6
Hay Agguy Namhodan nan i'Israel an Muntutuyuh Baholda
1 Ya inali' an hi Hosea di,
“La'tot man ya alyon tu'uy,
Mumbangngad tu'u mahkay an mundayaw ay Apo Dios
ti pina"i ditu'u ni' ay Hiya,
mu ipaphod ditu'u!
Ya paddungnay hinugatan ditu'u,
mu agahan ditu'un Hiya goh damdama!
2 At ag'aga ya ipaphodnay niyatan tu'un Hiya
ta minaynayun an ibbaan ditu'uh tun pi'taguan tu'u.
3 At hiyanan mahapul an aton tu'uy abalinan tu'un manginnilah aatna.
Ti nundadaan tuwalin bumadang ay ditu'u
an umat hinan algaw an un tuwali mingemel hinan helhelong,
ya umat goh hinan udan an un tuwali magah hitun luta
ta humangaw ya pumhod di mitanom.”
4 Mu inalin Apo Dios di,
“Unman mi'id di pangi'ata' ay da'yun i'Israel ya iJudah
ti i'innila' an henen pamhodyun Ha"in
ya umat hinan bunut ya dulnuh nan mun'awawa'ah an ag'aga ya na'ubah.* Ta"on hi un paddungnay nuntutuyu nan i'Israel hinan verses 1-3 mu inilan Apo Dios an agguy nahamad nan inatdan nuntutuyu.
5 At hiyanan hennag'u nan propeta' an mangipa'innilan ubaho' da'yu.
Ti hay ninomnom'un ten ato' ya ta ma'awatanyuh un madatngan nan a'ubahanyu
an umat hi dumatngan di ilat.
6 Ti hay pohdo' ya nan nahamad an pamhodyun Ha"in
an bo'on nan animal an e'nongyun Ha"in.† Mat. 9:13; 12:7.
Ti nan pangunudanyun Ha"in an Dios di nabalul ya un hanan gohbonyun e'nong ay Ha"in.”
7 Ya inalin goh Apo Dios di,
“Mu hay immannung ya umat ayu ay da Adam
an imbahhawda nan nunhahappitananmi.‡ Gen. 3:1-7.
8 Mu umat goh hidin i'ibbayud Gilead an adi ahan maphod di ina'inatda,
ya do'ol di tatagun pinatopatoyda.
9 Ya ta"on un da'yun papadi ya mumpangakaw ya mumpunhod'ap ayu
ti matutunud ayun umuy mumbota' hinan kalatan miyuy ad Shechem§ Ad Shechem di ma'alih Siudad an Pangihi'ugan ti mabalin an hiyay pange'wan nan tatagun lumayaw hi un way mamatoy ay dida (Josh. 20:1-9, ya namamah nan verse 7).
hi maluh ta hod'aponyu ya pinatoyyu.
At nidugah ahan an adi maphod hanan ato'atonyu!
10 At hidin do'ol di gun'u tinnig an nappuhin ina'inatyud Israel
ti umat ayu nongkay hinan babain din'ugnay ahawana ta immuy ne'ye'engha,
ya hay pannig'un da'yu ya nalugit ayu.
11 Ya ta"on un da'yun iJudah ya waday gintud'uh panumalyaa' ay da'yu
ta miyunnudan hinan inatyuy pummolta' ay da'yu.
Mu ongol di namhod'un bumadang ay da'yu ya mangipaphod hinan numbabluya'!”
*6:4 Ta"on hi un paddungnay nuntutuyu nan i'Israel hinan verses 1-3 mu inilan Apo Dios an agguy nahamad nan inatdan nuntutuyu.
†6:6 Mat. 9:13; 12:7.
‡6:7 Gen. 3:1-7.
§6:9 Ad Shechem di ma'alih Siudad an Pangihi'ugan ti mabalin an hiyay pange'wan nan tatagun lumayaw hi un way mamatoy ay dida (Josh. 20:1-9, ya namamah nan verse 7).