i ya moltaonda nan binabaih unda ilugtapan dida an ta"on un dida goh an linala'i ya middumdah nan putan di timplu.
15 Da'yun i'Israel ya nipaddung ayu damdamah nan babain nangilugtap hi ahawana.
Mu olom ni' ya adiyu talamon nan iJudah ta adida iyunnud ay da'yu.
Ya idinongyun gun umuy mun'onong ad Gilgal§ Hete ya babluy an neheggon ad Jericho, ya impiyamman nan Hudyuh di nan ma"aphod an pundayawandah bululda (Hos. 9:15; 12:11). ya ad Beth-Aven* Hay pohdonan ibaga ya babluy di pumbaholan. Mu hay immannung an ngadan ten babluy ya ad Bethel an hay ibalinana ya punhituwan Apo Dios (bahaom nan footnote di Gen. 28:19). Mu pimmuhih ten lugal ti nan nahhun an alid Israel hi appit hi iggid hi un hagangon di buhu'an di algaw an nan Alin hi Jeroboam I (930-909 B.C.) ya impiyammanah di nan oha goh an ma"aphod an pundayawan hinan bulul (I Ki. 12:28-33). an napnuwan di adi maphod an ma'ma'at.
Ya adi ayu gun munhapatah ngadan'u an Dios an wagwadah enggana.
16 Da'yun i'Israel ya umat ayu goh hinan bakan nalot an maguyud.
Pohdo' an ipapto' da'yun umat hinan aton nan mumpahtul
an iyuyna nan kalniluh nan ambilog an pumpahtulan,
mu nihimung an adiyu pohdon.
17 Ti nunheglay namenhodyun i'Israel an mundayaw hinan bulul,
at un ayu kaymu okod!
18 Ya pohpohdonyun umin'inum
ta wa ay ta nabutong ayu
ya innayunyun umuy manganap hinan binabain puta
ti pa'appopohdonyun gun mangat ay danen ababain.
19 At hiyanan ma'ubah ayuh pangat han paddungnay alipugpug ta mabainan ayu
ti mi'id di ibadang nan bubulul an gunyu onngan.”

*4:2 Hidin nalpahan di natayan nan Alin hi Jeroboam II ad Israel hidin 753 B.C. ya waday namatoy hinan opat an a'alid Israel an (1) nan Alin hi Zechariah (an un onom di bulan hi nun'aliana ya un matoy; II Ki. 15:8-12), ya (2) nan Alin hi Shallum (an un oh'ohhay bulan hi nun'aliana ya un matoy; II Ki. 15:13-15), ya (3) nan Alin hi Pekahiah (an un duway tawon di nun'aliana ya un matoy; II Ki. 15:23-26), ya (4) nan Alin hi Pekah (II Ki. 15:27-31). Ya eden timpu ya waday ohan alin agguy napatoy an nan Alin hi Menahem, mu hiyay nangipapatoy hinan impapto'na, ya impabu'lina nan numpunhabi (II Ki. 15:16).

†4:4 Mid mapto' ya waday udum an papadin namhod an mangidiklamuh nan tatagu ta alyonday hay tataguy dumalat hi pimmuhian nan nasyonda, mu hay inalin Apo Dios ya ta"on un dida goh.

‡4:14 Manu ay adi moltaon Apo Dios di pumbaholan nan binabai ti inilanan nan linala'i ya moltaonda nan binabaih unda ilugtapan dida an ta"on un dida goh an linala'i ya middumdah nan putan di timplu.

§4:15 Hete ya babluy an neheggon ad Jericho, ya impiyamman nan Hudyuh di nan ma"aphod an pundayawandah bululda (Hos. 9:15; 12:11).

*4:15 Hay pohdonan ibaga ya babluy di pumbaholan. Mu hay immannung an ngadan ten babluy ya ad Bethel an hay ibalinana ya punhituwan Apo Dios (bahaom nan footnote di Gen. 28:19). Mu pimmuhih ten lugal ti nan nahhun an alid Israel hi appit hi iggid hi un hagangon di buhu'an di algaw an nan Alin hi Jeroboam I (930-909 B.C.) ya impiyammanah di nan oha goh an ma"aphod an pundayawan hinan bulul (I Ki. 12:28-33).

© 2018 WBT