9
Hay Aat Nongkay nan Pummoltan Apo Dios hinan i'Israel
1 Ha"in an hi Hosea ya alyo' di,
“Da'yun i'ibba an holag Israel ya idinongyu nan behtan pundayawanyu
ta adiyu iyunnud hinan udum an babluy.
At adiyu pun'amlongan nan do'ol an bento'yu
an hay punnomnomyu ya hiyanay bayad di pundayawanyun Ba'al.
Ti umat ayuh nan babain din'ugnay ahawana ta immuy numpabayad hi odolna.* Hin'umu'uddum ya umuy nan putah nan pun'elekan hi paguy ti linala'in amin di umiyan hidih amahdomahdom ta engganay un malpah ti mahapul an waday mun'adug hinan elek (Ruth 3:2-3).
2 Mu ta"on un do'ol di ma'an ya ma'inum
ya makudangan ayuh ma'an damdamah udum di algaw.
3 Ti adi tu'u munnonong hitun babluy Apo Dios
ta mumbangngad tu'u goh ad Egypt† Hay ipa"el ad Egypt ya ad Assyria ti mid di i'Israel an nibalud hidid Egypt (bahaom nan footnote di Hos. 8:13 ta innilaom di na'at hinan ohan alin nibalud hidi, mu iJudah hiya an bo'on i'Israel, at nob'on). ya ad Assyria,
at ta"on un nan mapaniaw an ma'an hidi ya pe"an tu'u.
4 Ya ipawan nan tataguh di nan umuy tu'u pun'onngan hi ma'an ya bayah ay Apo Dios.
Mu ta"on ya adina damdama abuluton
ti hay pannignah nan ma'an eden babluy ya nipaddung hinan ma'an hinan way natoy.‡ Bahaom nan Num. 19:14-15 ta innilaom di ma'at hinan ma'an hinan abung hi awadan nan natoy.
At hanan mangan ay dane ya mibilangdah nalugit hi hinagang Apo Dios,
ya adi mabalin an mehgop danen ma'an hinan Timplu.
5 Ya idinong tu'un ibehtaan nan behtan pundayaw ti numbalin tu'uh himbut,
at mi'id di abalinan tu'un mangat hinan pohdon tu'u.
6 Ya ta"on hi un tu'u alyon di nabaliwan tu'uh nan ay tu'u atayan
mu mah'u' tu'u damdamad Egypt,
at hidiy atayan tu'u ya ilubu'an tu'u.
At hanan nun'abalul an gina'u tu'u ya ma'utawda,
ya nan a'abung tu'u ya mahu'munan hi wa'al.
7 Ya ag'agay adatngan di pummoltaan Apo Dios ay ditu'un holag Israel,
at ipa'innila tu'u tuwalih ne an dumalat nan nun'appuhin ina'inat tu'u.
Ti ta"on un da'min propeta ya inaliyuy nun'abongang ami,
at adi da'mi ahan pohdon an dumalat nan nidugah an adi maphod an aatyu.
8 Ti hennaga' ay Apo Dios ta ipa'innila' ay da'yun i'ibban holag Israel di pumhodanyu,
mu unna' at goh pahiwon ay da'yu
an umata' hi hamutin unna' at goh huluwon an ta"on un hinan Timplu.
9 Ya nidugah di anappuhiyu an umat ayu ahan hinan iGibeah,§ Bahaom nan Judg. 19:1-20:48 ta innilaom nan aat di tatagud Gibeah.
at hiyanan adi aliwan Apo Dios danen gunyu aton,* Manu ay adina aliwan di baholda ti agguyda intutuyun Hiya.
at moltaon da'yun Hiya.”
10 Ti inalin Apo Dios di,
“Hidin penghanah namto'a' hidin o'ommodyu
ya nipaddung hi panganapan hinan bungan di greyp hinan mapulun
ti hidin penghanah nanniga' ay dida ya umat hi pannigan
hinan hopap di bungan di fig an umipa'amlong.
Mu hidin immuydah nan Duntug an Peor ya ni'dayawda ay Ba'al an inyamman di tagu,
at umipaboholda an umatdan danen gunda dayawon.† Bahaom nan Num. 25:1-5 ta innilaom nan na'at ad Ba'al Peor.
11 At hiyanan nan nabalul ay da'yun i'Israel ya umahpuyaw an ay hamutin tumayap
ti nan a'ahawayu ya adida mahkay mawadaan,
at adi ayu mahlag.
12 Mu ta"on goh hi un alyon hi un way imbabaluyyu
ya bangngado' di nitaguanda ta numanomnom ayu.
Ya mahmo' ayu ti du'go' da'yu!
13 Hidin hopapna ya maphod di nitaguanyun i'Israel
an umat ayuh nan maphod an ayiw an himmangaw hinan ma'allumong an luta.
Mu ad ugwan ya ma'ubah ayu ti patayon nan buhul nan imbabaluyyu.”
14 Ha"in an hi Hosea ya alyo' di,
“Hay odowo' ahan ay He"a, Apo Dios, hi atom
ya olom ni' ya adida munholag nan binabai.”
15 Ya inalin goh Apo Dios di,
“Da'yun i'Israel ya nete"a tuwalid Gilgal di bimmubungta' ay da'yu
an dumalat nan nun'appuhin ina'inatyu.‡ Bahaom nan footnote di Hos. 4:15 ta innilaom di aat ten umipabohol an lugal.
At hiyanan pumpakak'u da'yu ta makak ayuh nan babluy an indat'u.
Ya mi'id mahkay di pamhod'un da'yu
ti ta"on un nan ap'apuyu§ Heten hapit ya umat hinan hapit di Hudyu an ngohoyon. At inusal Apo Dios nan hanul ta mipa'innilay aatda. ya ngohoyona'.
16 Ti da'yun i'Israel ya umat ayuh nan wa'al an mi'id di bungana ti mamaganan nan lamutna.
At umat hinay ma'at nongkay ay da'yun i'Israel an adi ayu mahlag
ti ta"on hi un alyon ta waday imbabaluyyu ta pa'appohpohdonyu dida
mu bangngado' damdamay nitaguanda.”
Hay Nangibaagan Hosea hi Ma'at hinan i'Israel
17 Ya ha"in an hi Hosea ya alyo' di,
“Da'yun i'ibba' an holag Israel ya agguyyu inunud hi Apo Dios,
at hiyanan du'gon da'yun Hiya ta umuy ayu lumane'le'od hinan abablubabluy hitun luta.”
*9:1 Hin'umu'uddum ya umuy nan putah nan pun'elekan hi paguy ti linala'in amin di umiyan hidih amahdomahdom ta engganay un malpah ti mahapul an waday mun'adug hinan elek (Ruth 3:2-3).
†9:3 Hay ipa"el ad Egypt ya ad Assyria ti mid di i'Israel an nibalud hidid Egypt (bahaom nan footnote di Hos. 8:13 ta innilaom di na'at hinan ohan alin nibalud hidi, mu iJudah hiya an bo'on i'Israel, at nob'on).
‡9:4 Bahaom nan Num. 19:14-15 ta innilaom di ma'at hinan ma'an hinan abung hi awadan nan natoy.
§9:9 Bahaom nan Judg. 19:1-20:48 ta innilaom nan aat di tatagud Gibeah.
*9:9 Manu ay adina aliwan di baholda ti agguyda intutuyun Hiya.
†9:10 Bahaom nan Num. 25:1-5 ta innilaom nan na'at ad Ba'al Peor.
‡9:15 Bahaom nan footnote di Hos. 4:15 ta innilaom di aat ten umipabohol an lugal.
§9:15 Heten hapit ya umat hinan hapit di Hudyu an ngohoyon. At inusal Apo Dios nan hanul ta mipa'innilay aatda.